Таҷлили 25-солагии Иҷлосияи ХVI Шӯрои олии Ҷумҳурии Тоҷикистон ва Рӯзи Президент дар шаҳри Душанбе

Шоми 16 ноябри соли 2017 бахшида ба Рӯзи Президенти Ҷумҳурии Тоҷикистон ва 25-солагии Иҷлосияи ХVI Шӯрои олии Ҷумҳурии Тоҷикистон  дар назди бинои Театри давлатии академии опера ва балети ба номи С. Айнӣ барномаи мутантани фарҳангӣ баргузор гардид.

Ба иттилои Вазорати фарҳанги Ҷумҳурии Тоҷикистон дар барномаи консертӣ ҳунарпешагони Театри давлатии академии опера ва балети ба номи С. Айнӣ, Ансамбли давлатии хизматнишондодаи рақсии «Лола» ба номи Ғ. Валаматзода, Ансамбли рақсии «Зебо», Ансамбли “Ситораи умед”, инчунин сарояндагони номдор ва дигарон бозёфтҳои эҷодии худро, ки саршор аз рӯхи ватандӯстиву меҳанпарастӣ буд, манзури тамошобинон намуданд.

Сокинон ва меҳмонони шаҳри Душанбе консерти идонаро бо мароқ тамошо карда, лаззати маънавӣ бардоштанд. Ҷавонони фаъол бо шиорҳои идонаи худ ба чорабинӣ рӯҳи мутантан зам намуданд.

Ифтитоҳи корхонаҳои дӯзандагӣ ва пойафзолбарории Корхонаи давлатии кишоварзии «Палос»

Дар рӯзи аввали сафар ба вилояти Суғд, Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Бӯстон ба фаъолияти коргоҳҳои дӯзандагӣ ва пойафзолбарории Корхонаи давлатии кишоварзии «Палос»-и Агентии таъминоти амволи махсуси назди Ҳукумати Ҷумҳурии Тоҷикистон оғози расмӣ бахшиданд.

Иттилоъ дода шуд, ки коргоҳҳои дӯзандагӣ ва пойафзолбарории КДК «Палос» дар Ҷамоати шаҳраки “Палос”-и шаҳри Бӯстони вилояти Суғд дар асоси дастуру супоришҳои бевоситаи Пешвои миллат муҳтарам Эмомалӣ Раҳмон аз ҷониби Агентии таъминоти амволи махсуси назди Ҳукумати Ҷумҳурии Тоҷикистон бунёд карда шудааст.

Пешвои миллат муҳтарам Эмомалӣ Раҳмон иқдоми мазкурро барои таъминоти ҷузъу томҳои Қувваҳои мусаллаҳи мамлакат ва бо шуғли доимӣ таъмин намудани сокинон муассир арзёбӣ карданд. Зикр рафт, ки коргоҳҳо дар масоҳати умумии 2,4 гектар бунёд гардидаанд.

Тасмими мазкур дар асоси супоришҳои пайвастаи Сарвари давлати Тоҷикистон ҷиҳати ташкили корхонаҳои ватанӣ ва таъсиси ҷойҳои нави корӣ баҳри таъмини сохторҳои ҳарбӣ ва мақомоти ҳифзи ҳуқуқи ҷумҳурӣ бо амволи шайъӣ дар ҳудуди Корхонаи давлатии кишоварзии «Палос» рӯи даст гирифта шуд.

Тибқи нақша, дар коргоҳҳои мазкур либосҳо барои сохторҳои ҳарбӣ ва мақомоти ҳифзи ҳуқуқ, пойафзол барои аскарону афсарон, инчунин либоси мактаббачагон истеҳсол карда мешавад.

Иттилоъ дода шуд, ки дар Корхонаи давлатии кишоварзии “Палос” коргоҳи дӯзандагӣ бо таъсиси 230 ҷойи корӣ, коргоҳи пойафзолдӯзӣ бо 50 ҷойи корӣ, коргоҳи дӯхти камзӯлҳои зимистонаи пашмин бо 20 ҷойи корӣ ва коргоҳи дӯзандагии сарпӯшҳои тобистонаву зимистона ва либоси таҳпӯш бо 57 ҷойи корӣ дар як баст мавриди баҳрабардорӣ қарор дода шуд. Теъдоди умумии ҷойҳои нави кории ташкилшуда дар КДК «Палос» дар як баст 355 нафарро ташкил медиҳад, ки ин шумора дар сурати дар ду басти корӣ роҳандозӣ шудани фаъолият ба бештар аз 700 нафар хоҳад расид.

