Мулоқот бо Президенти Ҷумҳурии Исломии Покистон Мамнун Ҳусейн

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Ашқободи Туркманистон дар ҳошияи маросими ифтитоҳи 5-умин бозиҳои осиёӣ ҳамчунин бо Президенти Ҷумҳурии Исломии Покистон Мамнун Ҳусейн мулоқот намуданд.

Мо аз раванди тамосҳои сиёсии Тоҷикистон ва Покистон, аз ҷумла, дар сатҳи олӣ изҳори қаноатманди менамоем, таъкид доштанд Сарвари давлат муҳтарам Эмомалӣ Раҳмон ва афзуданд, ки сатҳи имрӯзаи эътимоду ҳамдастии ду давлат барои таҳкими бештари равобити ҳасана ва ҳамкориҳои гуногунҷанбаи мо мусоидат хоҳад кард.

Азму ниятҳои муштарак барои дар оянда афзун намудани нишондиҳандаҳои гардиши молу маҳсулот байни ду давлат ва тақвияти кори Шӯрои муштараки соҳибкорони Ҷумҳурии Тоҷикистон ва Ҷумҳурии Исломии Покистон, Гуруҳи муштарак оид ба энергетика ва инфрасохтор таъкид карда шуд.

Ҳарду ҷониб барои рушду тавсеаи ҳамкориҳои байнидавлатӣ дар соҳаҳои тиҷорату иқтисод, роҳу нақлиёт, энергетика бунёди нерӯгоҳҳои барқи обии хурду миёна ва хатҳои интиқоли барқ, саноати коркарди маъданиҳои куҳӣ, кишоварзӣ, амнияту мудофиа ва фарҳанг омодагию ҳавасмандии зиёд зоҳир намуданд.

Мулоқот бо Президенти Туркманистон Гурбонгулӣ Бердимуҳаммадов

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Ашқободи Туркманистон дар ҳошияи маросими ифтитоҳи 5-умин бозиҳои осиёӣ бо Президенти Туркманистон Гурбонгулӣ Бердимуҳаммадов мулоқоти дуҷониба намуданд.

Пешвои миллат муҳтарам Эмомалӣ Раҳмон дар ибтидои мулоқот ба Президенти Туркманистон Гурбонгулӣ Бердимуҳаммадов барои даъвати иштирок дар маросими ифтитоҳи 5-умин бозиҳои осиёсӣ изҳори сипосу миннатдорӣ намуда, тамоми мардуми туркманро ба ин рӯйдодҳи муҳими варзишӣ табрик гуфтанд.

Таъкид гардид, ки ингуна чорабинии муҳташами варзишӣ дар Осиёи Марказӣ бори нахуст баргузор мегардад ва умед аст, ки он ба рушди соҳаи варзиш ва оммавияти бештари он дар минтақа такони ҷиддӣ хоҳад бахшид.

Муколамаҳои пайвастаи ду кишвар дар сатҳи олӣ дар рушди ҳамкориҳои дӯстонаи миёни Тоҷикистону Туркманистон муҳим арзёбӣ гардид.

Зикр шуд, ки Тоҷикистону Туркманистон дар арсаи байналмилалӣ ҳамкориҳои хубу дӯстона доранд ва кишварҳо омодаанд, то бо истифода аз фурсату имконоти мавҷуда барои ҳалли мушкилоти минтақавию ҷаҳонӣ муносибатҳоро дар ин самт боз ҳам тақвият бахшанд.

Эмомалӣ Раҳмон ва Гурбонгулӣ Бердимуҳамадов аз рушди ҳамкориҳои иқтисодӣ, ки дар ин самт кишварҳо имконоти зиёд доранд, ёдовар шуда, баргузории комиссияҳои байниҳукуматиро дар ин ҷода муҳим арзёбӣ намуданд.

Таъкид шуд, ки ҷиҳатҳои асосии рушди ҳамкориҳои иқтисодии миёни ду кишварро соҳахои энергетика, ҳамлу нақл, кишоварзӣ ва соҳаи турзим дар бар мегирад.

