«Садои Шарқ» 90-сола шуд

Аз нашри аввалини маҷаллаи миллии адабии Иттифоқи нависандагони Тоҷикистон — «Садои Шарқ» расо 90 сол пур шуд. Бахшида ба ин сана дар толори Иттифоқи нависандагон ҷамъомад баргузор гардид, ки дар он шоирону нависандагон, кормандони ин нашриёт ва дигар алоқамандону дӯстдорони илму адаб иштирок намуданд.

Нашрияи миллии адабии «Садои Шарқ» дар баробари анҷоми вазифаи асосии худ, ки нашри осори арзишманди адабӣ, фарҳангӣ ва иҷтимоӣ мебошад, ба манбаи муътабар ва сарчашмаи пурфайзи маърифатию пажӯҳишӣ табдил ёфтааст. Ин нашрияи 90-сола, ки бо чопи нахустин шумораи худ ба унвони «Дониш-биниш» («Раҳбари дониш») дар соли 1927 ҳадафи худро иборат аз табъу нашри асарҳои асили адабиёти миллӣ ва ҷаҳонӣ ва баррасии муҳимтарин масъалаҳои таърихию маърифатӣ эълон намуда буд, то имрӯз ба идомаи ин рисолати бомуваффақият талош мекунад. Ба гуфти мутахассисон он таъриху ташаккули давраи адабиёти муосири тоҷикиро фаро мегирад.