Ифтитоҳи дидбонгоҳи нави сарҳадии «Сомон» дар ноҳияи Ҷайҳун

Дар идомаи сафари корӣ ба ноҳияи Ҷайҳуни вилояти Хатлон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар расми мавриди баҳрабардорӣ қарор додани дидбонгоҳи нави сарҳадии «Сомон», ки зертобеи Отряди сарҳадии «Панҷ» ба ҳисоб меравад, иштирок намуданд.

Иншооти нави дидбонгоҳи сарҳадии «Сомон» бо маблағгузории Ҷамъияти саҳомии кушодаи «Сементи тоҷик» дар масоҳати 2 гектар бунёд гардида, дар ин ҷо барои афсарону сарбозони Қушунҳои сарҳадии Кумитаи давлатии амнияти миллии Ҷумҳурии Тоҷикистон, ки ҳимояи ҳамаҷонибаи марзи давлатиро бо масъулияти баланд ба уҳда доранд, шароити муосири хизматӣ ва будубош фароҳам оварда шудааст.

Дар рафти боздид аз иншооти навбунёд, аз ҷумла хобгоҳи сарбозон, ки мутобиқ ба меъёрҳои хизмати ҳарбӣ сохта шудааст, Президенти мамлакат, Сарфармондеҳи олии Қувваҳои мусаллаҳи Ҷумҳурии Тоҷикистон муҳтарам Эмомалӣ Раҳмон ба сифати корҳои анҷомёфта, баҳои баланд дода, вобаста ба имкониятҳои мавҷуда барои таълиму тарбияи сарбозон, бахусус наваскарон, баланд бардоштани ҳисси ифтихори миллӣ ва рӯҳану ҷисман омода намудани онҳо ҷиҳати ҳифзи марзу буми Ватан ба масъулони дахлдор дастуру супоришҳои мушаххас доданд.

Дар бинои асосии дидбонгоҳи сарҳадии «Сомон» ҳамчунин утоқҳои корӣ барои афсарон, хонаи хизмати сарҳадӣ, синфхонаҳои таълимӣ ва компютерӣ, китобхона, ҷой барои истироҳату фароғат, хизмати маишӣ ва ғайра бунёд шуда, дар ин ҷо пеш аз ҳама барои назорат ва ҳифзи сарҳади давлатӣ аз техникаву техналогияи пешрафта васеъ истифода мебаранд.

Ҳамчунин дар ин дидбонгоҳ ошхонаи кушоду барҳаво, майдони сафороӣ, ду майдончаи варзишӣ, марказҳои таълимӣ, ҳаммом, ҷойи покиза кардани либос, анборҳо барои захираи маҳсулоти кишоварзӣ, сӯзишворӣ, сару либос, мошинсарой, ҷойи нигоҳдории сагҳои хизматӣ, аспхона, ҷойи нишасти чархбол ва дигар иншооти хидмати ҳайати шахсӣ дар сатҳи баланд ва бо меъёрҳои ҳозиразамони ҳарбӣ сохта шудаанд.

Дар ҳудуди дидбонгоҳи мазкур инчунин як бинои истиқоматии дорои хонаҳои як ва ду ҳуҷрагӣ бо тамоми шароити зарурӣ мавриди баҳрабардорӣ қарор гирифт, ки дар он афсарон бо оилаҳои худ истиқомат менамоянд. Дар ҳавлии бинои мазкур барои фарзандони хизматчиёни ҳарбӣ як майдончаи бозии кӯдакона низ бунёд гардидааст.

Ёдовар мешавем, ки масъулияти ҳифзи марзи кишвар дар минтақаи Панҷ аз соли 2005-ум пурра ба уҳдаи сарҳадбонони Отряди сарҳадии «Панҷ» вогузор гардида, он то ба имрӯз чун сипари боэътимод ва пуриқтидори давлату миллат фаъолият дорад.

Намоиши “Тасвири об дар асарҳои рассомони Тоҷикистон”

Рӯзи 16-уми августи соли 2017 дар Осорхонаи миллии Тоҷикистон бахшида ба Даҳсолаи нави байналмилалии амал “Об барои рушди устувор (солҳои 2018-2028)” таҳти унвони “Тасвири об дар асарҳои рассомони Тоҷикистон ” намоиш ифтитоҳ ёфт. Дар намоиш аз хазинаи Осорхонаи миллии Тоҷикистон 30 асар аз эҷодиёти рассомони машҳури Ҷумҳурии Тоҷикистон ба маърази дид гузошта шуд.

Дар офаридаҳои мусаввирони Тоҷикистон, ки солњои гуногуни эҷод шудаанд, манзараҳои зебои табиати диёр: дарёҳо, кӯлҳо, чашмасорон наққошӣ шудаанд, ки сарзамини моро ҳамчун диёри сарчашмаҳои оби мусаффо муаррифӣ менамоянд.

Ҳамзамон дар намоиш филми “Тоҷикистон –кишвар обҳои равонбахш” пешниҳоди тамошобинон мегардад.

Намоиши “Тасвири об дар асарҳои рассомони Тоҷикистон” дар Осорхонаи миллии Тоҷикистон то 16-уми сентябри соли равон идома меёбад.

