Боздиди намояндагони ЮНЕСКО аз Осорхонаи миллии Тоҷикистон

  • ЮНЕСКО HD

Аз барқарории ҳамкориҳои Ҷумҳурии Тоҷикистон бо ташкилоти байналмилалии фарҳангии ЮНЕСКО 25-сол пур мегардад. Дар ин давра бо назардошти заминаҳои мусоид ва потенсиали бойи таърихӣ мавзеву маконҳои зиёди кишвари мо шомили феҳристи ин созмони бонуфуз гашта, дар ин баробар бархе аз анъана ва ҳунарҳои тоҷикона ба мероси фарҳангии ҷаҳонӣ шомил гардиданд. Зимнан барои солҳои баъдӣ низ нақшаву ҳадафҳои ҳамкорӣ зиёд аст ва аллакай гурӯҳҳои корӣ ҷиҳати амалисозии ин тадбирҳо ва омӯзиши ҳарчи бештари маконҳои таърихии Тоҷикистону суннатҳои тоҷикона корбарӣ доранд. Ба муносибати 25 солагии ҳамкориҳои Тоҷикистону ЮНЕСКО намояндагони ҳарду ҷониб, имрӯз аз Осорхонаи миллӣ дидан карданд.

Шурӯъ аз давраҳои пайдоиши инсон то ба аввалин давлатдории тоҷикону гиру дорҳои таърихӣ то рушду нумуи кишвари соҳбистиқлоли Тоҷикистон, аз ҳамагии ин раванд, ки гӯшаҳои Осорхонаи миллӣ бозгӯӣ мекунад, меҳмонон дидан карда, бори дигар ба суннату арзишҳои миллӣ баҳои баланд доданд. Таъкид шуд, ки ин анаънаву суннатҳо моли як ду сол не, балки таърихаш ба умқи қарнҳо решпайвандӣ дорад ва имрӯз бо эълон шудани Соли рушди сайёҳӣ ва ҳунарҳои мардумӣ бештар равнақу ривоҷ хоҳад ёфт. Аз ин ҳисоб бешубҳа феҳристи мероси шифоҳии ғайримодии инсоният ва мероси умумиҷаҳонии ЮНЕСКО боз ғанитар хоҳад гашт.