Ба ҷаласаи навбатии Юнеско барои баррасӣ «Фалак» пешниҳод шуд

Аз 4 то 9 декабри соли 2017 дар ҷазираи Чеджудои Кореяи Ҷанубӣ ҷаласаи Кумитаи байниҳукуматӣ оид ба ҳифзи мероси фарҳангии ғайримоддӣ баргузор мегардад. Ба иттилои Вазорати фарҳанги Ҷумҳурии Тоҷикистон иштирокчиёни ҷаласа 34 дархости навро оид ба ворид намудан ба Рӯйхати мероси фарҳангии ғайримоддии умумибашарии Юнеско мавриди муҳокима қарор медиҳанд.

Дар номгӯи дархостҳое, ки дар ҷаласаи мазкур баррасӣ мешавад, аз Тоҷикистон мусиқии миллии тоҷикӣ «Фалак» пешниҳод гардидааст. Аз Арманистон рақси гурӯҳии мардона «Рочарӣ», аз Озорбойҷон хӯроки миллии «Дӯлма» ва тарзи таҳияи он, аз Қазоқистон бозии миллии «Асик» ва аз Қирғизистон бозии фолклории аспдавонӣ низ ба номгӯи дархостҳои баррасишаванда шомиланд. Туркманистон дархост кардааст, ки рақси деринаи «Куштдепди» дар ҷаласа баррасӣ гардад.