Оғози сафари расмӣ дар Шоҳигарии Ҳошимии Урдун

9 декабри соли 2017 Асосгузори сулҳу ваҳдати миллӣ — Пешвои миллат Президенти Ҷумҳурии Тоҷикистон муҳтарам Эмомалӣ Раҳмон бо сафари расмӣ ба шаҳри Аммон пойтахти Шоҳигарии Ҳошимии Урдун ворид шуданд.

Дар фурудгоҳи байналмилалии ба номи Шоҳзода Алия, ки ба хотири ташрифи Сарвари давлати Тоҷикистон бо парчамҳои ҳар ду давлат идона ороста шуда буд, Президенти мамлакат муҳтарам Эмомалӣ Раҳмонро намояндагони воломақоми Шоҳигарии Ҳошимии Урдун самимона истиқбол гирифтанд.

Сафари расмӣ ба Шоҳигарии Ҳошимии Урдун

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати анҷоми сафари расмӣ ба Шоҳигарии Ҳошимии Урдун сафар карданд.

Дар фурудгоҳи байналмилалии Душанбе Президенти Ҷумҳурии Тоҷикистон Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон Эмомалӣ Раҳмонро вазири корҳои хориҷӣ, ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ, вазирони рушди иқтисод ва савдо, маориф ва илм, молия, кишоварзӣ, фарҳанг, раиси Кумитаи давлатии сармоягузорӣ ва идораи амволи давлатӣ, раиси Палатаи савдо ва саноат ва дигар шахсони расмӣ ҳамроҳӣ мекунанд.

Аз фаъолияти Мактаби санъати бачагонаи шаҳри Хоруғ 60 сол пур шуд

Мактаби санъати бачагонаи шаҳри Хоруғ ба номи Қ. Ноёбшоев 60-сола шуд. Дар тӯли ин солҳо онро даҳҳо толибилм дар бахшҳои гуногуни мусиқӣ хатм намуда, имрӯзҳо дар фазои санъати вилоят ҳунарнамоӣ доранд.

Мактаб соли 1957 ташкил гардида буд. Дар соли аввали фаъолият дар он 50 нафар толибилм ба таҳсил фаро гирифта шуданд. Дар соли 2012 бошад, теъдоди хонандагон ба 178 нафар расонида шуд.

Дар даврони соҳибистқилолии ватан, ки фарҳанги миллӣ дорои мақоми воло гардида, барои омӯзиши санъату мусиқии миллӣ шароитҳои нав муҳайё гардиданд, ба фаъолияти ин мактаб низ таваҷҷуҳи хоса зоҳир гардид. Ҳамин аст, ки толибилмони он дар озмунҳои сатҳи вилоятиву ҷумҳуриявӣ фаъолона иштирок намуда, борҳо сазовори ҷойҳои арзанда гардидаанд.

Фестивали филмҳои Полша дар Тоҷикистон

Маротибаи 5-ум аст, ки дар доираи ҳамкориҳои дуҷонибаи синамогарони Тоҷикистону Полша намоиши филмҳои ин кишвар дар Тоҷикистон баргузор мегардад. Дар Фестивали навбатии Филмҳои Полша-“Висла” акнун 10 филми синамогарони ин давлат манзури тамошобинони тоҷик гардонида мешавад. Мавриди зикр аст, ки филмҳои пешниҳодгардида дар жанрҳои мухталиф таҳия шудаанд.

Филмҳои мазкур характери тарбиявӣ дошта, дар онҳо хислатҳои неку бади одамӣ инъикос ёфтааст. Тазаккур бояд дод, ки Фестивали «Висла» чанд рӯзи дигар идома меёбад ва тамошобинони тоҷик имкон доранд бо навтарин офаридаҳои синамогарони ин кишвар ошно шаванд.

Беҳтар шудани фаъолияти Китобхонаи марказии шаҳри Конибодом

Китобхонаи марказии шаҳри Конибодом ба номи Абдураҳмони Ҷомӣ чанде пеш бо иқдоми мақомоти иҷроияи ҳокимияти давлатии шаҳр ба Қасри фарҳанги «Мошинсозон» ва Китобхонаи марказии бачагона ба маркази шаҳр кӯчонида шуданд.

Пас аз чунин тадбирандешӣ сатҳу сифати нигаҳдории китобҳо дар китобхона беҳтар гардид ва шумораи аъзоёни он афзоиш ёфтааст. Дар шаҳри Конибодом 29 китобхона, аз ҷумла 8 китобхонаи шаҳрӣ, 2 китобхонаи бачагона ва 19 китобхонаи деҳот иборат мебошад.

Захираи умумии китобҳои онҳо беш аз 151 ҳазору 300 ададро ташкил медиҳад. Теъдоди умумии хонандагон бошад, ба 6 ҳазору 898 нафар баробар аст.