04.06.2016 10:25

Олимов Ҷамшед Тоҳирович 16-майи соли 1986 дар деҳаи зебоманзари Саричашмаи ноҳияи Шамсиддини Шоҳин, дар оилаи омӯзгор ба дунё омадааст.  Соли 1999 аз мактаб-интернати рақами 13-и Саричашма, барои дониши хубу аъло ва дар олимпиадаи фаннии вилоятӣ аз забони англисӣ ҷои 2-юмро ишғол кардан, бо роҳхати Раёсати маорифи ноҳия ба литсей-интернати Президентӣ барои бачаҳои лаёқатманди Ҷумҳурии Тоҷикистон меояд. Ин даргоҳро соли 2003 бо баҳои хубу аъло хатм намуда, худи ҳамон сол ба Донишгоҳи Байналмилалии Тоҷикистон дохил шуда, дар факултаи муносибатҳои байналмилалӣ, шуъбаи дипломат-тарҷумон таҳсили худро оғоз менамояд. Дар давоми таҳсил Ҷамшед Олимов ҳамзамон бо муассисаи давлатии Телевизиони Сафина ҳамкории худро ба роҳ монда, дар идораи барномаҳои Иттилоотӣ-таҳлилии Навид ва идораи барномаҳои ҷавонӣ зебоӣ ва варзиш ба ҳайси наттоқ ва муҳаррир ба фаъолият шурӯъ мекунад. Соли 2008-ум номбурда Донишгоҳи Байналмилалии Тоҷикистонро бо дипломи сурх хатм менамояд. Дар тӯли фаъолияти 10 солааш Ҷамшед Олимов дар Муассисаи давлатии Телевизиони Сафина барномаҳои зиёдеро пешкаши бинандаҳои ин Муассисаи фарҳангӣ намудааст.  Муаллифи барномаҳои варзишии Офф-Сайд, Ҷасорат, ва Майдон мебошад. Ҷамшед Олимов дар идораи таҳия ва дубляжи филмҳои Телевизиони Сафина дар зиёда аз 300 филмҳои бадеӣ, ҳуҷҷатӣ ва кӯтоҳмуддат овоз  дода ҳамчунин онҳоро  аз забонҳои русӣ ва англисӣ ва забони тоҷикӣ тарҷума кардааст. Тӯли 8 сол аз тамоми ҷорабиниҳои варзишии дохил ва хориҷи кишвар гузоришҳоро сабт ва мустақим пешкаши ҳаводорони навъҳои гуногуни варзиш намудааст. Номбурда аз соли 2006-ум инҷониб дар идораи иттилоотии Навид ба ҳайси наттоқ ва дар барномаи иттилоотии «News» ҳамчун муҳаррир фаъолият дорад. Барои пурра намудани маҳорату малакаи хеш номбурда тӯли як сол дар Ҷумҳурии Мардумии Чин ба омӯзиш машғул гардидааст.   Айни ҳол Ҷамшед Олимов Сармуҳаррири Идораи барномаҳои «Ҷавонӣ ва варзиш» маҳсуб ёфта дар беҳтар намудани сатҳ ва муҳтавои барномаҳои идора саъй дорад. Шиори ӯ дар зиндагӣ: Навмед набояд шудан аз гардиши айём…

Добавить комментарий

Барномаҳо

Навид
22 июл 20:00