Китоби «Мероси фарҳанги ғайримоддӣ дар Тоҷикистон» нашр шуд

Китоби “Мероси фарҳанги ғайримоддӣ дар Тоҷикистон” яке аз тадбирҳои ҳифзу густариш ва муаррифии мероси фарҳанги ғайримоддии тоҷикон мебошад. Ба иттилои Вазорати фарҳанги Ҷумҳурии Тоҷикистон ин китоб дар натиҷаи ҳамкорӣ бо Маркази мероси фарҳанги ғайримоддии кишварҳои Осиё ва Уқёнуси Ором (ICHCAP) таҳия ва чоп шудааст.

Дар китоб беш аз 300 акси унсурҳои мероси фарҳанги ғайримоддӣ ҷой гирифтаанд. Расмҳои дар китоб дарҷшударо аскбардорони ҳирфаӣ ба монанди Заур Дахте ва кормандони худи Пажўҳишгоҳ ҳангоми сафарҳои хидматӣ акс бардоштаанд.

Китоб аз ҳафт бахш иборат буда, ҳар як бахш аз мақолаҳои самти муайян таркиб ёфтааст. Китоб дар маҷмӯъ фарогири 115 мақолаи тасвирию тавсифии унсурҳои мероси фарҳанги ғайримодди халқи тоҷик мебошад.

Китоби “Мероси фарҳанги ғайримоддӣ дар Тоҷикистон” ба забони тоҷикӣ бо теъдоди 700 адад ва бо забони англисӣ ба миқдори 500 адад нашр шудааст. Китоб барои муаррифӣ ва таблиғи мероси фарҳанги ғайримоддии халқи тоҷик ба ҷаҳониён ва таҳкими ҳувияти миллӣ воситаи муҳим ба шумор рафта, он ба муносибати ҷашни «20-солагии Рўзи Ваҳдати миллӣ» бахшида шудааст.

Барномаи консертии Ҷаннати 12-сола дар котиботи СҲШ дар Пекин

Моҳи декабри соли 2017 дар қароргоҳи Созмони ҳамкориҳои Шанхай дар шаҳри Пекин консерти камеравии донишҷӯи Коллеҷи санъати ба номи А. Бобоқулови шаҳри Душанбе Ҷаннат Ҳусейнзодаи 12-сола баргузор гардид.

Ба иттилои Вазорати фарҳанги Ҷумҳурии Тоҷикистон консерти мазкур дар доираи силсилаи «Нӯҳ нотаи сеҳрофар» бо ибтикори Котиботи СҲШ ва Сафорати Ҷумҳурии Тоҷикистон дар Ҷумҳурии халқии Хитой гузаронида шуд. Барномаи консертӣ, ки Ҷаннат Ҳусейнзода ва бо устодаш махсус омода карда буданд, асарҳои В.А.Мотсарт, Ф.Менделсон, Я.Сибелиус, Ф.Шопен, Готтшалк ва чанд асарҳои лирикии композиторони муосири хитоиро дар бар мегирфт. Мусиқии худи Ҷаннат таҳти унвони «Баҳор» ба барномаи консертӣ ҳусни нав зам намуд.

Боиси зикр аст, ки Ҳусейнзода Ҷаннат Музаффар донишҷӯи курси якуми шӯъба ва ихтисоси «Фортепиано»- и Муассисаи давлатии «Коллеҷи санъати ш.Душанбе ба номи А.Бобоқулов» мебошад, ва аз панҷсолагӣ бо омӯзиши мусиқӣ машғул аст. Дар навохтани пианино ва скрипка маҳорати хос дошта, қобилияти дирижерӣ ва эҷоди асарҳои мусиқӣ ҳам дорад.

Ӯ иштирокчии чандин озмун ва ҷашнвораҳои байналмиллалӣ дар кишварҳои гуногун аз қабили Ӯзбекистон, Миср, Фаронса, лауреат ва барандаи медали тиллоии «The Golden Festival International» (Париж, моҳи маи 2015) мебошад.

Бонувони Тоҷикобод ба атласу адрасбофӣ рӯ оварданд.

