Ифтитоҳи қитъаи роҳи «Шӯрообод-Шоҳон» ва гузоштани санги асос ба бунёди қитъаи «Кӯлоб-Шамсиддин Шоҳин»-и роҳи мошингарди Кӯлоб-Қалъаи Хумб

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва директори Бонки Исломии Рушд Бандар Ҳамза Ҳаҷҷар бо гузоштани санги асос ба бунёду навсозии қитъаи «Кӯлоб-Шамсиддин Шоҳин»-и роҳи мошингарди «Кӯлоб-Қалъаи Хумб» оғози расмӣ бахшиданд.

Ин қитъаи роҳ 32 километрро ташкил дода, бо харҷи зиёда аз 51 миллион доллар мавриди таҷдиду азнавсозӣ қарор мегирад.

Дар асоси лоиҳа, ки ба Президенти Ҷумҳурии Тоҷикистон муҳтарам Эмомалӣ Раҳмон муаррифӣ карда шуд, дар ин масир корҳои тахту ҳамворкунӣ, васеъкунии роҳ, гузоштани 39 қубури обгузар, сохтмони ҷӯйборҳои бетонӣ дар ду канори роҳ бо дарозии 40 ҳазор метр, бунёди пойдеворҳои муҳофизатӣ дар масофаи 10 ҳазор метр, 2 пули мошингузар ва дигар иншооти зарурӣ пешбинӣ гардидааст.

Сарвари давлат муҳтарам Эмомалӣ Раҳмон ҷиҳати мутобиқ ба стандартҳои байналмилалӣ бунёд намудани роҳи мошингарди Кӯлоб-Шамсиддин Шоҳин ба масъулони соҳа дастуру супоришҳои мушаххас доданд.

Ин қитъаи роҳ, ки ҷузъи асосии роҳи мошингарди Кӯлоб-Қалъаи Хумб ба ҳисоб меравад, бо таҷдиду навсозии он рафту омади доимии сокинон дар тамоми фасли сол таъмин гардида, интиқоли молу маҳсулот афзоиш хоҳад ёфт.

Баъди оғози расмии корҳои сохтмонӣ дар қитъаи Кӯлоб-Шамсиддин Шоҳин Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамроҳ бо директори Бонки Исломии Рушд Бандар Ҳамза Ҳаҷҷар қитъаи «Шӯрообод-Шоҳон»-и роҳи автомобилгарди Кӯлоб-Қалъаи Хумбро дар фазои тантанавӣ мариди баҳрабардорӣ қарор доданд.

Масофаи роҳи мошингарди Кӯлоб-Қалъаи Хумб, қитъаи Шӯрообод-Шоҳон 40 километр буда, бо маблағгузории Ҳукумати Ҷумҳурии Тоҷикистон, Бонки Исломии Рушд, Фонди Рушди Саудӣ, Фонди Қувейтии Рушди Иқтисодии Араб, Фонди Абу – Дабӣ ва Фонди ОПЕК бо харҷи қариб 85 миллион доллар куллан навсозӣ шуда, корҳои сохтмониро асосан дар ин масир коргарону мутахассисони Ширкати муштараки Комбайнд групп Контрактинг-Текар Лимитед ва дигар ширкатҳои роҳсозии бонуфузи ҷаҳонӣ дар асоси нишондоди лоиҳавӣ мутобиқ ба меъёрҳои байналмилалӣ ба анҷом расониданд.

Хотиррасон мешавем, ки ба сохтмони роҳи мошингарди Шӯрообод-Шоҳон Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон моҳи октябри соли 2011-ум расман оғоз бахшида, барои бо сатҳу сифати олӣ анҷом додани корҳои сохтмонӣ дар ин иншооти коммуникатсионӣ масъулони соҳаро вазифадор намуда буданд.

Дар асоси лоиҳаи “Сохтмони роҳи автомобилгарди Кӯлоб-Қалъаи Хумб”, қитъаи Шӯрообод-Шоҳон 10 пули мошингузар бо 1 ҳазору 121 метр бунёд гардидааст, ки бузургтарини онҳо пули Шӯробак бо дарозии 306 метр, Хутхам 297 метр ва Оби Ниёб 265 метр мебошад.

