Дар шаҳри Хоруғ намоиши ҳунарҳои мардумӣ баргузор гардид

Бахшида ба Соли рушди сайёҳӣ ва ҳунарҳои мардумӣ дар маркази Вилояти Мухтори Кӯҳистони Бадахшон -шаҳри Хоруғ намоиши маҳсули дасти ҳунармандони мардумӣ аз шаҳру навоҳии вилоят баргузор гардид. Дар ин бора АМИТ «Ховар» иттилоъ нашр намудааст.

Ширкаткунандагони намоиш иброз доштанд, ки ҷавобан ба дастгириву ғамхориҳои Пешвои миллат муҳтарам Эмомалӣ Раҳмон ҷиҳати рушди бемонеаи ҳунарҳои мардумӣ саъй бар он мекунанд, ки бо тайёр намудани маҳсулоти баландсифат ҳунарҳои мардумии тоҷикони кӯҳистонро дар сатҳи ҷаҳон муаррифӣ созанд.

Таҷлили ҷашни Сада дар Душанбе

Дар Боғи фарҳангӣ-фароғатии «Дӯстии халқҳо»-и пойтахт сокинону меҳмонон аз эҳёи боз як иди дигар — Сада, ки бастагӣ ба таъриху фарҳангӣ мардуми тоҷик дорад, истиқбол карданд. Ҷашни сирф миллӣ — Садаро имсол бори нахуст аст, ки бо чунин ҳашамату шукӯҳ таҷлил мекунанд ва пас аз Наврӯзу Меҳргон ин аллакай сеюмин иди миллиест, ки пас аз фаромӯшиҳо бо ташаббуси бевосиати Пешвои миллат боз соҳиби мақому манзалат гардид. Сокинони касбу кори гуногун дар базмгоҳи имрӯза иштирок карданд ва дастовези худро манзури тамошобинон намуданд.

Дар доираи ин ҷашн ҳамчунин дар Боғи фарҳангӣ-фароғатии «Дӯстии халқҳо» намоиш-фурӯши ниҳолҳои мевадиҳандаю ҳамешасабз, гулбуттаҳо ва асбобу олоти кишоварзӣ баргузор гардид. Дар ин баробар аҳли заҳмати кишвар маҳсули дастранҷи хешро ба намоиш гузоштанд. Таҷлили ҷашни Сада дар базмгоҳ бо ҷалби санъаткорону ҳунармандон идома ёфт.

«Гулхани Сада»

Дар нашриёти «Адиб» ба истиқболи ҷашни Сада китоби нав таҳти унвони «Гулхани Сада» ба табъ расид.

Дар оғози китоб омадааст, ки Сада яке аз ҷашнҳои бостонии халқиятҳои ориёинажод ба шумор рафта, мутобиқи солшумории мелодӣ ба поёни шаби 30-юм ва оғози санаи 31-уми январ рост меояд. Чун аз ин сана то фарорасии Наврӯз панҷоҳ шабу панҷоҳ рӯзро ташкил медиҳад, онро Сада меномиданд, зеро дар он даврон ориёиҳо шабу рӯзро алоҳида шумор мекарданд.

«Ин ҷашн дар замони соҳибистиқлолиятии кишвар дар баробари дигар ҷашнҳои бостонӣ бо ибтикори Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон эҳё гардидаву шукуҳмандона таҷлил мегардад»- оварда шудааст дар китоби нав.

Мураттиби китоб Гурез Сафар буда, дар он шеъру мақолаҳо аз шоирони гузаштаву муосир ва адабиётшиносону муҳаққиқон гидоварӣ ва нашр шудаанд.

Таҷлили ҷашни Сада дар шаҳру ноҳияҳои мамлакат

Бо шарофати соҳибистиқлолии Тоҷикистон ҷашнҳои миллӣ аз нав эҳё гардиданд. Аз ҷумлаи ин идҳои миллӣ ҷашни Сада мебошад, ки таърихи қадима дорад. Имрӯзҳо дар тамоми шаҳру ноҳияҳои ҷумҳурӣ бахшида ба ҷашни Сада чорабиниҳои гуногуни фарҳангӣ-фароғатӣ ва намоиши маҳсулоти кишоварзӣ ташкил карда мешавад.

Ҳамчунин дар  ҷашни  Сада,  хоҷагиҳои  ниҳолпарварӣ ниҳолҳои мевадиҳанда ва сояафкану ороиширо ба фурӯш мебароранд.

Иштирок дар ҷаласаи ҳаждаҳуми Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ

Имрӯз таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Шӯрои машваратӣ оид ба беҳтар намудани фазои сармоягузорӣ муҳтарам Эмомалӣ Раҳмон ҷаласаи XVIII Шӯро баргузор гардид.

Пешвои миллат муҳтарам Эмомалӣ Раҳмон ҷаласаро оғоз намуда, нахуст, Котиби масъули Шӯро, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Ҳамрализода Фаррух,  Роҳбари Намояндагии Бонки аврупоии таҷдид ва рушд дар Ҷумҳурии Тоҷикистон  хонум Айтен Рустамова, Роҳбари Котиботи Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ  Шерализода Шараф ва аъзои нави Шӯрои машваратиро ба ҳозирин муаррифӣ намуданд.