Дар Паёми имсолаи Пешвои миллат эълон гардидани Соли 2018 ҳамчун «Соли рушди сайёҳӣ ва ҳунарҳои мардумӣ» аз ҷониби аҳолӣ хуш пазируфта шуд. Бо ин мақсад дар назди Маркази таълими калонсолон ва Муассисаи давлатии таълимии «Литсейи касбии техникии ноҳияи Тоҷикобод» курсҳои омӯзиши қолинбофӣ ва атласу адрасбофӣ ташкил карда шуда, 20 нафарӣ бонувони маҳаллӣ  ба омӯзиши касбҳои мазкур фаро гирифта шуданд.

Воқеан ҳам, таъсиси чунин марказҳои фарҳангию ҳунармандӣ ба эҳёи ҳунарҳои мардумӣ ва тарғиби фарҳанги ниёгон боис гардида, ба  рушди сайёҳӣ дар ин гӯшаи кӯҳистони кишвар  мусоидат менамояд.

Беҳтарин оилаҳои ҷавони Тоҷикистон муайян шуданд

Озмуни ҷумҳуриявии «Беҳтарин оилаи ҷавон» дар арафаи Соли нави мелодӣ дар толори Донишгоҳи техникии Тоҷикистон ба номи академик М. Осимӣ ҷамъбаст гардид. Дар ин бора АМИТ «Ховар» иттилоъ нашр кардааст.

Озмун дар се давр аз рӯи 6 шарт-муаррифии оила, бахшҳои рӯзгордорӣ, маънавӣ ва андарзӣ, фарҳангӣ-фароғатӣ, намоиши ҳунарҳои дастӣ ва бахши ҳаҷвӣ доир гардид.

Ҳайати ҳакамон маҳорату малака ва истеъдоди ҳар як оилаи ҷавонро баҳогузорӣ намуда, ҷойи аввалро ба беҳтарин оилаи ҷавон аз ВМКБ- Ғолиб Ниятбеков ва ҳамсараш Гуландом Назармамадова, ҷойи дуюмро ба оилаи Носирҷон Маъмурзода ва ҳамсараш Ҳангомаи Исмат аз вилояти Хатлон ва ҷойи сеюмро ба оилаи Оятулло Муродзода ва ҳамсараш Шаҳло Ғаффорова аз ноҳияи Варзоб муносиб донистанд. Ғолибони озмун ва иштирокчиён бо дипломҳо ва туҳфаҳои хотиравӣ қадрдонӣ гардиданд.

Намоиши корҳои эҷодии донишҷӯёни Коллеҷи ҷумҳуриявии рассомии ба номи Мирзораҳмат Олимов

Дар Коллеҷи ҷумҳуриявии рассомии ба номи Мирзораҳмат Олимов ба ифтихори фарорасии Cоли нави милодии 2018 чорабинии фарҳангӣ баргузор гардид. Дар ин бора Вазорати фарҳанги Ҷумҳурии Тоҷикистон иттилоъ нашр намудааст.

Вазири фарҳанг Шамсиддин Орумбекзода омӯзгори коллеҷ У. Аҳмадовро барои иштирок дар озмун ва сазовор гаштани ӯ ба унвони «Омӯзгори беҳтарини сол» ва донишҷӯи коллеҷ М. Эшқувватоваро барои иштирок дар озмуни «Донишҷӯи беҳтарини сол» табрик гуфта, ба онҳо мукофоти пулӣ тақдим намуд.

Дар ин чорабинӣ ба ифтихори Паёми Асосгузори сулҳу ваҳдати миллӣ – Пешвои миллат, Президенти Чумҳурии Тоҷикистон, муҳтарам Эмомалӣ Раҳмон ва Соли туризм ва ҳунарҳои мардумӣ эълон гардидани соли 2018 донишҷӯёни коллеҷ корҳои эҷодии худро дар мавзуъҳои «Манзараҳои кишвари азизамон», «Туризм», «Ҳунарҳои мардумӣ» «Оилаи солим» ва ғайра ба маърази тамошо гузоштаанд.