Ибодулло Машраб лауреати ҷоизаи байнидавлатии “Ситораи иттиҳод” гардид

Ҳакамони мукофоти ҳарсолаи байнидавлатии “Ситораи иттиҳод” ҳашт нафар лауреатҳоро дар соли 2016 эълон доштанд. Боиси хурсандист, ки Ҳунарпешаи халқии Тоҷикистон Ибодулло Машраб лауреати ҷоизаи байнидавлатии “Ситораи иттиҳод” гардид. Дар ин бора Вазорати фарҳанги Ҷумҳурии Тоҷикистон иттилоъ нашр кардааст.

Ҷоизаи асосии гуманитарии ИДМ ба арбобони фарҳанг ва санъат, ки ба дастовардҳои ҷаҳонӣ ноил гардида, ба рушди кишварҳои ИДМ мусоидат менамоянд, супорида мешавад.

Ҳунарпешаи халқии Тоҷикистон Ибодулло Машраб бо истеъдоди сарояндагӣ ва актёрӣ яке аз ситораҳои дурахшони санъати тоҷик ба шумор меравад. Дар фонди тиллоии Радиои тоҷик зиёда аз 30 суруди Ибодулло Машраб ҷой дода шудаанд. Нақшҳои мавсуф дар театр ва синамо, хусусан дар филмҳои “Рўъёи воқеӣ”, “Ашк ва шамшер” ва “Монӣ” маҳорати беназири ҳунарпешаро инъикос менамоянд.