Ҳамзамон дар ин масир 85 қубури обгузар насб гардида, 50 ҳазор метр ҷуйборҳои бетонӣ, 8 ҳазору 834 метр пойдеворҳои муҳофизатӣ бунёд карда шудааст, ки аслан анҷоми ин корҳо дар пешгирӣ аз вайроншавии роҳ нақши басо созгор доранд.

Мутобиқи талабот дар қитъаи Шӯрообод- Шоҳони роҳи мошингарди Кӯлоб-Қалъаи Хумб ҳамчунин зиёда аз 1600 адад аломатҳои роҳ насб гардидаанд.

Қисмати роҳи Шӯрообод – Шоҳон идомаи бунёди шоҳроҳи мошингард ба самти шарқии мамлакат буда, дорои аҳамияти бузурги иқтисодиву иҷтимоӣ ва стратегӣ мебошад.

Ба таъкиди Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон роҳу пулҳои то ба имрӯз бунёдгардида — шоҳрагҳои рушди минбаъдаи мамлакат буда, бояд барои имрӯзу фардои миллату давлат хизмат намоянд.

Дар асоси лоиҳаи “Сохтмони роҳи автомобилгарди Кӯлоб-Қалъаи Хумб”, қитъаи Шӯрообод-Шоҳон чароғонкунии маркази ноҳия ва маҳаллаҳои аҳолинишин амалӣ гардида, истгоҳҳои самонавӣ низ бунёд карда шудаанд.

Ҳамчунин барои корҳои таъмирию азнанавсозӣ ва равшаннамоии роҳҳои марказии ноҳияи Шамсиддин Шоҳин дар соли 2018 – ҷудо намудани 3 млн сомонӣ пешбинӣ шудааст.

Дар рафти таҷдиду азнавсозии қитъаи Шӯрообод-Шоҳон 1000 нафар сокинони маҳаллӣ бо ҷойи кору маоши хуб таъмин гардида, ҳамаи онҳо оянда ҳамчун мутахассисони соҳибтаҷриба дар бунёди қитъаи Кӯлоб-Шамсиддин Шоҳин ва Шкев-Қалъаи Хумб саҳми назарраси худро мегузоранд.

Ифтитоҳи Муассисаи таҳсилоти миёнаи умумии №1 дар деҳаи Навободи ноҳияи Шамсиддини Шоҳин

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Навободи ноҳияи Шамсиддини Шоҳин ба фаъолияти Муассисаи таҳсилоти миёнаи умумии №1 расман оғоз бахшиданд. Дар саҳни мактаб Пешвои миллатро омӯзгорону толибилмон бо самимияти хоса истиқбол гирифтанд.

Мактаби мазкур барои 760 нафар хонанда дар ду баст пешбинӣ гардида, дорои шароити муосири дарсомӯзист. Сохтмони иншооти мазкур соли 2015 оғоз ёфта буд ва мактаб дар зарфи ду сол бо назардошти талаботи стандартҳои ҷаҳонӣ дар майдони 2 гектар ба истифода дода шуд.

Президенти Ҷумҳурии Тоҷикистон муҳтарам Эмомалӣ Раҳмон бо сифати корҳои анҷомёфта ошно гардида, ба кори сохтмончиён баҳои баланд доданд. Зимни боздид ба Пешвои миллат иттилоъ дода шуд, ки таълимгоҳ аз чор бино иборат буда, дорои синфхонаҳои муҷаҳҳази фаннӣ, утоқҳои муосир барои омӯзгорон, кабинетҳои инкишофи кӯдак, ҳамшираи шафқат, муҳосибот, синфхонаҳо барои дарсҳои иловагӣ ва дигар иншооти ёрирасон мебошад.  Ҳамчунин барои толибилмон толори варзишии муосир бо 200 ҷои нишаст, маҷлисгоҳ бо 24 ҷои нишаст, ошхона бо 60 ҷой ва китобхона бо 32 нишастгоҳ бунёд ёфтааст.

Синфхонаҳои муассисаи навтаъсис тариқи буғхона, ки бо технологияи ҳозиразамон сохта шуда,  бо ангишт фаъолият мекунад,  гарм карда мешаванд.

Фармоишгари Муассисаи таҳсилоти миёнаи умумии №1 Муассисаи давлатии «Маркази татбиқи лоиҳаи «Сохтмон ва муҷаҳҳазгардонии мактабҳо» буда,  лоиҳаи мактаб аз тарафи Ҷамъияти дорои масъулияти маҳдуди  «Панасиа ЛТД»  таҳия шудааст.

