«ХИРС»-и тоҷикӣ дар намоишгоҳи Олмон

1-уми декабр дар шаҳри Берлин,  пойтахти  ҶФГ намоишгоҳи «Хирсҳо -ташвиқгари дустӣ ва муттаҳидӣ, санъат ва таҳаммулпазирӣ» ба кори худ шурӯъ намуд. Ба иттилои АМИТ «Ховар» намоишгоҳ аз 140  муҷассамаи  хирсҳо, ки аз ҷониби рассомон бо рангҳои бозгӯи таъриху фарҳанги миллии кишварҳои аъзои СММ оро дода шудаанд, иборат мебошад. Ин намоишгоҳ шурӯъ аз соли 2002 дар кишварҳои гуногуни қитъаҳои Осиё, Аврупо, Амрико баргузор мегардад. Имсол аз ин намоишгоҳ 35 миллион нафар дидан кардаанд.

Ҳадафи намоишгоҳ —  даъвати мардумони ҳама миллату динҳо ба дустӣ, муттаҳидӣ ва таҳаммулпазирӣ мебошад.

Хирсҳо ду метр баландӣ доранд. Хирсе, ки аз Тоҷикистон намояндагӣ менамояд, аз ҷониби рассом Светлана Франк наққошӣ ва рангубор карда шуда, тани онро хилъати аз матои миллии тоҷикӣ дӯхташуда зеб медиҳад.