Нахустнамоиши спектакли «Ҷашн» дар Театри Лоҳутӣ

  • Театри Лоҳутӣ HD

 

Ҳафтаи гузашта дар Театри давлатии академӣ-драмавии ба номи Абулқосим Лоҳутӣ якбора ду намоишномаи нав тавлид шуд. Аҳли ҳунари ин театр спектаклҳоии «Обу оташ» ва «Ҷашн»-ро ду рӯз пайи ҳам ба саҳна гузоштанд. Намоишномаи «Ҷашн», ки дар жанри мазҳака таҳия шудааст, аз ҷониби коргардони ҷавони Театри академӣ-драмавии ба номи Абулқосим Лоҳутӣ Баҳром Қурбонзода ба саҳна гузошта шуд.

Ҳунарпешаҳои шинохта Асалбек Назриев ва Саодат Азизова нақшҳои марказии ин асарро бозӣ мекунанд. Дар қатори ин чеҳраҳои маъруф ҳунарпешаҳои ҷавон Сӯҳроб Назарзода ва Савлатмо Ақназарова низ нақшҳои асосиро офариданд.

Асари «Ҷашн» ба қалами драманависи рус Антон Павлович Чехов тааллуқ дошта, аз ҷониби Ҷумъа Қуддус тарҷума шудааст.

Шиносоӣ бо рафти корҳои сохтмонӣ дар Масҷиди марказии ҷомеъи шаҳри Душанбе

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе Рустами Эмомалӣ рафти корҳои сохтмонӣ дар Масҷиди марказии ҷомеъи шаҳри Душанбе шинос шуданд.

Дар асоси лоиҳа, ки бо назардошти унсурҳои бостонию муосири санъати меъмории тоҷикӣ ва ҷаҳонӣ омода шудааст, масҷид аз 4 манораи баландиаш 75 метра ва 24 гумбази хурду калон иборат хоҳад буд.

Ин масҷиди бузург дар майдони 12 гектар замин ҷойгир шуда, аз биною мавзеъҳои намозхонӣ, китобхона, осорхона, толорҳои маҷлисӣ ва қабули меҳмонон барои мулоқоту гуфтушунидҳо иборат хоҳад буд. Масоҳати зери бинои масҷид бошад, 3 гектарро ташкил медиҳад.

Айни ҳол дар ин иншооти бузург беш аз 350 нафар коргарон фаъолият доранд.  Корҳои сохтмону васлгарӣ аз ҷониби ширкатҳои ватанӣ — пудратчии асосӣ Ҷамъияти Саҳҳомии Кушодаи “СТС — Иншоот” ва Ҷамъияти Саҳҳомии Кушодаи “Сомон таҷҳизот” анҷом ёфта, дар давраи бунёди масҷид беш аз 700 нафар бинокори маҳаллӣ бо кор ва маоши хуб таъмин шуданд.

Зимни шиносоӣ бо рафти корҳои сохтмонӣ Сарвари давлат таваҷҷуҳи бинокоронро бештар ба иҷрои босифати корҳои сабзу хуррамгардонӣ ва вусъати корҳои ободонию кабудизоркунии атроф ва ҳудуди Масҷиди марказии ҷомеъи шаҳри Душанбе ҷалб намуданд. Дар ин ҷо бо супориши Пешвои миллат муҳтарам Эмомалӣ Раҳмон беш аз 1000 адад дарахтони зебои гулкунандаи ороишию нодир, инчунин гулу буттаҳои хушбуй шинонида мешавад, ки ба ин мавзеъ ҳусн мебахшад ва ҳам ба саломатии одамон фоидаовар аст.

Атрофи масҷид бо манораҳои боҳашамат, сутунҳои зебои мунаққашу мусаввар ва бисёр унсурҳои дигари фарҳангӣ оро дода мешавад.

