Ифтитоҳи бинои нави Маркази ҷавонон дар ноҳияи Дӯстӣ

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳангоми сафари корӣ ба ноҳияи Дӯстии вилояти Хатлон дар вазъи мутантан бинои нави Маркази ҷавононро расман мавриди баҳрабардорӣ қарор доданд.

Сарвари давлатро дар саҳни бинои хуштарҳу замонавии Маркази ҷавонон насли  хуштолеи замони истиқлол, ҷавонони ноҳия бо самимият ва муҳаббати хоса истиқбол намуданд.

 Бинои нави Маркази ҷавонони ноҳияи Дӯстӣ аз 2 ошёна иборат буда, фармоишгари он Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон аст. Иншооти мазкур дар зарфи ду сол бо маблағи 4, 5 миллион сомонӣ сохта шудааст. Дар ин бино ҳуҷраҳои   таълимӣ, ки дар онҳо ба ҷавонон дарсҳои информатика, санъати мусиқӣ, рассомӣ ва дигар касбу ҳунарҳо  омӯзонда мешавад, ҷойгиранд.

Дар Маркази ҷавонон инчунин шароит барои машқи бадан, омӯхтани дигар намудҳои варзиш, аз қабили шашкаю шоҳмот фароҳам оварда шудааст. Дар маҷлисгоҳи ин бино, ки 200 ҷойи нишаст дорад, имконияти  гузарондани ҳамагуна чорабиниҳои фарҳангӣ ва семинару курсҳои омӯзишӣ имконпазир аст.

Сарвари давлат ин  бинои зеборо тӯҳфаи арзанда дар Соли ҷавонон барои ҷавонони сарбаланди ноҳияи Дӯстӣ номида, иброз доштанд, ки Ҳукумати Ҷумҳурии Тоҷикистон барои дастгирии насли ояндасози миллат корҳои назаррасро анҷом медиҳад. Дар зарфи 26 соли соҳибистиқлолии кишвар дастгириҳои давлатӣ дар самти татбиқи сиёсати давлатии ҷавонон ва варзиш назаррас буда, ҷиҳати таъмини некуаҳволии ояндасозони миллат пайваста тадбирҳо андешида мешаванд. Соли 2017 эълон гаштани Соли ҷавонон ва дар доираи он бунёд шудани марказҳо барои ҷавонон, сохтмони иншооти варзишӣ ва ба омӯзиши касбҳои муосир фаро гирифтани онҳо аз таваҷҷуҳи доимии Сарвари давлат нисбат ба ин қишри ҷомеа гувоҳӣ медиҳад.

Иттилоъ дода шуд, ки айни ҳол дар маркази ноҳияи Дӯстӣ инчунин сохтмони варзишгоҳи замонавӣ барои 3000 ҷойи нишаст идома дорад, ки соли оянда он низ дар ихтиёри ҷавонони ноҳия қарор хоҳад ёфт.

Пешвои миллат ҷавононро ба касбомӯзӣ, аз худ намудани илмҳои муосир ва омӯхтани забонҳои хориҷӣ даъват намуда, иброз доштанд, ки айни ҳол дар бозори меҳнат талабот ба он мутахассисоне зиёд аст, ки дорои малакаи баланди касбӣ ва донишҳои муосир  мебошанд. Таъкид гардид, ки ба фаъолият шурӯъ кардани бинои нави Маркази ҷавонон барои баланд бардоштани малакаи касбӣ, забономӯзӣ ва воқиф будан аз технологияи муосир ба ҷавонони ноҳияи Дӯстӣ хизмат хоҳад кард.

Шиносоӣ аз фаъолияти хоҷагии деҳқонии «Баҳор-1»-и ноҳияи Дӯстӣ

Дар доираи сафари кории худ дар ноҳияи Дӯстии вилояти Хатлон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти Ҷиликул аз фаъолияти хоҷагии деҳқонии «Баҳор-1» дидан намуданд.

Шуғли асосии хоҷагии мазкур боғдорӣ буда, саҳмдорони он бештар меваҳои ситрусиро парвариш мекунанд. Хоҷагии номбурда дар ихтиёри худ 2 гектар замин дошта, дар як гектари он боғ бунёд намудаанд, ки ниҳоли дарахтони анор, шафтолу, ангур ва дигар навъи меваҷот ҳосили фаровон доданд. Тавре ба Сарвари давлат иттилоъ доданд, феълан дар ноҳияи Дӯстӣ беш аз 1000 гектар боғҳои ситруси мавҷуд аст, ки ҳамасола боғдорони ноҳия аз ин ҳисоб ҳосили баланд ба даст меоранд.