Сарвари давлати Тоҷикистон муҳтарам Эмомалӣ Раҳмон ба маҳсулоти истеҳсолии ин коргоҳҳо таваҷҷуҳи махсус зоҳир карда, бобати равнақи фаъолият ва афзоиши ҳаҷми истеҳсолот дастуру супоришҳои мушаххас доданд.

Ба қавли масъулон, дар коргоҳи дӯзандагӣ давоми 8 моҳи соли ҷорӣ ба маблағи умумии бештар аз 3 миллион сомонӣ маҳсулот истеҳсол карда шудааст. Хабар дода шуд, ки иқтидори истеҳсолии коргоҳ 30 ҳазор ҷуфт пойафзол дар як сол мебошад. Музди миёнаи моҳонаи кормандон дар коргоҳҳои номбурда мутаносибан 1000-1500 сомониро ташкил менамояд.

Лозим ба зикри хос аст, ки бо шарофати суботи саросарӣ ва дастгириву ғамхориҳои бевоситаи Пешвои миллат муҳтарам Эмомалӣ Раҳмон ҷузъу томҳои Қувваҳои мусаллаҳи ҷумҳурӣ сад дар сад бо маводи хӯрокӣ ва сару либоси низомӣ аз ҳисоби корхонаву коргоҳҳои Агентии таъминоти амволи махсуси назди Ҳукумати Ҷумҳурии Тоҷикистон таъмин мебошанд. Қаблан молу маводе, ки айни ҳол дар КДК «Палос» истеҳсол мешаванд, пурра аз хориҷи мамлакат ворид карда мешуд.

Сипас дар саҳни Корхонаи давлатии кишоварзии «Палос» намоиши маҳсулоти кишоварзиву саноатӣ ташкил карда шуд. Дар он беҳтарин намудҳои молу маҳсулоти дар корхонаҳои зертобеи Агентии таъминоти амволи махсуси назди Ҳукумати Ҷумҳурии Тоҷикистон истеҳсолшуда ба маърази тамошо гузошта шуд.

Иттилоъ дода шуд, ки масоҳати умумии заминҳои Корхонаи давлатии кишоварзии «Палос» 1486,5 гектарро ташкил медиҳад, ки аз ин бештар аз 526 гектараш замини обӣ буда, дар 379 га боғу токзор бунёд ёфтааст. Инчунин дар ҳамин корхона шумораи чорвои калони шохдор ба 330 сар ва моли майда ба 4400 сар мерасад. Аз ҳамин ҳисоб таъминоти ҷузъу томҳои Қувваҳои мусаллаҳи мамлакат бо маҳсулоти кишоварзӣ ва саноатӣ ба таври матлуб ба роҳ монда шудааст.

Дар ҳамин мавзеъ Пешвои миллат муҳтарам Эмомалӣ Раҳмон аз хобгоҳи сарбозони Баталиони махсуси кишоварзии Агентии таъминоти амволи махсуси назди Ҳукумати Ҷумҳурии Тоҷикистон боздид ба амал оварданд ва бо шароити буду боши ин воҳиди низомӣ аз наздик шинос шуданд.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати назорати фаъолияти муназзами коргоҳҳои дӯзандагӣ ва пойафзолбарории КДК «Палос» ва истифодаи мақсадноки заминҳои дар тобеияти корхонаи мазкур буда, роҳбарияти Агентии таъминоти амволи махсуси назди Ҳукумати Ҷумҳурии Тоҷикистонро вазифадор сохтанд.

Мулоқот бо фаъолон ва сокинони шаҳри Истиқлол

Пас аз ифтитоҳи Корхонаи металлургии Ширкати саноатии куҳии Тоҷикистону Хитой ва шиносоӣ бо раванди истеҳсолот дар коргоҳи мазкур дар ҳамин ҷо Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кормандони Корхонаи металлургии «Ширкати кӯҳиву саноатии Тоҷикистону Хитой» ва роҳбарияту фаъолони шаҳри Истиқлоли вилояти Суғд мулоқоти судманд анҷом доданд.

