Ҷашнвораи Беҳтарин 2018

  • Маросими ҷоизасупории озмуни телевизионии “Беҳтарин”

Муассис ва ташкилкунанда:

Муассисаи давлатии «Телевизиони Сафина»

МАҚСАД ВА ВАЗИФА (Муқаррароти умумӣ):
Лоиҳаи Маросими ҷоизасупории телевизионии “БЕҲТАРИН”-ро (минбаъд Лоиҳа) Муассисаи давлатии “Телевизиони Сафина” дар асоси вазифаҳои Оинномавии худ баргузор мекунад. Мақсад аз баргузории Маросими ҷоизасупорӣ мусоидат ба паҳн намудани дастовардҳо дар соҳаи телевизион, фароҳам овардани шароити мусоиди ҳамкории мутахассисони телевизионҳои давлатию хусусӣ (инфиродӣ) дар соҳаи телевизион мебошад. Инчунин Лоиҳа бо мақсади муайян намудани беҳтаринҳо ва дастгирии соҳибистеъдодҳо дар бахшҳои гуногуни фарҳанг, аз қабили санъати филмофарӣ (телевизионӣ), таҳияи шоу-барномаҳо, гузоришҳои иттилоотӣ, барномаҳои илмӣ — оммавӣ, кори коргардонӣ, наттоқӣ, ровигӣ, наворбардорӣ, танзими барнома, идея, дизайн, мусоҳиба, барномаҳои ватанпарастӣ, лавҳаҳои фарҳангӣ, ороиши студия ва ба ин васила мусоидат кардан ба рушди телевизиони миллӣ дар Тоҷикистон гузаронида мешавад.

ИШТИРОКЧИЁНИ ЛОИҲА
Муассисаҳои давлатию хусусии истеҳсолкунандаи маводи телевизионӣ, студияҳои садо ва симо, марказҳои продюсерӣ, ҷамъиятҳои соҳавӣ ва шахсони инфиродии соҳибкасб, ки дар Ҷумҳурии Тоҷикистон кор мекунанд.

ШАРТУ ШАРОИТИ БАРГУЗОРИИ ЛОИҲА
Иштирок дар ҷашнвора бо пешниҳоди маводи зерин сурат мегирад:
Беҳтарин лоиҳаи мардумӣ
Беҳтарин барномаи муаллифӣ
Беҳтарин гузориши телевизионӣ
Беҳтарин лавҳа
Беҳтарин садо
Беҳтарин танзими барнома
Беҳтарин филми мустанади телевизионӣ
Дизайни беҳтарин
Коргардони беҳтарин
Наворбардори беҳтарин
Наттоқи беҳтарин

БЕҲТАРИН ЛОИҲАИ МАРДУМӢ – пешниҳод дар шакли сенарияи лоиҳа ва як нашри видеоии таҳиягардидаи он дар ҳаҷми на камтар аз 10 дақиқа, мавзӯъ озод;
БЕҲТАРИН БАРНОМАИ МУАЛЛИФӢ – пешниҳоди сенария ва худи барнома дар шакли видеоӣ дар ҳаҷми 20-30 дақиқа, дар мавзӯи озод;
БЕҲТАРИН ГУЗОРИШИ ТЕЛЕВИЗИОНӢ – пешниҳоди видеоии гузориш дар ҳаҷми то 5 дақиқа, мавзуъ озод;
БЕҲТАРИН ЛАВҲА – пешниҳоди видеоии лавҳа дар ҳаҷми то 2-5 дақиқа, мавзӯъ озод;
БЕҲТАРИН САДО – пешниҳоди садо дар шакли видеоӣ бо пӯшонидани наворҳо ва ё расму ороишоти телевизионӣ (шабеҳ ба лавҳа), мавзуъ озод;
БЕҲТАРИН ТАНЗИМИ БАРНОМА – пешниҳоди сенарияи танзими барнома ва худи барнома дар шакли видеоӣ дар ҳаҷми 20-30 дақиқа, мавзӯъ озод;
БЕҲТАРИН ФИЛМИ МУСТАНАДИ ТЕЛЕВИЗИОНӢ – пешниҳоди сенария ва худи филм дар ҳаҷми 30-40 дақиқа, мавзуъ озод;
ДИЗАЙНИ БЕҲТАРИН – пешниҳоди маводи видеоии аз ҷиҳати кори дизайнерӣ ороишёфта дар ҳаҷми то 5 дақиқа;
КОРГАРДОНИ БЕҲТАРИН — пешниҳоди сенарияи сабти маводи видеоӣ ва худи он мавод дар шакли видеоӣ бо давомнокии 20-30 дақиқа, мавзӯъ озод;
НАВОРБАРДОРИ БЕҲТАРИН – пешниҳоди маводи видеоӣ бо давомнокии 5-20 дақиқа, мавзӯи озод;
НАТТОҚИ БЕҲТАРИН — пешниҳоди маводи видеоӣ бо давомнокии 5-20 дақиқа, мавзӯи иттилоотрасонӣ.