Пешвои миллат муҳтарам Эмомалӣ Раҳмон ба аҳли заҳмат ҷиҳати рушди соҳаи боғдорӣ, нигоҳубини дурусти дарахтони мева, барқарор кардани боғҳои кӯҳна, васеъ намудани майдони боғот ва гирифтани ҳосили баланду содироти он ба хориҷи кишвар маслиҳатҳои муфид доданд.

Дар ҳаминҷо намоишгоҳи маҳсулоти кишваорзии меҳанткашони ноҳияи Дӯстӣ доир карда шуд, ки аз фаровонии ҳосили сабзавоту меваҷот дарак медод. Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз намоиши маҳсулоти кишоварзии деҳқонони ноҳия дидан карда, ба кори ибратбахши аҳли захмат баҳои баланд доданд.

Соли ҷорӣ кишоварзони ноҳияи Дӯстӣ дар майдони қариб 15 ҳазор гектар замин кишт гузаронида, ҳосили баланди сабзавот аз қабили пиёз, картошка, ғаладонагиҳо, полезӣ ва ғайра ба даст оварданд. Хоҷагиҳои деҳқонии ноҳия дар майдони беш аз 2 ҳазор гектар кишти ғалладонагиҳо гузаронида, 13 ҳазору 287 тонна ҳосил ба даст оварданд.

Ҳамчунин занбӯриасалпарвариву моҳидорӣ низ дар ноҳия рушд карда, истеҳсоли асал ба 8,1 тонна, моҳӣ то 20 тоннаро ташкил медиҳад. Меҳнати шабонарӯзии аҳли заҳмат имкон фароҳам овард,ки фаровонии маҳсулот дар ноҳия таъмин гардида, барои зиндагии шоистаи мардум заминаи хуб фароҳам оварад.

Бо мақсади саҳмгузоштан дар таъмини амнияти озуқавории мамлакат, ки яке аз ҳадафҳои асосии роҳбарияти олии кишвар ба ҳисоб меравад кишоварзони ноҳия кушиш барон менамоянд, ки аз як қитъа замин ду се ҳосил ба даст оранд. Айни замон дар ноҳияи Дӯстӣ зиёда аз ду ҳазор хоҷагии деҳқонӣ амал менамоянд, ки истеҳсоли меваҷот, полезӣ, сабзавот ва зироати ғаладонагӣ нисбат ба чанд соли қаблӣ ба маротиб афзудааст.

Шиносоӣ бо фаъолияти самарабахши Ҷамъияти дорои масъулияти маҳдуди Иттиҳоди Аграрии “Водии Заррин”

17 августи соли 2017 дар доираи сафари корӣ дар ноҳияи Ҷайҳуни вилояти Хатлон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолияти самарабахши Ҷамъияти дорои масъулияти маҳдуди Иттиҳоди Аграрии “Водии Заррин” аз наздик шинос шуда, бо коргарону мутахассисони он суҳбати самимӣ доир карданд.

Иттиҳоди Аграрии “Водии Заррин” бо ҳидояти Пешвои миллат муҳтарам Эмомалӣ Раҳмон аз тарафи соҳибкори ватанӣ Фирдавс Валиев таъсис ёфта, баҳри татбиқи яке аз ҳадафҳои асосию стратегии Ҳукумати ҷумҳурӣ — таъмини амнияти озуқаворӣ, инчунин истифодаи самараноки замин ба хотири беҳдошти зиндагии аҳолӣ, равона гардидааст.

Ҷамъияти дорои масъулияти маҳдуди Иттиҳоди Аграрии “Водии Заррин” моҳи ноябри соли 2016 таъсис ёфта, ҳамчун субъекти хоҷагидорӣ дар соҳаи истеҳсолу коркарди маҳсулоти кишоварзӣ, аз ҷумла пахта, шолӣ ва гандум дар ҳудуди вилояти Хатлон фаъолият дорад.

Дар заминҳои Иттиҳоди аграрии “Водии Заррин” Президенти мамлакат муҳтарам Эмомалӣ Раҳмон бо парвариши шолӣ ва пахта аз наздик шинос шуда, ба фаъолияти самараноки меҳнаткашони ин хоҷагии пешқадам баҳои баланд доданд.