Сипас, оид ба масъалаи  якуми рӯзномаи ҷаласа, рафти иҷрои қарорҳои Шӯрои машваратӣ гузориши Котиби масъули Шӯро, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон  Ҳамрализода Фаррух шунида шуд.

Дар ин робита оид ба тасдиқи Методологияи нави тарифӣ аз ҷониби Ҳукумати Ҷумҳурии Тоҷикистон аз 26 майи соли 2017 ва аз моҳи октябри соли сипаришуда мавриди амал қарор гирифтани он, устуворшавии мавқеи Ҷумҳурии Тоҷикистон  барои соли 2018 дар ҳисоботи “Пешбурди соҳибкорӣ”-и  Бонки ҷаҳонӣ, соли 2017 то ба 52%коҳиш ёфтани шумораи санҷишҳои фаъолияти субъектҳои хоҷагидор нисбат ба соли 2016, моҳи августи соли 2017 дар сатҳи «B3 – рушди устувор» муқаррар шудани рейтинги кредитии соҳибихтёрии Тоҷикистон аз ҷониби Агентии рейтингии байналмилалии Moody’s Investors Service ва Агентии Standard and Poors иттилоъ дода шуд.

Масъалаи дуюми рӯзномаи ҷаласа ба таҳлили беҳтар намудани фазои сармоягузорӣ дар бахшҳои нақлиёт ва логистика ва лоиҳаи Нақшаи чорабиниҳо дар ин самт бахшида шуда, вобаста ба  натиҷаҳои он гузориши Вазири нақлиёти Ҷумҳурии Тоҷикистон Худоёрзода Худоёр шунида шуд.

Вобаста ба масъалаи сеюми рӯзномаи ҷаласа,  Раиси вилояти Суғд Раҷаббой Аҳмадзода, дар бораи фаъолияти Шӯрои минтақавӣ оид ба беҳтар намудани фазои сармоягузорӣ дар назди Раиси вилояти Суғд гузориш дод.

Тибқи банди чоруми рӯзномаи ҷаласа натиҷаҳои таҳлил ва лоиҳаи Нақшаи чорабиниҳо оид ба беҳтар намудани фазои сармоягузориву соҳибкорӣ дар бахши бонкдорӣ ва молияро Раиси Бонки миллии Тоҷикистон Ҷамшед Нурмаҳмадзода муаррифӣ намуд.

Оид ба масъалаи ниҳоии рӯзномаи ҷаласа, Котиби масъули Шӯро, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Ҳамрализода Фаррух баромад карда, масъалаи беҳтар намудани фазои сармоягузориву соҳибкорӣ дар бахши маориф ва илм, инчунин муаррифии таҳлили масъалаҳои низоми андозбандию гумрукӣ ва самаранокии имтиёзҳои пешниҳодшавандаро барои баррасӣ ба ҷаласаҳои оянда пешниҳод намуд, ки он аз ҷониби аъзои Шӯро ҷонибдорӣ гардид.

Ҷиҳати баррасӣ ва муҳокимаи масъалаҳои рӯзномаи ҷаласа инчунин Раиси Шӯрои ҳамоҳангсозии шарикони рушд Кристин Лаабс, Роҳбари Намояндагии бонки аврупоии таҷдид ва рушд дар Ҷумҳурии Тоҷикистон Айтен Рустамова, Роҳбари Намояндагии Бонки Рушди Осиё Прадип Шривастава, Роҳбари Оҷонсии Ҷопон оид ба ҳамкориҳои байналмилалӣ Ҳидеки Танабе, Директори ҶДММ “Корпоратсияи Моҳии Тоҷик” Суҳроб Давлатов, Директори кооперативи “Зиндагӣ” Зеваршои Рустам, Раиси ҶДММ “Таджиквнештранс” Абдумумин Абдусамадов, Раиси ҶСК “Казкоммерсбонк Тоҷикистон” и Директори ҶСК “Биржаи Осиёи Марказӣ” Алишер Шерназаров ва дигарон баромад карда, андешаҳои худро вобаста ба масъалаҳои баррасишуда иброз намуданд.

Зимни баррасии масъалаҳо, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба татбиқи яке аз ҳадафҳои стратегии кишвар — баромадан аз бунбасти коммуникатсионӣ ва ба кишвари транзитӣ табдил додани Тоҷикистон, ташкили инфрасохтори зарурӣ дар шафати роҳҳои байналмилалӣ, мушкилии соҳаи бонкдорӣ, куллан ба роҳ мондани ислоҳоти низоми бонкӣ дар кишвар ва масъалаҳои дигари ҷаласа ибрози назар намуданд муҳим арзёбӣ шуд.

Дар хотимаи ҷаласа Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Шӯрои машваратӣ муҳтарам Эмомалӣ Раҳмон ҷаласаро ҷамъбаст намуда, вобаста ба нуқтаҳои дар он зикргардида ба вазорату идораҳо, масъулини дахлдор дастуру супоришҳо ва ба шарикони рушд тавсияҳо доданд.