Омодагиҳо бобати таҷлили сазовор аз ҷашни байналмилалии Наврўз дар мамлакат оғоз гардидаву корхонаву ташкилот ҷиҳати ҷашнгирӣ аз он тадбирҳои муҳими фарҳангиву оммавиро амалӣ менамоянд.
Душанбе, 3 феврал. (ТВ "Сафина", З. Каримов) Зимнан дар асоси дастури Ҳукумати Ҷумҳурии Тоҷикистон, Корхонаи воҳиди давлатии таъминот ва савдои «Китоб»-и Вазорати фарҳанги Тоҷикистон имрўз дар кўдакистони рақами 20-и шаҳри Душанбе маҳфили фарҳангӣ доир намуд, ки дар он адибон ва шоироне, ки эҷодиёташон ба кўдакон бахшида шудааст, ширкат варзида, бо хурдсолон доир ба аҳамияти китоб дар тарбияи маънавии кўдакон ва ба ин васила тақвият бахшидани ҳисси ватандўстиву меҳанпарастӣ, арҷ гузоштан ба муқаддасоти миллӣ сўҳбат оростанд.
Тавре директори Корхонаи воҳиди давлатии таъминот ва савдои «Китоб»-и Вазорати фарҳанги Тоҷикистон Саидҷаъфар Сафаров зимни суханронӣ иттилоъ дод, ин тадбир дар муассисаҳои фарҳангиву таълимӣ ва томактабӣ аз ҷониби корхона бо ҷалби чеҳраҳои саршиноси фарҳангӣ ва шоирону адибон пайваста доир шуда, танњо дар ҳамин муассиса маротибаи сеюм аст, ки чунин чорабиниҳо баргузор карда мешавад. Ин навбат аз љониби корхонаи мазкур ба тарбиятгирандагони кўдакистони «Лола» қариб 40 номгўи адабиёти тозанашри бачагона тақдим гардид. Барои иҷрои шеъру сурудҳои баландмазмун дар васфи ватан, модар, муқаддасоти давлатдорӣ, тараннуми зебогиҳои диёр ва ғайраҳо ба хурдсолон китобҳо ҳадя карда шуд, ки ин ғизои маънавӣ кўдаконро болидахотир сохт.
