Намоиш таҳти унвони «Симои зан-модар дар эҷодиёти рассомони Тоҷикистон»

Дар Осорхонаи миллии Тоҷикистон намоиши асарҳои санъати тасвирӣ зери унвони «Симои зан-модар дар эҷодиёти рассомони Тоҷикистон» идома дорад. Дар ин чорабинӣ асосан мусаввараҳое ба намоиш гузошта шудаанд, ки ба зан-модари тоҷик бахшида шудаанд.

Асарҳои санъати тасвирӣ, ки дар онҳо симои зан-модар аён мегардад, солҳои гуногун офарида шудаанд. Рассомон ба ғайр аз инъикоси рисолати асосии модар, ки он ҳам тарбияи фарзанд аст, инчунин нақши занро дар рушд ва инкишофи бахшу соҳаҳои гуногун нишон додаанд. Тамошобинону дӯстдорони асарҳои санъати тасвирӣ метавонанд то рӯзи 20-уми март аз намоиши «Симои зан-модар дар эҷодиёти рассомони Тоҷикистон» дидан кунанд.