Масоҳати умумии заминҳои хоҷагӣ 12 ҳазор гектарро ташкил медиҳад, ки аз ин миқдор то имрӯз 6 ҳазору 700 гектари он ба гардиши кишоварзӣ дароварда шуд. Дар заминҳои азхудкардашуда аз ҳисоби кишти ғалладонагиҳо ва пахта ҳосили дилхоҳ ба даст оварда мешавад. Дар Иттиҳоди Аграрии “Водии Заррин” беш аз 2 ҳазор нафар бо кор таъмин мебошанд.

Соли 2015 Президенти мамлакат дар доираи амалӣ кардани “Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда дар Ҷумҳурии Тоҷикистон барои солҳои 2012-2020”, ба роҳбарияти Ҷамъияти дорои масъулияти маҳдуди Иттиҳоди Аграрии “Водии Заррин”  дастур доданд, ки майдони 8 ҳазору 874 гектар заминро ба гардиши кишоварзӣ дароранд. Дар натиҷаи истифодабарии техникаи муосир ва ҷалби мутахассисони баландихтисоси соҳавӣ давоми солҳои 2015-2016 марҳила ба марҳила майдони зиёда аз 6 ҳазору 700 гектар заминҳои бекорхобида барқарор гардид.

Баҳри амалӣ гардидани маҷмуъи корҳои барқарорсозӣ дар заминҳои ҷудогардида аз тарафи ҷамъият 220 адад техникаи гуногунтамғаи кишоварзӣ, сохтмонию гидромелиоративӣ ва ғайра ворид карда шуд. Дар Иттиҳоди Аграрии «Водии заррин» се намуди маҳсулот ғалла, шолӣ ва пахта бо усули муосир кишт ва обмонӣ мешаванд.

Президенти мамлакат истифодаи усули нави обмонӣ ва ҷорӣ намудани онро дар дигар хоҷагиҳо манфиатовар арзёбӣ намуданд. Бино ба таъкиди Пешвои миллат муҳтарам Эмомалӣ Раҳмон бо ин усул об  дуруст  истифода гардида, шусташавии замин низ нигоҳ дошта мешавад.

Соли ҷорӣ ҷамъияти мазкур дар майдони 2 ҳазору 21 гектар кишти маҳсулоти ғалладонагии гандум, 1 ҳазору ҳаштсаду се гектар пахта, дар майдони 2 ҳазору 870 гектар кишти шолӣ гузаронида, беш аз 2 ҳазор нафар сокинони маҳҳалиро бо кор таъмин карданд.

Баъди шиносоӣ бо фаъолияти пурсамару ибратбахши Ҷамъияти дорои масъулияти маҳдуди Иттиҳоди Аграрии “Водии Заррин” дар ҳамин ҷо Сарвари давлат муҳтарам Эмомалӣ Раҳмон намоишгоҳи дастовардҳои меҳнатии коргоҳҳои пахтатозакунӣ, коркарди шолӣ ва истеҳсоли биринҷ, намоиши маҳсулоти кишоварзиву саноатиро тамошо карданд.

Дар намоишгоҳ аз ҷониби хоҷагидорону деҳқонон ҳама намуди маҳсулот ба маъраз гузошта шуд. Ноҳияи Ҷайҳун дар ҷумҳурӣ аз ноҳияҳои калони аграрӣ буда, шуғли асосии сокинонаш зироаткорӣ аст ва фаъолияти кишоварзонаш асосан дар самти парвариши сабзавоту полезӣ, шолӣ ва лиму миёни деҳқонони дигар ноҳияҳо пайваста мавриди омӯзиш қарор мегирад. Соли равон аз ҳисоби ҳамаи хоҷагиҳои деҳқонӣ ва инфиродии ноҳия дар майдони зиёда аз 15 ҳазор гектар кишти зироатҳои гуногун, аз қабили ғалладонагӣ, полезӣ, сабзавот ва пахта кишт карда, дехконон бо истифодаи самараноку оқилонаи замин ба нишондодхои назаррас ноил мегарданд.

Дар ҳамин ҷо баробари маҳсулоти кишоварзӣ ҳамзамон чорво ва техникаҳои гуногуни соҳавӣ, инчунин ҳунарҳои мардумӣ намоиш дода шуд.