Бо маслиҳатҳои мушаххас ва завқи баланди зебоипарастии Президенти мамлакат муҳтарам Эмомалӣ Раҳмон дар лоиҳаи сохтмони ин иншооти бузург аксаран тарзу усулҳои меъмории бостонии тоҷикӣ, нақшу нигори деворҳо, гумбазҳо, сутунҳо ва тамоми ороишоти дохилу атрофи масҷид ба эътибор гирифта шудааст. Ин на танҳо як масҷид, балки як маркази бузурги фарҳангу таърихи исломӣ хоҳад буд ва толорҳои он тавре бунёд меёбанд, ки дар онҳо тамоми намуди чорабиниҳои илмию фарҳангӣ, семинару конфронс ва ҳамоишҳои сатҳу зинаҳои гуногун гузаронда мешаванд.

Ба андешаи Президенти мамлакат иншоот, ки бо тарҳи худ дар Осиёи Марказӣ нодир мебошад, бояд садсолаҳо ба насли оянда хизмат расонад.

Сарвари давлат муҳтарам Эмомалӣ Раҳмон баъди шиносоии пурра бо рафти корҳо бори дигар ба мутахассисон барои вусъати корҳои сохтмону ороишии босифати бино ва ба талаботи меъёрҳои ҷаҳонӣ мутобиқ кардани он дастуру ҳидоятҳои мушаххас доданд.

Намоиши рассомӣ дар шаҳри Хуҷанд

Дар маркази маъмурии вилояти Суғд-шаҳри Хуҷанд намоиши асарҳои рассом Холиқ Давлатов баргузор шуд. Ӯ беш аз 30 сол мешавад, ки дар ин ҷодаи ҳунар фаъолият дорад ва дар офаридаҳояш зебогиҳои диёр ва фарҳангу анъанаҳои миллиро таҷассум мекунад.

Бояд гуфт, ки санъати рассомӣ  барои муаррифии миллату давлат ба ҷаҳониён нақши барҷаста дорад. Махсусан ривоҷи бештари ин навъи санъат ва баргузории намоишгоҳҳои хосаи асарҳои рассомӣ дар Соли рушди сайёҳӣ ва ҳунарҳои мардумӣ ба нафъи кор арзёбӣ мегардад.

Нахустнамоиши «Обу оташ» дар Театри Лоҳутӣ

Театри давлатии академӣ-драмавии ба номи Абулқосим Лоҳутӣ бо нахустнамоиши спектакли «Обу оташ» дарҳои худро ба рӯйи  тамошобинону дӯстдорони саҳнаҳои театрӣ боз намуд. Ба тамошои намоишномаи нав ҳунармандону коргардонҳо, шоирону нависандагон ва дигар алоқамандону  роғибони санъату ҳунар ҳозир шуданд.

Коргардон-таҳиягар, ҳунарманди шинохта Шералӣ Абдулқайсов спектаклро аз рӯи асари драматург Мансур Сурӯш ба саҳна гузоштааст.  «Обу оташ» дар бораи  зарурияти ҳамзистии осоишта дар ҷомеаи демократии дунявӣ қисса мекунад ва аз мавзӯъҳои доғи рӯз маҳсуб меёбад.

Намоиши ҳунарҳои мардумӣ дар ноҳияи Тоҷикобод

Бахшида ба эълон гардидани соли 2018 ҳамчун Соли рушди сайёҳӣ ва ҳунарҳои мардумӣ дар ноҳияи Тоҷикобод намоиши ҳунарҳои мардумӣ доир гардид. Дар ин чорабинӣ аз тарафи ҳунармандони деҳаҳои ноҳия маҳсули эҷодии ҳунармандон,  иборат аз ҳунари нақшдӯзӣ, чакандӯзӣ гулдӯзию зардӯзӣ, ҳунари қаннодӣ ба маърази тамошо гузошта шуд.

Дар қисмати дувуми чорабинӣ дар мавзӯи «Ҳунарҳои мардумӣ — рукни муҳимтарини фарҳанги миллӣ» ҳамоиш баргузор гардид. Ширкатдорони ҳамоиш доир ба роҳу воситаҳои таъмини рушду пешрафти соҳаи сайёҳӣ ва ҳунарҳои мардумӣ ибрози назар карданд.