Нахуст Президенти мамлакат муҳтарам Эмомалӣ Раҳмон ҳамаи иштирокчиёни мулоқот ва кулли сокинони шаҳри Истиқлолро ба муносибати ифтитоҳи боз як корхонаи бузурги саноатии мамлакат, ки дар рӯзҳои таҷлили 25 — солагии баргузории Иҷлосияи 16-уми Шӯрои Олии Тоҷикистон рост омад, табрику муборакбод гуфтанд.

Сарвари давлат ба сармоягузорон, мутахассисону сохтмончиён, аз ҷумла ба роҳбарияти «Ширкати куҳиву саноатии Тоҷикистону Хитой», ки дар бунёди ин корхонаи азими саноатӣ саҳм гузоштаанд, миннатдорӣ баён намуданд.

Таъкид гардид, ки бунёди корхонаи металлургии Минтақаи саноатии Тоҷикистону Хитой дар шаҳри Истиқлол боз як қадами ҷиддӣ ба сӯи саноатикунонии мамлакат мебошад.

Ифтитоҳи корхонаи бузурги саноатӣ идомаи раванди бунёдкориву созандагӣ дар кишвари соҳибистиқлоламон буда, нақши ин коргоҳи бузурги истеҳсолӣ дар рушди соҳаи саноати миллӣ, афзудани иқтидори истеҳсолии мамлакат, даромади буҷет, таъсиси ҷойҳои нави корӣ ва беҳбудии ҳаёти иҷтимоӣ, бахусус, рӯзгори сокинони шаҳр ва вилоят муассир хоҳад буд.

Зимни вохӯрӣ Пешвои миллат муҳтарам Эмомалӣ Раҳмон масоили вобаста ба рушди иҷтимоию иқтисодии шаҳрро дар бахшҳои гуногун мавриди таҳлилу баррасӣ қарор дода, дар назди роҳбарияти вилоят ва шаҳр доир ба беҳтар намудани нишондодҳои истеҳсолӣ ва рушди иҷтимоию фарҳангӣ вазифаҳои мушаххас гузоштанд.

Пас аз суханронии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар назди ҳозирин Сафири фавқулодда ва мухтори Ҷумҳурии Халқии Хитой дар Тоҷикистон Юе Бин ва намояндагони касбу кори гуногун, собиқадори меҳнат Саодат Муҳаммадиева, коргарони ҷавони корхонаи навтаъсис Эмомалӣ Норов ва Абдуғаффор Ҷабборов  баромад карданд.

Сафири фавқулодда ва мухтори Ҷумҳурии Халқии Хитой дар Тоҷикистон Юе Бин зимни суханронии хеш аз рушди муносибатҳои дӯстию шарикии стратегии роҳбарон ва ҳукуматҳои ду кишвар ва дастгириҳои Президенти мамлакат оид ба ҷалби сармояи хориҷӣ ва таъсиси корхонаҳои муштарак бар нафъи мардумони Тоҷикистону Хитой андешаронӣ кард.

Сокинони шаҳри Истиқлол бошанд, барои туҳфаи арзанда, корхонаи бузурги саноатӣ, ки боиси таъсиси садҳо ҷойи нави корӣ ва беҳдошти сатҳи зиндагии мардум, инчунин омили муҳими ғанӣ гардидани буҷаи шаҳр мегардад, изҳори сипоси бепоён карданд.

Дар охири мулоқот Президенти мамлакат муҳтарам Эмомалӣ Раҳмон ба сокинони шаҳр барои истиқболи самимӣ изҳори сипос карда, бо итминон иброз доштанд, ки мардуми сарбаланди вилояти Суғди бостонӣ бо кору фаъолияти созандаи худ дар баланд бардоштани натиҷаҳои иқтисодиву иҷтимоии кишвари азизамон ва таъмини рӯзгори шоистаи мардуми мамлакат минбаъд низ саҳми сазовор мегузоранд.

Ба истифода додани Корхонаи металлургии Ширкати саноати кӯҳии Тоҷикистону Хитой дар шаҳри Истиқлоли вилояти Суғд

Сафари кории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилояти Суғд аз шаҳри Истиқлол оғоз гардид.