Иншооти мазкур аз ҷониби Ҳукумати Ҷумҳурии Тоҷикистон ва Фонди Саудии Рушд бо харҷи  15,5 миллион сомонӣ  бунёд карда шуд.

Сипас Президенти Ҷумҳурии Тоҷикистон муҳтарам Эмомалӣ Раҳмон аз намоишгоҳи маҳсулоти кишоварзии аҳли заҳмати ноҳияи Шамсиддини Шоҳин дидан карда, бо фаъолияти кишоварзон аз наздик шинос шуданд.

Деҳқонони ноҳия маҳсули дастранҷи худро, ки иборат аз меваҳои тару тоза, зироат ва  сабзавот буд, ба намоиш гузоштанд. Гуфта шуд, ки бо ба роҳ мондани тадбирҳои саривақтӣ дар ин ноҳияи дурдаст ҳамасола кишоварзон ҳосили дилхоҳ ба даст оварда, ба ин васила дар таъмини амнияти озуқаворӣ ҳиссаи арзанда мегузоранд.

Ҳамзамон занони ҳунарманди ноҳия низ дар ин рӯз маҳсули дастранҷи худро ба намоиш гузоштанд, ки аз анвои гуногуни маҳсулоти нонӣ иборат буд.

Бешак намоишгоҳи имрӯза аз кори пурмаҳсули деҳқонони ноҳия, истифодаи дурусту оқилонаи ҳар порча замин ва дар маҷмўъ, рушди соҳаи кишоварзӣ дар ноҳияи Шамсиддини Шоҳин шаҳодат медод.

Пас аз ифтитоҳи муассисаи таълимӣ ва боздид аз намоишгоҳи кишоварзӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар боғи фарҳангиву фароғатии ноҳияи Шамсиддини Шоҳин бо фаъолону сокинони ноҳия мулоқоти самимиву судманданҷом доданд.

Пешвои миллат бо таҳлили дақиқу амиқи вазъи дирӯзаву имрӯзаи ноҳия, барои пешбурду рушди бештари  бахшҳои гуногуни хоҷагии халқи ноҳияи Шамсиддини Шоҳин таклифу пешниҳодҳои дақиқу асоснок карданд.

Ба истифода додани меҳмонхонаи замонавӣ дар маҳаллаи Синои ноҳияи Шамсиддин Шоҳин

Дар маҳаллаи Синои ноҳияи Шамсиддин Шоҳин ҳамчунин бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон як меҳмонхонаи замонавӣ мавриди истифода қарор дода шуд.

Иншооти муосири хизматрасонӣ аз тарафи Корхонаи воҳиди давлатии «Хоҷагии манзилию коммуналии Ҷумҳурии Тоҷикистон» сохта шуда, барои қабули то 26 нафар меҳмон  дар як шабонарӯз пешбинӣ гардидааст.

Меҳмонхона аз 15 ҳуҷраи як ва дунафара, ошхона, ҳуҷраҳо барои ҳайати кормандон, ҳуҷраи нигоҳдории асбобҳои мусиқӣ, ҳуҷраи нигоҳдории таҷҳизот ва даҳлез иборат буда, ба маблағи 7 миллион сомонӣ бунёд ёфтааст. Дар маҷмуъ масоҳати умумии бино 6 440 метри квадратиро ташкил медиҳад.

Зимни шиносоӣ бо шароиту имконоти меҳмонхона Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои мутобиқ ба талаботи замон ба роҳ мондани хизматрасонӣ ба масъулину кормандон ҳидоятҳои муфид доданд.

Фармоишгари иншоот Корхонаи воҳиди давлатии «Хоҷагии манзилию коммуналии Ҷумҳурии Тоҷикистон» ва пудратчӣ Ҷамъияти дорои масъулияти маҳдуди «Сомон-Орзу» мебошад.

Президенти Ҷумҳурии Тоҷикистон муҳтарам Эмомалӣ Раҳмон ба сифати корҳои сохтмонӣ баҳои баланд дода, барои дар ҳолати хуб нигоҳ доштани меҳмонхона ба масъулон супоришҳои мушаххас доданд.