Дастовардҳои меҳнатии коргарони Ҷамъияти дорои масъулияти маҳдуди Иттиҳоди Аграрии “Водии Заррин” ва нақшаҳои дурнамои корхона дар намоишгоҳ ҷойи махсусро гирифта буд, ки аз тарафи роҳбарияти хоҷагӣ муаррифӣ гардид.

Фаъолияти бахшҳои хоҷагии халқи ноҳияи Ҷайҳун давоми 25 соли соҳибистиқлолӣ дар мулоқот бо фаъолону сокинони ноҳия ва коргарони корхона натиҷагирӣ карда шуд.

Шиносоӣ бо фаъолияти корхонаҳо ва рафти корҳои сохтмонӣ дар Минтақаи озоди иқтисодии «Панҷ»

Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари худ ба вилояти Хатлон бо фаъолияти корхонаҳо ва рафти корҳои сохтмонӣ дар Минтақаи озоди иқтисодии «Панҷ» шинос шуданд.

Мавриди зикр аст, ки Минтақаи озоди иқтисодии «Панҷ» дар мавзеъи Сари пули ноҳияи Ҷайҳуни вилояти Хатлон соли 2008 дар асоси Қарори Ҳукумати Ҷумҳурии Тоҷикистон «Дар бораи таъсиси минтақаҳои озоди иқтисодии «Панҷ» ва «Суғд»» ба муҳлати 25 сол ташкил шудааст. Шакли фаъолияти Минтақаи озоди иқтисодии «Панҷ» комплексӣ ва тиҷоратӣ буда, масоҳати умумии он 401,6 гектарро дар бар мегирад. То ин вақт аз масоҳати умумии заминҳои минтақа 18,7 гектар аз худ карда шудааст.

Аз ҷониби Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Минтақаи озоди иқтисодии «Панҷ» барои бунёди боз се корхона, аз ҷумла ҶСШП «Бурок», ҶДММ «Танус» ва ҶДММ «Глобал» санги асос гузошта шуд.

Тавре маълум гардид дар оянда ҶСШП «Бурок» дар масоҳати 0,5 гектар бунёд шуда, самти фаъолияти он тиҷорат ва истеҳсоли равғани растанӣ мебошад. Ҳаҷми самоягузорӣ дар ин корхона 2 млн. долларро дар бар мегирад. Иқтидори истеҳсолии корхонаи мазкур дар як сол 2 ҳазор литр равғани офтобпараст буда, маҳсулоти тайёр асосан содирот мегардад ва инчунин дар бозори дохилӣ ба фурӯш гузошта мешавад. Дар асоси нақша равғани истеҳсолнашуда ба Ҷумҳуриҳои Исломии Афғонистон ва Покистон интиқол дода мешавад. Ашёи хом ба ин корхона асосан аз хоҷагиҳои кишоварзии малакат ва инчунин аз хориҷи кишвар дастрас мегардад.

Бо мавриди истифода қарор гирифтани ин корхонаи истеҳсолӣ 30 нафар сокинони маҳаллӣ бо ҷойи корӣ доимӣ ва маоши хуб таъмин мешаванд.

Ба Пешвои миллат муҳтарам Эмомалӣ Раҳмон иттилоъ дода шуд, ки қитъаи ҷудогардида барои ҶДММ «Танус» 1 гектарро ташкил медиҳад. Самти фаъолияти ин корхона бошад ба истеҳсоли пойафзол нигаронида шудааст. Ҳаҷми сармояе, ки барои бунёди корхонаи истеҳсоли пойафзоли ҶДММ «Танус» равона гардидааст 700 ҳазор доллар мебошад. Иқтидори истеҳсолии корхонаи мазкур дар як сол ба 500 ҳазор ҷуфт пойафзол баробар аст. Бо мавриди баҳрабардорӣ қарор гирифтани ин корхонаи истеҳсолӣ дар Минтақаи озоди иқтисодии «Панҷ» боз 50 ҷойи нави корӣ таъсис меёбад. Дар корхона пойафзоли гуногуни мардона ва занона истеҳсол карда мешавад. Тибқи нақша пойафзоли дар ин корхона истеҳсолшуда ба Ҷумҳуриҳои Ҳиндустон, Шриланка, Афғонистон, Покистон, Қирғизистон ва Ӯзбекистон содирот карда шуда, инчунин дар бозорҳои Ҷумҳурии Тоҷикистон ба фурӯш гузошта мешавад.