Фестивал-озмуни ҷумҳуриявии “Бӯстон-2017” дар ноҳияи Роштқалъа

Ноҳияи Роштқалъа, ки яке аз  минтақаҳои кӯҳии ватан ва хазинаи фарҳанги мардуми ориёитабор маҳсуб меёбад, даври дуюми Фестивал–озмуни телевизионии ҷумҳуриявии «Бӯстон-2017»-ро бо омодагии пурра, тибқи иҷрои талаботҳои низомнома доир намуд.

Дар баргузории даври дуюми Фестивал-озмуни “Бӯстон-2017” дар ноҳияи Роштқалъа, ки бо шаҳомати ба худ хос доир гардид, аз фарҳанг, аз ҳунар,  аз таърихи минтақа сухан рафт.

Барномаи фарҳангии ҳаваскорони ин ноҳия басо ҷолиб буд. Он чун анъана аз навозиши асбобҳои миллии мусиқӣ оғоз ёфта, навои хотирмон барои тамошобинон эҳдо гардид.

Ансамбли рақсии “Парасту”

Таваҷҷуҳи ҳамешагии роҳбарияти давлат ва Ҳукумати Ҷумҳурии Тоҷикистон ба фарҳангу ҳунар боис гардид, ки дар мамлакат фаъолияти ансамбл ва гурӯҳҳои ҳунарӣ беҳтару хубтар гашта, дастаҳои нави эҷодӣ ба вуҷуд оянд. Ансамбли рақсии “Парасту”, ки чанде пеш ин номро ба худ касб кард, аз ҷумлаи ҳамин гурӯҳҳои ҳунарӣ ба шумор меравад.

Исматулло Файзуллоев, устоди рақси Ансамбли “Парасту”  мегӯяд, ки  давоми 5 сол мешавад, ин ансамбл кору фаъолият мекунад. Имрӯз дар маҷмӯъ дар Ансамбли рақсии “Парасту” наздик ба 30 нафар духтарон, ки дилбастаи ин ҳунар мебошанд, кору фаъолият доранд. Имрӯзҳо ҳайати эҷодии ансамбли мазкур рақсҳоеро омода доранд, ки дар рӯзҳои таҷлил аз 26-умин солгарди Истиқлолияти давлатии Ҷумҳурии Тоҷикистон онро пешниҳоди тамошобинон мегардонанд.

Оғози фаъолияти Маркази таълимӣ-истеҳсолии атласу адрасбофӣ ва Маркази савдо дар маркази ноҳияи Вахш

Имрӯз дар кӯчаи Исмоили Сомонии Ҷамоати шаҳраки Вахш Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба фаъолияти Маркази таълимӣ — истеҳсолии атласу адрасбофӣ ва Маркази савдо расман оғоз бахшиданд. Пешвои миллат бо шароити фароҳамовардашуда дар марказ ошно шуда, бо масъулину ҳунаромӯзон суҳбат карданд.

Маркази мазкур аз ҷониби соҳибкори маҳаллӣ Зоҳир Давлатов дар зарфи як соли охир бунёд ёфта, дорои шароити арзанда барои ҳунаромӯзиву истеҳсоли атласу адрас аст. Тибқи иттилои масъулин, феълан 25 нафар занону ҷавондухтарони маҳаллӣ дар ин коргоҳ соҳиби ҷои кор гардида, ҳамзамон гурӯҳи дигари ҷавонон ба омӯзиши курсҳои кӯтоҳмуддати касбӣ ҷалб гардидаанд. Тибқи нақша, дар баробари истеҳсолот ҳамчунин ҳар се моҳ гурўҳи хоҳишмандон аз ҳисоби занону духтарони бекор дар ин марказ ба касбомӯзӣ фаро гирифта мешаванд.

Тавре ба Роҳбари давлат иттилоъ доданд, дар ошёнаи дуюми коргоҳ фурўши маҳсулоти ин марказ ва қолинҳои гуногунҳаҷм ба роҳ монда шудааст,  ки бо истифода аз ин имконот шаҳрвандони ноҳия метавонанд маҳсулоти хушсифати истеҳсолгарони ватаниро харидорӣ намоянд.

Гуфта шуд, ки ҷиҳати сохтмон ва муҷаҳҳазсозии Маркази таълимӣ — истеҳсолии атласу адрасбофӣ 1 миллиону 260 ҳазор сомонӣ харҷ гардида, он бо шароити муосири  кориву касбомӯзӣ мавриди баҳрабардорӣ қарор дода шуд.

Ҳамчунин аз ҷониби соҳибкори мазкур дар шафати Маркази таълимӣ — истеҳсолӣ бо харҷи 1 миллиону 890 ҳазор сомонӣ Маркази савдо мавриди истифода қарор дода шуд. Ин марказ бо таҷҳизот ва рафҳои муосири савдо муҷаҳҳаз буда, анвои гуногуни маводи озуқаворӣ ва дигар маҳсулоти ниёзи мардумро ба шаҳрвандону меҳмонони ноҳияи Вахши вилояти Хатлон бо нархҳои дастрас пешниҳод менамояд.

Зимни шиносоӣ Пешвои миллат чунин иқдомҳои ободкоронаи соҳибкорони ватаниро намунаи ибрату қобили дастгирӣ хонданд. Ҳамзамон ҳайати омӯзгорони марказро вазифадор карданд, ки тамоми маҳорати худро ба харҷ диҳанд, то занону духтарони бешуғли ноҳия тавонанд ба пуррагӣ аз нозукиҳои касби атласу адрасбофӣ бохабар гарданд.