Дар рӯзҳои таҷлил аз 25-умин солгарди Иҷлосияи таърихии 16-уми Шӯрои Олии Тоҷикистон дар шаҳри Истиқлол бо иштироки Президенти мамлакат муҳтарам Эмомалӣ Раҳмон Корхонаи металлургии Ширкати саноати кӯҳии Тоҷикистону Хитой, ки бо харҷи 57 миллион доллари амрикоӣ сохта шудааст, мавриди баҳрабардорӣ қарор гирифт.

Нахуст Сарвари давлат муҳтарам Эмомалӣ Раҳмон бо буридани лентаи рамзӣ ва пахши тугма ба фаъолияти калонтарин корхонаи металлургӣ, ки дар марҳилаи аввал истеҳсоли металли сурб ба роҳ монда шудааст, оғози расмӣ бахшида, бо раванди коркарди маъдан ва дигар корҳои дар ин минтақаи саноатӣ анҷомёфта шинос шуданд.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба якумин сабикаи металли сурб, ки дар таърихи Тоҷикистони соҳибистиқлол бори аввал истеҳсол гардид, тамғаи №1-ро гузоштанд.

Ёдовар мешавем, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба бунёди Корхонаи металлургӣ дар шаҳри Истиқлол ҳанӯз моҳи апрели соли 2014-ум санги асос гузошта, барои бо сатҳу сифати баланд сохта ба истифода додани он ба масъулон дастуру супоришҳои мушаххас дода буданд.

Иқтидори лоиҳавии Корхонаи металлургии Ширкати саноати кӯҳии Тоҷикистону Хитой дар як сол 50 ҳазор тонна металли сурб буда, дар он 600 нафар бо кори доимӣ таъмин шудаанд ва баъди мавриди баҳрабардорӣ қарор гирифтани марҳилаи дуюми он, ин шумора афзоиш хоҳад ёфт.

Теъдоди зиёди коргаронро сокинони маҳаллӣ ташкил медиҳанд. То ин вақт дар корҳои сохтмонӣ ва васлгарии ин иншооти саноатӣ беш аз 500 нафар бинокор ва кормандони муҳандисию техникӣ иштирок намудаанд, ки беш аз нисфи онҳо сокинони маҳаллӣ буданд.

Тавре иттилоъ дода шуд, пеш аз ба кор даромадани ин корхонаи бузурги металлургӣ мутахассисон дар Донишкадаи кӯҳӣ-металлургии Тоҷикистон ва ширкатҳои бонуфузи Ҷумҳурии Халқии Хитой омода шуда, имрӯз онҳо навтарин технологияи тавлидотии пешрафтатарин ширкатҳои ҷаҳониро идора карда метавонанд.

Таъкид гардид, ки истихроҷи маъдан ва истеҳсоли хокаҳои сурб, руҳ ва мис дар корхонаи «Зарнисор», воқеъ дар шаҳри Гулистони вилояти Суғд анҷом дода шуда, аз он танҳо хокаи сурб барои коркард то ҳадди ниҳоӣ ба корхонаи навтаъсиси ин ширкат дар шаҳри Истиқлол интиқол меёбад.

Ба таъкиди мутахассисони соҳа, ин корхона аз ҷиҳати иқтидори истеҳсолӣ, истифодаи технологияи пешрафта дар Осиёи Марказӣ назир надорад ва маҳсулоте, ки дар ин ҷо истеҳсол мешавад, ҷавобгӯи стандартҳои байналмилалӣ мебошад.

Президенти мамлакат муҳтарам Эмомалӣ Раҳмон зимни боздид аз коргоҳҳои сурбгудозӣ, тозакунии газҳо, сурбу электоролит, кисларод, коркарди кимёвии об ва дигар иншооти зарурӣ иқдоми пешгирифтаи сармоягузоронро, пеш аз ҳама, дар истифодаи самараноки захираҳои табиии Тоҷикистон муҳим арзёбӣ карда, ба кори онҳо баҳои баланд доданд.