Корхонаи дигаре, ки барои бунёди он аз тараифи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон санги асос гузошта шуд ҶДММ «Глобал» мебошад. Дар ин корхона чӯткаи дандон (зубная щётка) истеҳсол карда мешавад ва масъулон нақша доранд дар оянда истеҳсоли хамираи дандоншӯиро низ ба роҳ монанд.

Корхонаи истеҳсолии ҶДММ «Глобал» дар масоҳати 1 гектар сохта мешавад ва ҳаҷми сармояи нигаронидашуда барои бунёди он 500 ҳазор доллар мебошад. Иқтидори истеҳсолии корхона дар як сол ба 1 млн. дона чӯткаи дандон баробар аст. Маҳсулоти истеҳсолнамудаи ин корхона низ ба Ҷумҳуриҳои Исломии Афғонистону Покистон, Федератсияи Россия ва Қазоқистону Ӯзбекистон содирот карда шуда, ҳамчунин дар бозори дохилӣ пешниҳоди сокинон мегардад.

Зимни муаррифии лоиҳаҳо ба Сарвари давлат муҳтарам Эмомалӣ Раҳмон иттилоъ дода шуд, ки дастгоҳу таҷҳизоти корхонаҳои мазкур қисман дастрас гардидаанд ва муҳлати бунёди ҳар се корхона 1 сол муайян шудааст.

Дар баробари гузоштани санги асос барои бунёди се корхонаи азими саноати Пешвои миллат дар Минтақаи озоди иқтисодии «Панҷ» хати оби нӯшокиро мавриди баҳрабардорӣ қарор доданд. Тавре иттилоъ дода шуд, об ба ин минтақа аз дарёи Панҷ ба масофаи 4700 метр бо қубури қутраш 315 оварда шудааст. Об аз дарё ба воситаи се пойгогоҳи обкашӣ гирифта шуда, дар се обанбори ғунҷоишашон 1000 метри мукааб захира карда мешавад. Ҳамчунин дар назди обанборҳо дастгоҳҳои муосири обсофкунӣ насб карда шудааст. Барои обтаъминкунии субъектҳо дар ҳудуди минтақа 4 нуқтаи обтақсимкунӣ бунёд гардидааст. Имрӯз дар баробари корхонаҳои Минтақаи озоди иқтисодии «Панҷ» инчунин аҳолии гирду атроф, ки 100 хоҷагиро ташкил медиҳанд бо оби тозаи ошомиданӣ таъмин шуданд. Маблағи умумии барои хати оби нӯшокӣ масрафшуда 2 млн. 256 ҳазор сомониро ташкил медиҳад.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ин минтақаи озоди иқтисодӣ ҳамчунин корхонаи истеҳсоли ғулачаҳои ҷуворимаккаро ба истифода супориданд. Ба Пешвои миллат хабар доданд, ки корхона дар масоҳати 0,2 гектар бунёд карда шуда, иқтидори истеҳсолии он дар як сол ба коркарди 100 тонна ҷуворӣ баробар аст. Дар ин ҷо 20 нафар бо ҷойи кор таъмин шудаанд. Барои бунёди корхонаи мазкур аз тарафи ҶСП «Ансор групп» 100 ҳазор доллар равона гардидааст. Маҳсулоти истеҳсолнамудаи ин корхона баробари ба фурӯш гузоштан дар ҳудуди вилояти Хатлон инчунин ба Ҷумҳурии Исломии Афғонистон содирот карда мешавад.

Дар ин ҷо Сарвари давлат муҳтарам Эмомалӣ Раҳмон бо шароити кори кормандон шинос шуда, ба масъулон ҷиҳати сифатнок истеҳсол кардани маҳсулот дастуру ҳидоятҳои муфид доданд.

Чунончи ба Сарвари давлат муҳтарам Эмомалӣ Раҳмон иттилоъ дода шуд, дар ин минтақа 14 субъект ба қайд гирифта шудааст ва имрӯз ду корхонаи истеҳсоли масолеҳи сохтмонӣ ва як корхонаи хизматрасонии логистикӣ фаъолият дорад. Дар корхонаҳои истеҳсоли масолеҳи сохтмонии Минтақаи озоди иқтисодии «Панҷ» дар як сол имкон аст ба миқдори 180 ҳазор сомонӣ истеҳсолот ба роҳ монда шавад. Дар шаш моҳи аввали соли ҷорӣ дар Минтақаи озоди иқтисодии «Панҷ» ба маблағи 82,6 ҳазор сомонӣ маҳсулоти саноати истеҳсол гардида, ҳаҷми ҷалби сармоя дар ин давра ба 1,7 млн. сомонӣ баробар мебошад. Аз аввали фаъолият бошад дар ин минтақа ба миқдори 501,5 ҳазор сомонӣ маҳсулот истеҳсол карда шуда, бештар аз 6 млн. сомонӣ сармоя ҷалб гардидааст. Имрӯз дар корхонаҳои Минтақаи озоди иқтисодии «Панҷ» 300 ҷои кори доимӣ ва муваққатӣ таъсис дода шудааст.