Бинои меҳмонхона аз 3 ошёна иборат буда, дар асоси тарҳи муосир бо назардошти сохти меъмории замонавӣ сохта шудааст.

Ҳамзамон атрофи бинои меҳмонхона ба таври замонавӣ назаррабо гардонида шуда, қомат афрохтани он ба намои зоҳирии маркази ноҳияи Шамсиддин Шоҳин зебогии дучанд зам кардааст.

Оғози корҳои сохтмонӣ барои бунёди варзишгоҳ ва бинои Қасри фарҳанг дар ноҳияи Шамсиддин Шоҳин

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтрам Эмомалӣ Раҳмон дар ноҳияи Шамсиддин Шоҳин ба сохтмони варзишгоҳ барои 6000 ҷойи нишаст санги асос гузоштаанд.

Зимни муаррифии лоиҳаи варзишгоҳ ба Президенти Ҷумҳурии Тоҷикистон муҳтарам Эмомалӣ Раҳмон иттилоъ доданд, ки масоҳати қитъаи замини барои сохтмони варзишгоҳ пешбинигардида 4,00 гектар буда, аз чор минбари мунаққаш иборат мебошад.

Минбари ғарбӣ аз 9 қатор барои 1 ҳазору 876 ҷойи нишаст ва шимолӣ аз 8 қатор барои 1028 ҷой, ҷанубӣ аз 8 қатор барои 1028 ҷой ва шарқӣ аз 10 қатор барои 2 ҳазору 340 ҷойи нишаст пешбинӣ гардидааст. Варзишгоҳ дорои чор даромадгоҳ буда, бо тарҳ ва услуби меъмории миллӣ сохта мешавад.

Варзишгоҳи мазкур дар тарҳ шакли чоркунҷаро доро буда, минбари ғарбӣ аз ду ошёна иборат мебошад ва дар он толори VIP низ ҷойгир карда мешавад.

Президенти Ҷумҳурии Тоҷикистон муҳтарам Эмомалӣ Раҳмон таваҷҷуҳи мутахассисону лоиҳакашонро ба сифати корҳои сохтмонӣ, истифодаи мақсадноки маблағҳои ҷудогардида ва масолеҳи аълосифати ватанӣ ҷалб намуданд.

Дар солҳои соҳибистиқлолии Ҷумҳурии Тоҷикистон дар аксар ноҳияҳои кишвар бо маблағгузории Ҳукумати мамлакат варзишгоҳҳои зебою замонавӣ сохта ба истифода дода шуда, рушди соҳаи варзиш дар кишвар таъмин гардид.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳамин мавзеъ бо гузоштани санги асос ба корҳои сохтмонӣ дар бинои Қасри фарҳанги ноҳияи Шамсиддин Шоҳини вилояти Хатлон ҳусни оғоз бахшиданд.

 Зимни муаррифии лоиҳаи бинои Қасри фарҳанги ноҳияи Шамсиддин Шоҳин ба Президенти Ҷумҳурии Тоҷикистон муҳтарам Эмомалӣ Раҳмон иттилоъ дода шуд, ки арзиши корҳои сохтмонӣ дар ин иншоот 8 миллиону 272 ҳазор сомониро ташкил медиҳад.

Тавре иттилоъ дода шуд, масоҳати умумии қитъаи замини ҷудогардида барои бунёди Қасри фарҳанги ноҳияи Шамсиддин Шоҳин 0,55 гектар буда, масоҳати умумии бино 1 ҳазору 247,6 метри мураббаъро ташкил медиҳад.

Дар ошнёаи аввали бино толори фарҳангӣ барои 500 ҷойи нишаст ва дар қабати дуюм миёнсарой, ҳуҷраҳои корӣ, техникӣ ва утоқҳои санъаткорон ҷойгир мебошанд.

Фармоишгари бинои замонавии Қасри фарҳанги ноҳияи Шамсиддин Шоҳин Дирексияи сохтмонии иншооти ҳукуматии Дастгоҳи иҷроияи Президенти Ҷумҳурии Тоҷикистон буда, лоиҳаи биноро Ҷамъияти саҳомии кушодаи Пажӯҳишгоҳи илмӣ- лоиҳакашию ҷустуҷӯии «САНИИОСП» омода намудааст.