Давоми солҳои охир бо ташаббуси Ҳукумати Ҷумҳурии Тоҷикистон ва ҷалби сармояи дохилию хориҷӣ дар мамлакат рушди соҳаи саноати металлургӣ таъмин гардида, корхонаҳои нав ба кор дароварда шуд, ки дар ин замина истихроҷ ва коркарди маъдан то ба ҳадди ниҳоӣ расид ва ин иқдом дар рушди иқтисоди миллӣ ва таъсиси ҳазорҳо ҷойҳои нави корӣ натиҷаи дилхоҳ ба бор овард. Хусусан дар шаҳру ноҳияҳои вилояти Суғд ин раванд вусъати бештар пайдо кардааст.

Барои бо қувваи барқ таъмин намудани корхонаи металлургӣ зеристгоҳи барқӣ низ сохта шуда, 2 адад трансформатори иқтидорашон 25 ва 16 ҳазор кВт насб гардид. Тибқи маълумоти масъулон истеҳсоли металли сурб дар ин корхона асосан тавассути ангиш, газ ва сӯзишвории дизелӣ сурат мегирад.

Дар ин минтақаи саноатӣ ҳамчунин биноҳои маъмурӣ, ошхона ва ду хобгоҳ барои коргарон бо тарҳи муосир қомат афрохтаанд. Аз ҷумла дар бинои якум ва дуюми хобгоҳ барои истироҳати кормандон шароити мусоиди зист фароҳам оварда шуда, он барои беш аз 600 коргар пешбинӣ гардидааст.

 Ду адад пойгоҳи обкашии пуриқтидор, ки дар баробари талаботи минтақа, инчунин эҳтиёҷоти сокинони шаҳри Истиқлолро бо оби нӯшокӣ қонеъ менамоянд, сохта шудаанд.

Ёдовар мешавем, ки минтақаи саноатӣ дар шаҳри Истиқлол дар масоҳати 70 гектар доман густурда, барои бунёди он дар маҷмӯъ 1 миллиарду 200 миллион сомонӣ сарф хоҳад шуд.

Оянда дар Корхонаи металлургии Тоҷикистону Хитой боз дар назар аст, ки корхонаҳои нави руҳ, аккумулятор, кислотаи сулфат, нуриҳои минералӣ ва қисмҳои эҳтиётии саноати кӯҳкорӣ сохта шаванд.

Давоми соли равон дар баробари бунёди Корхонаи металлургӣ аз ҷониби ширкати мазкур барои таъмири роҳҳои мошингарди ҳудуди шаҳри Истиқлол 12 миллион ва навсозии як боғчаи бачагона 14 миллион сомонӣ харҷ карда шуд.

Хотиррасон бояд намуд, ки мавриди баҳрабардорӣ қарор гирифтани корхонаи металлургӣ идомаи бунёди силсилаи корхонаҳои Ширкати саноати кӯҳии Тоҷикистону Хитой мебошад. Истихроҷ ва коркарди маъдани руҳу сурб ва мис чанд сол пеш дар корхонаи «Зарнисор», воқеъ дар шаҳри Гулистон оғоз ёфта буд. Ҳоло дар корхонаи мазкур беш аз 3 ҳазор нафар бо кори доимӣ ва маоши хуб таъмин гардидаанд.

Баъди шиносоӣ бо раванди истеҳсолот Сарвари давлат муҳтарам Эмомалӣ Раҳмон бо кормандони Корхонаи металлургии Ширкати саноати кӯҳии Тоҷикистону Хитой ва роҳбарияту фаъолони шаҳри Истиқлоли вилояти Суғд мулоқоти судманд анҷом доданд.

Зимни вохӯрӣ масоили вобаста ба рушди иҷтимоию иқтисодии шаҳр дар бахшҳои гуногун мавриди таҳлилу баррасӣ қарор гирифта, дар назди масъулин доир ба беҳтар намудани нишондодҳои истеҳсолӣ ва рушди иҷтимоию фарҳангӣ вазифаҳои мушаххас гузошта шуд.

Оғози сафари корӣ ба вилояти Суғд

Субҳи имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади иштирок дар тантанаҳои идонаи ҷашни 25 — умин солгарди Иҷлосияи таърихии 16-уми Шӯрои Олии Ҷумҳурии Тоҷикистон, ифтитоҳи як қатор иншооти муҳим ва суҳбату мулоқот бо мардум бо сафари корӣ ба вилояти Суғд ташриф оварданд.

