Ғолибони озмуни ҷумҳуриявии «Китоби сол-2017» муайян гардиданд

Вазорати фарҳанги Ҷумҳурии Тоҷикистон аз озмуни ҷумҳуриявии «Китоби сол-2017» натиҷагирӣ кард. Зимни баргузории як ҷаласа роҳбарияти вазорат ғолибонро бо дипломҳои озмун қадрдонӣ намуданд.

Ҳадаф аз баргузории озмун дарёфти беҳтарин асарҳои бадеии муосири тоҷик аст, ки ҷавобгӯи меъёрҳои санъати сухан ва забони адабӣ буда, мазмуну мўҳтавои онҳо мавзўъҳои худшиносии миллӣ, арҷгузорӣ ба рукнҳои давлатдорӣ, таҳкими сулҳу субот ва амнияти кишварро дар бар гирифта, ба завқи алоқамандони каломи бадеъ созгор афтад; дар дили хонанда оташи меҳру муҳаббат ва садоқат ба Ватан, обу хоки кишварро барафрӯзанд; ҳамчунин бо ороишоти хуб муқовабандӣ шуда бошанд.

Дар озмун муаллифони асарҳои бадеии тоҷик, ки китобҳояшон тайи соли 2017 дар муассисаҳои нашриявии Ҷумҳурии Тоҷикистон нашр шудааст, иштирок намуданд.