Тибқи иттилоъ аз аввали таъсисёбӣ барои нигоҳдорӣ ва бунёди инфрасохтори аввалиндараҷа дар Минтақаи озоди иқтисодии «Панҷ» аз ҳисоби буҷети ҷумҳурӣ 5 млн. 800 ҳазор ва ҳисоби даромади худи минтақа 870 ҳазор сомонӣ маблағ равона гардида, то имрӯз сохтмони деворбандии ҳудуди минтақа, бинои назорати гумрукӣ, роҳи дохилӣ ва пайвастшавии он ба шоҳроҳи Душанбе-Панҷи поён ба анҷом расонида шудааст. Имрӯз ин минтақа бо барқ ба пуррагӣ таъмин мебошад.

Ҳамчунин маълум шуд, ки дар Минтақаи озодии иқтисодии «Панҷ» ҶДММ «Фон-Дарё», фаъолият дошта, дар рӯзҳои наздик корхонаи он ба кор андохта мешавад. Самти фаъолияти ҶДММ «Фон-Дарё» коркарди нафт, маҳсулоти нафтӣ ва биоэтанол мебошад. Корхона бо харҷи 600 ҳазор доллар бунёд карда шудааст ва қитъаи замини ҷудогардида 0,7 гектарро дар бар мегирад. Ҳаҷми солонаи истеҳсолот дар корхонаи мазкур ба коркарди 20 ҳазор тонна нафт баробар аст. Бо мавриди истифода қарор гирифтани ин корхонаи саноатӣ 28 нафар бо ҷойи кори доимӣ таъмин мешаванд. Корхонаи мазкур аз тарафи соҳибкори ватанӣ Шоҳназар Абдуллоев бунёд карда шудааст.

Дар ин баробар дар масоҳати 0,20 гектар сохтмони сардхона бо ғунҷоиши 300 тонна маҳсулоти кишоварзӣ идома дорад. Сардхонаи мазкур аз тарафи соҳибкори ватанӣ бунёд карда шуда, ҳаҷми сармояи муайянгардида 50 ҳазор доллар мебошад. Сардхона низ дар рӯзҳои наздик ба истифода дода мешавад.

Пешвои миллат муҳтарам Эмомалӣ Раҳмон зимни боздид аз корхонаҳо ва рафти сохтмонҳо дар Минтақаи озоди иқтисодии «Панҷ» ба масъулон ҷиҳати бо сифат анҷом додани корҳои бунёдгарӣ ва истеҳсоли маҳсулоти рақобатпазир дар бозори ҷаҳонӣ дастуру ҳидоятҳои муфид доданд.

Иштирок дар маросими баҳрабардорӣ қарор гирифтани зеристгоҳи нави 220\110\10 киловаттаи «Геран-2»

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ бо вазъи зиндагии мардум, ифтитоҳи як зумра иншооти таъйиноти гуногун, боздид аз фаъолияти хоҷагиҳои деҳқонӣ ва суҳбату мулоқот ба ноҳияи Ҷайҳуни вилояти Хатлон ташриф оварданд.

Сарвари давлатро дар варзишгоҳи «Пахтакор»-и ҷамоати деҳоти Панҷи ноҳияи Ҷайҳун бо шукргузорӣ аз сулҳу суботи комил ва арҷгузорӣ ба хизматҳои шоёни Пешвои маҳбуби худ, роҳбарияти ноҳия, фаъолону собиқадорон, ҷавонони ватандӯст ва аҳли илму фарҳанг бо самимияти беандоза истиқбол намуданд.

Дар ноҳияи Ҷайҳуни вилояти Хатлон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нахуст дар маросими мавриди баҳрабардорӣ қарор гирифтани зеристгоҳи нави 220\110\10 киловаттаи «Геран-2» иштирок намуданд.