Роҳбарият ва намояндагони ҷавонони вилояти Суғд Сарвари хирадманди тоҷикон, Пешвои миллат муҳтарам Эмомалӣ Раҳмонро дар Фурудгоҳи байналмилалии Хуҷанд бо сарбаландӣ истиқбол гирифтанд.

Ёдовар мешавем, ки ҳануз 25 сол қабл дар Иҷлосияи таърихии 16-уми Шӯрои Олии Ҷумҳури Тоҷикистон, ки аз 16-уми ноябр то 2-юми декабр дар Қасри маданияти ба номи Саидхӯҷа Ӯрунхӯҷаев маъруф ба Қасри Арбоб баргузор гардида буд, бо иродаи кулли депутатҳои Шӯрои Олӣ Эмомалӣ Раҳмон, сиёсатмадори оқилу хирадманд Раиси Шӯрои Олии Тоҷикистон — Сарвари давлати тоҷикон интихоб гардид.

Ба муносибати таҷлили ин рӯйдоди муҳими таърихию тақдирсоз бо иштироки Пешвои миллат муҳтарам Эмомалӣ Раҳмон ҷаласаи тантанавӣ баргузор мегардад ва ҳамчунин дар шаҳру ноҳияҳои вилоят як қатор иншооти муҳим мавриди баҳрабардорӣ қарор дода мешаванд.

Воқеан, ин иҷлосия дар рушд ва таҳкими давлатдории навину истиқлолияти воқеии Тоҷикистон, якпорчагии он, ваҳдати миллӣ ва истиқрори сулҳ дар сарзамини бостонӣ, амалӣ гардидани ислоҳоти сиёсӣ, хуқуқӣ, иқтисодиву иҷтимоӣ дар роҳи бунёди ҷомеаи шаҳрвандӣ асос гузошт.

Ҳамаи ин маҳз бо талошу ҷонбозиҳо ва сарсупурдагии фарзанди фарзонаи миллат муҳтарам Эмомалӣ Раҳмон ба даст омад.

Намояндагони аҳли ҷомеаи Тоҷикистон ва дар радифи онҳо намояндагони аҳли сиёсат ва фарҳангу зиёиён Пешвои миллат муҳтарам Эмомалӣ Раҳмонро ҳамчун меъмори сулҳу ваҳдат ва наҷотбахши миллат ва асосгузори давлати навини тоҷикон бо самимияти афзун ва меҳру муҳаббати бепоён истиқбол гирифтанд.

Пешвои миллати тоҷикон муҳтарам Эмомалӣ Раҳмон новобаста аз вазъи мураккаби сиёсӣ ва ҷанги шаҳрвандӣ дар ин солҳо ва лаҳзаҳои тақдирсоз, ҳамчун, сиёсатмадори ҷасуру далер амал карда, аз рӯи хиради азалии халқи тоҷик ҳамчун фарзанди сарсупурдаи миллат барои барқарор кардани сохти фалаҷгаштаи давлатдорӣ, иқтисодӣ ва ба даст овардани сулҳу суботи сартосарӣ ҷонфидоӣ намуданд.

Сулҳи тоҷикон ва баъдан пешрафту шукуфоии Тоҷикистони соҳибистиқлол маҳз ба ному корномаҳои ин фарзанди фарзонаи миллат марбут аст.

Ба ҷашни фархундаи миллӣ, 25 — умин солгарди баргузории Иҷлосияи тақдирсози миллат — анҷумани саодати миллат кулли мардуми шарафманди тоҷик, тоҷикони бурунмарзӣ ва кишварҳои хориҷӣ, созмонҳои байналмилалӣ ва минтақавӣ таваҷҷӯҳи калон зоҳир менамоянд. Зеро, сулҳи тоҷикон дастоварди нодири таърихӣ ва таҷассумгари хиради азалии мардуми ориёӣ бо талошу пайгириҳои роҳбари тоҷикон Эмомалӣ Раҳмон ба даст омада, асоси ҳамаи пешрафту шукуфоии Тоҷикистони соҳибистиқлол ва эътирофи ин падидаи нодир дар ҷомеаи ҷаҳонӣ мегардад.