Довталабонро зарур аст барои иштирок дархости худро (замимаи 1) ба суроғаи Муассисаи давлатии “Телевизиони Сафина” пешниҳод намоянд.

Барои иштирок дар Лоиҳа довталабон бояд танҳо он маводеро пешкаш намоянд, ки бо формати видеоии дақиқияташ баланд (HD) сабту таҳия гардидаву ҳанӯз намоиш дода нашуда бошад.

Ду ва ё зиёда довталаб наметавонанд бо пешниҳоди як мавод дар як бахш иштрокчӣ бошанд, аммо бо пешниҳоди як мавод довталабон метавонанд дар ду ва ё зиёда бахшҳо иштирокчӣ бошанд.

Корҳои пешниҳодшуда бояд бо забони тоҷикӣ ё ба он тарҷума шуда бошанд (овоздиҳӣ, субтитрҳо).

Ҷой додани рекламаи шахсият, корхона, молу ашё ва ғайра дар маводи пешниҳодгардида қобили қабул нест, инчунин истифода аз кинофилмҳо ва дигар видеоҳои хазинавӣ бе зарурати касбӣ низ қабул намегардад.

Муассис ҳуқуқ дорад, ки дар ҳар марҳила агар номувофиқии довталаб ва ё маводи пешниҳодгардида ба шартҳои ҷашнвораро ошкор намуд, онро аз Лоиҳа берун кунад.

ТАРТИБИ БАҲОГУЗОРӢ
Ғолибони Лоиҳаро ҳайати ҳакамон, ки аз журналистон ва дигар шахсиятҳои маъруфи соҳаи кино, илму фарҳанг, телевизион ва радио иборат аст, муайян мекунад.
Маросими ҷоизасупорӣ тавассути телевизиони “Сафина” инъикос гардида, дар шабакаи ҷаҳонии интернет ҷой карда мешавад.

МУҚАРРАРОТИ ХОТИМАВӢ
Маводи ба Лоиҳа пешниҳодгардида аз ҷониби ҳайати васеи ҳакамон дар давоми 10 рӯзи корӣ мавриди баррасӣ ва таҳлил қарор гирифта, баҳогузорӣ мегардад ва бо тавсияи хаттии ҳайати доварон барои пешбурди кор ба мутасаддиёни ҷашнвора пешниҳод мегардад.

Консерти ҷамъбастӣ бо ширкати иштирокчиёни Лоиҳа дар шаҳри Душанбе баргузор гашта, ғолибон бо ҷоиза ва диплом сарфароз гардонида мешаванд.

Ҳайати ҳакамони Лоиҳа барои баҳогузории ҳунару маҳорати довталабон аз ҷониби директори Муассисаи тасдиқ мегардад.

Ҳайати ҳакамон дар фаъолияти худ набояд барои пайдо шудани ихтилофи манфиатҳо, ки ба баҳодиҳӣ таъсир расонида метавонад, шароит фароҳам биёранд. Ҳакамони Лоиҳа дар вақти баҳогузории ҳунар ва маводи довталабон, додани хулоса ва тавсия мустақил мебошанд. Муассиси Лоиҳа метавонад дар ҳолати зарурӣ ба ҳайати ҳакамони Лоиҳа шахсони дигарро бо ҳуқуқи гузоштани баҳо илова кунад.

Ҳар гуна баҳсҳо вобаста ба Лоиҳа дар ҳузури ташкилкунандагон ва дар ҷамъи доварон ҳал карда мешавад.

Дархост: ( дархост )

Тамос: ( +992 ) 93-537-00-66, ( +992 372 ) 227-78-07

Почтаи электронӣ: behtarin-tvs@mail.ru