Иттилоъ дода шуд, ки зеристгоҳи мазкур дар доираи лоиҳаи «Минтақавии интиқоли неруи барқ» дар асоси Созишномаи грантӣ, ки 16 сентябри соли 2010 миёни Ҳукумати Ҷумҳурии Тоҷикистон ва Бонки Рушди Осиё ба имзо расидааст, бунёд гардид.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар дохили бинои идоракунӣ ва назоратӣ бо пахши тугма ба фаъолияти ин иншооти азими энергетикии мамлакат оғози расмӣ бахшиданд.

Дар зеристгоҳи нави «Геран-2» бинои идоракунии назоратӣ бунёд гардидааст, ки бо таҷҳизоти замонавӣ муҷаҳҳаз гардонида шуда, ҳамаи дастгоҳҳои зеристгоҳ тавассути технологияи компютерӣ идора ва назорат карда мешаванд.

Зикр гардид, ки мақсади асосии сохтмони зеристгоҳи нави «Геран-2», ин пеш аз ҳама, васеъ ва таҷдид намудани системаи интиқоли барқи қисмати ҷануби Ҷумҳурии Тоҷикистон мебошад, ки барои савдои минтақавии неруи барқ мусоидат менамоянд.

Аз тарафи дигар ин иншооти муосир дар паст кардани талафоти қувваи барқ ва беҳтар кардани эътимоднокии таъминоти барқ дар минтақаи ҷануби Тоҷикистон мебошад.

Президенти Ҷумҳурии Тоҷикистон муҳтарам Эмомалӣ Раҳмон зимни шиносоӣ бо дастгоҳу таҷҳизоти навтарини ин зеристгоҳ, ки бо технологияи пешрафтаи ширкатҳои ҷаҳонӣ муҷаҳҳаз гардидааст, ба он баҳои баланд доданд.

Иттилоъ дода шуд, ки зеристгоҳи нави «Геран-2»-и ноҳияи Ҷайҳун дар майдони 7 гектар доман густурда, барои бунёди он дар маҷмӯъ беш аз 21 миллиону 500 ҳазор доллар сарф шудааст.

Ба Пешвои миллат муҳтарам Эмомалӣ Раҳмон иттилоъ доданд, ки корҳои сохтмонӣ ва васлу насби таҷҳизоти барқӣ дар зеристгоҳи нави «Геран-2» аз ҷониби Консорсиуми «Алстом-Генсер» ва зерпудратчиёни лоиҳа-ҷамъиятҳои дорои масълияти маҳдуди «Интеграл», «Тоҷиккурортстрой» ва «Барқсоз»-и Ҷумҳурии Тоҷикистон ҷавобгӯ ба меъёрҳои байналмилалӣ бо сифати баланд амалӣ гардид.

Тибқи шартнома таҷҳизот аз давлатҳои пешрафтаи ҷаҳон, аз ҷумла Франсия, Италия, Туркия, Чин ва Ҷумҳурии Қазоқистон ворид гардида, дар корхонаҳои истеҳсолкунанда пурра аз санҷиши техникӣ бо муваффақият гузаронида шудаанд.

Ду хати интиқоли барқи 220 (кВ) киловолтаи зеристгоҳи нави «Геран-2» бо Неругоҳи барқи обии «Сангтӯда 1» ва як хати интиқоли барқӣ 220 (кВ) киловолта бо зеристгоҳи «Колхозобод» пайваст мебошанд.

Хати интиқоли барқи дузанҷираи 220 кВ ва як хати интиқоли барқи 110 кВ неруи барқ аз зеристгоҳи нави «Геран-2» ба Ҷумҳурии Исломии Афғонистон неруи барқи истеҳсоли ҷониби Тоҷикистонро содирот мекунанд.

Таъкид шуд, ки баъди мавриди истифода қарор гирифтани иншооти мазкур эътимоднокии таъминоти барқ ба аҳолӣ ва хоҷагии халқи ноҳияҳои Ҷайҳун, Панҷ, Дӯстӣ ва Ҷалолиддини Румӣ бештар хоҳад гардид.

Баъди дидани имконияти зеристгоҳи замонавӣ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кормандони собиқадору ҷавони шабакаҳои барқи ноҳияи Ҷайҳуни вилояти Хатлон суҳбати озоду созанда доир намуд.

Сардори давлат кормандони соҳаро ба хизмати софдилонаю содиқона ва истифодаи дурусти ин технологияи муосир ҳидоят карданд.