Табдили низоми маъмурии идоракунии иқтисод ба низоми бозорӣ дар интиҳои асри 20 ва ибтидои қарни навин яке аз омилҳои асосии ба мушкилоти зиёд дучор шудани иқтисодиёти Тоҷикистон дар солҳои аввали мустақилият
арзёбӣ мешавад.
Душанбе, 25 ноябр. (ТВ "Сафина", М. Зокиров) - Олимони соҳа итминон доранд, ки дар шароити замони нав, ки такя ба илму техникаи муосир мекунад, тарбияи кадрҳои замонавии соҳаи иқтисоду молия метавонад омили асосии пешрафти иқтисоди воқеии кишвар бошад. Зеро дар мамлакат захираҳои фаровони молиявӣ мавҷуд аст ва барои истифодаи мақсадноки он ҳам захираҳои зеҳнӣ кофист.
Масоили вобаста ба тайёр кардани кадрҳои баландихтисоси соҳаи менеҷмент дар конфронси илмӣ-амалии устодони Донишкадаи молияи кишвар баррасӣ карда шуд. Таъкид гардид, ки бо назардошти тадриҷан боло рафтани иқтисоди миллӣ дар Тоҷикистон зарурати омода сохтани чунин кадрҳо аз ҳар вақти дигар муҳимтар аст. Олимони бахши молиёт, паҳлўҳои алоҳидаи соҳаро мавриди баррасии амиқ қарор дода, ҳамзамон роҳҳои илман асосноки таъмини рушди иқтисодро муҳокима карданд.
Ба гуфти онҳо яке аз сабабҳои асосии муфлис гардидани баъзе аз корхонаҳои дар гузашта фаъол, идораи нодурусти захираҳои иқтисодӣ ва ҳам интихоби кадрҳои нолоиқ дар зинаҳои истеҳсолот мебошад. Мавқеи аввал додан ба кадрҳои мененҷерӣ дар муассисоти истеҳсолӣ, ин проблемаро метавонад дар дилхоҳ корхона ба пуррагӣ бартараф созад.
Иштирокчиёни конфронс ҳамчунин оид ба масъалаҳои такмили менеҷменти молиявӣ, хусусиятҳои молиявии фаъолияти соҳибкорӣ ва амсоли инҳо фикру андешаҳои худро баён доштанд.