Паймонкории ин иншоотро Ҷамъияти дорои масъулияташ маҳдуди «Хизматрасонии сохтмони асосӣ» ба уҳда дорад.

 Пешвои миллат муҳтарам Эмомалӣ Раҳмон таваҷҷуҳи масъулини соҳаро барои бо сифати баланд ба анҷом расондани корҳо ҷалб намуда, иброз доштанд, ки Қасри фарҳанги ноҳияи Шамсиддин Шоҳин бояд солҳои дароз ба мардум хизмат намояд.

Тибқи лоиҳа корҳои сохтмонии Қасри фарҳанги ноҳияи Шамсиддин Шоҳини вилояти Хатлон соли 2018-ум ба нақша гирифта шуда, дар муҳлати пешбинишуда, мавриди истифода қарор дода хоҳад шуд.

Ба истифода додани Корхонаи давлатии дӯзандагӣ ва коркарди меваю сабзавот дар ноҳияи Шамсиддини Шоҳин

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба ноҳияи Шамсиддини Шоҳини вилояти Хатлон дар маҳаллаи Ҷавонони ҷамоати деҳоти Шӯрообод бо буридани лентаи рамзӣ ба фаъолияти Корхонаи давлатии дӯзандагӣ ва коркарди меваю сабзавот оғози расмӣ бахшиданд.

Тавре иттилоъ дода шуд, корҳои сохтмонӣ дар корхонаи коркарди меваю сабзавот ва коргоҳи дӯзандагӣ соли равон оғоз гардида, дар як муддати кӯтоҳ бо сифати баланд ба анҷом расонида шудаанд. Дар ҷараёни корҳои сохтмонӣ дар иншооти мазкур асосан мутахассисони маҳаллӣ ба кор ҷалб гардида буданд.

Бинои дуошёнаи корхонаи саноатӣ бо фармоиши Агентии таъминоти амволи махсуси назди Ҳукумати Ҷумҳурии Тоҷикистон қомат афрохта, бо сабку услуби муосири меъморӣ ба ин гӯшаи зебои кишвар ҳусни дигар зам намуд.

Сардори давлат муҳтарам Эмомалӣ Раҳмон бо дастгоҳу технологияи муосири корхона ва басту банди маҳсулоти ватанӣ шинос гардида, бо кормандон суҳбати озоду самимӣ доир карданд.

Корхонаи мазкур имкон дорад дар як шабонарӯз 1 тоннаву 500 килограмм маҳсулоти боғдоронро коркард ва басту банд намояд.

Дар назди ин коргоҳ сардхона низ ҷойгир мебошад, ки дар он 200 тонна маҳсулоти боғпарваронро захира мекунанд.

Тавре зикр гардид, барои корҳои сохтмонӣ ва таҷҳизонидани иншоот бо технологияи пешрафта 6 миллион сомонӣ харҷ гардида, бинои хуштарҳ дар майдони 0,48 садяк замин сохта шудааст.

Иттилоъ дода шуд, ки таҷҳизоти Корхонаи давлатии дӯзандагӣ ва коргоҳи мева аз Германия ворид карда шуда, аз ҷониби мутахассисони ватанию хориҷӣ васлу насб гардидаанд.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ошёнаи дуюми бино бо чеварони коргоҳи дӯзандагӣ суҳбати самимӣ доир намуданд.

Занону духтарони хонашин дар ин коргоҳ бо мошинаҳои дарздӯзӣ таъмин шуда, ба омода намудани либосҳои гуногун машғуланд.

Чеварони ин коргоҳ пеши худ мақсад гузоштаанд, ки дар оянда дар таъмини хонандагони муассисаҳои таълимии ноҳияи Шамсиддини Шоҳин бо либосҳои ягонаи мактабӣ саҳми худро гузоранд. Бинои номбурда дорои ҳуҷраҳои алоҳидаи корӣ, 3 толор ва 5 ҳуҷра бо масоҳати умумии 782 метри мураббаъ мебошад.

Бо ифтитоҳи иншооти нав 22 нафар дар корхонаи коркарди меваю сабзавот ва 130 нафари дигар дар коргоҳи дӯзандагӣ бо шуғли доимӣ ва маоши хуб ва дар маҷмӯъ 160 нафар бо ҷойи кор таъмин гардидаанд.