Ҷонибҳо иброз доштанд, ки Тоҷикистону Туркманистон имрӯз имконот ва лоиҳаҳои зиёдеро барои рушди ҳамкориҳо дар соҳаи энергетика доранд.

Дар ҳамин замина аз сохтмони хати лӯлаи гази Туркманистон – Ӯзбекистон – Тоҷикистон – Қирғизистон – Чин ва лоиҳаи бунёди роҳи оҳани Туркманистон – Афғонистон – Тоҷикистон ёдоварӣ гардид.

Дар мулоқоти дуҷонибаи Эмомалӣ Раҳмон ва Гурбонгулӣ Бердимуҳаммадов рушди ҳамкориҳои Тоҷикистону Туркманистон дар дигар бахшҳои муҳими хоҷагии халқ ҳам мавриди баррасӣ қарор гирифт.

Сафари корӣ ба Туркманистон

Имрӯз Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати анҷоми сафари корӣ ба Туркманистон сафар карданд.

Дар фурудгоҳи байналмилалии Душанбе Президенти Ҷумҳурии Тоҷикистон Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон Эмомалӣ Раҳмонро Вазири корҳои хориҷӣ, Ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ, Раиси Кумитаи давлатии сармоягузорӣ ва идораи амволи давлатӣ, Раиси Кумитаи кор бо ҷавонон ва варзиш ва дигар шахсони расмӣ ҳамроҳӣ мекунанд.

Даври дуюми озмуни ҷумҳуриявӣ таҳти унвони «Ҳамнишине беҳ аз китоб махоҳ» дар ноҳияи Рашт

Дар ноҳияи Рашт даври дуюми озмуни ҷумҳуриявии «Ҳамнишине беҳ аз китоб махоҳ» бо иштироки хонандагони муассисаҳои таълимӣ ва дӯстдорони китоб баргузор гардид.

Дар толори Китобхонаи марказии ноҳияи Рашт аз рӯйи шартҳои озмун хонандагон маҳорату малакаи китобхонии худро нишон доданд. Тибқи шартҳои озмун байни хонандагон саволу ҷавоб аз рӯйи китобҳои хондашуда ва мӯҳтавои онҳо сурат гирифт.

Баргузор гардидани чунин озмунҳо дар баланд бардоштани маърифатнокии хонандагон ва ҷалби насли наврас ба мутолиаи китоб мусоидат менамояд.

Ифтитоҳи мавсими 77-уми театрӣ бо балети «Зол ва Рудоба»

16 сентябри соли 2017 соати 18:00 дар Театри давлатии академии опера ва балети Тоҷикистон ба номи С. Айнӣ ифтитоҳи 77-ум мавсими театрӣ бо намоиши балети «Зол ва Рудоба» баргузор мегардад.

Ба иттилои Вазорати фарҳанги Ҷумҳурии Тоҷикистон дар маросими ифтитоҳи  мавсими 77-уми театрӣ супоридани ҷоизаи мусиқии касбӣ ба номи Борбад ба барандагони ҷоиза низ дар назар аст.

Боиси зикр аст, ки нахустнамоиши балети «Зол ва Рудоба», ки аввалин балети тоҷикӣ аст, моҳи ноябри соли 2016 ба ифтихори 25-солагии Истиқлолияти Ҷумҳурии Тоҷикистон баргузор гардида буд. Намоиш чун падидаи нодири фарҳангӣ қалби ҳазорон мухлисони санъати балетро тасхир кардааст.

«Зол ва Рудоба» аз рӯи асари безаволи «Шоҳнома»-и Абулқосим Фирдавсӣ таҳия гардидааст. Муаллифи мусиқӣ шодравон композитори маъруфи тоҷик Шуҳрат Ашӯров мебошад.

Асар аз ҷониби лауреати озмунҳои байналхалқӣ Мария Левитская ба саҳна гузошта шуда, дирижёри он Далер Тиллоев аст.