Оғози сафари корӣ ба ноҳияи Шамсиддин Шоҳини вилояти Хатлон

Субҳи рӯзи 13-уми сентябри соли 2017 Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ аз вазъи зиндагии мардум, ҷараёни корҳои бунёдкориву созандагӣ, ифтитоҳи як қатор иншооти муҳими хоҷагии халқ ва суҳбату мулоқот бо сокинону фаъолон ба ноҳияи Шамсиддин Шоҳини вилояти Хатлон ташриф орваданд.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро роҳбарият ва сокинони сарбаланду меҳнатқарини ноҳияи Шамсиддин Шоҳин бо самимияти хосса ва арҷгузорӣ ба хизматҳои шоёни Сарвари давлат муҳтарам Эмомалӣ Раҳмон ба нафъи давлату миллат истиқбол гирифтанд.

Пазироии самимии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби сокинони ин ноҳияи кӯҳистон нишонаи пуштибонии онҳо аз сиёсати бунёдкоронаву созандаи роҳбарияти олии мамлакат мебошад.

Дар деҳоти Шӯрообод ноҳияи Шамсиддин Шоҳини вилояти Хатлон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вазъияти тантанавӣ бо буридани лентаи рамзӣ бинои маъмурии шуъбаи Раёсати Кумитаи давлатии амнияти миллии Ҷумҳурии Тоҷикистонро дар ноҳияи Шамсиддин Шоҳин мавриди баҳрабардорӣ қарор доданд.

Аснои шиносоӣ бо бинои маъмурии навбунёд ба Сарвари давлат муҳтарам Эмомалӣ Раҳмон иттилоъ доданд, ки корҳои сохтмонии ин иншоот моҳи марти соли 2014-ум оғоз гардида, он бо харҷи як миллону 700 ҳазор сомонӣ бунёд карда шудааст.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ифтитоҳи бинои навро,ки дар он шароити хуби корӣ фароҳам оварда шудааст, дар рӯзҳои таҷлил аз 26 солагии Истиқлолияти давлатӣ туҳфаи арзанда барои кормандони Кумитаи давлатии амнияти миллӣ дар ноҳияи Шамсиддин Шоҳин арзёбӣ карданд ва онҳоро ба хизмати софдилонаву содиқона ба нафъи халқу Ватан ва таъмини амнияту оромӣ ҳидоят намуданд.

Бинои мазкур аз 3 ошёна иборат буда, дорои 6 утоқи корӣ, маҷлисгоҳ ва дигар иншооти зарурӣ мебошад.

Дар бинои навсохт ҳамчунин барои кормандони шуъба манзили истиқоматӣ бунёд карда шудааст, ки шароити хуби зист доранд. Дар ҳамин рӯз Сарвари давлат муҳтарам Эмомалӣ Раҳмон ба кормандони соҳа калиди хонаҳои таъмин бо ашёи рӯзгорро тақдим намуданд.

Фармоишгари ин иншоот Кумитаи давлатии амнияти миллии Ҷумҳурии Тоҷикистон буда, пудратчии он Ҷамъияти дорои масъулияти маҳдуди «Сабр» мебошад.

Масоҳати умумии мавзеи шуъбаи Раёсати Кумитаи давлатии амнияти миллӣ дар ноҳияи Шамсиддин Шоҳин бунёдшуда 0,29 гектарро ташкил медиҳад.

Мавриди баҳрабардорӣ қарор додани чунин бинои хуштарҳу замонивиро кормандони ин ниҳоди қудратии мамлакат ҳамчун туҳфаи беназири Пешвои миллат муҳтарам Эмомалӣ Раҳмон дар рӯзҳои таҷлил аз ҷашни 26-солагии Истиқлолияти давлатии Ҷумҳурии Тоҷикистон пазируфтанд

Умуман таъмини шароити арзандаи зиндагӣ ва фаъолият барои кормандони мақомоти қудратии мамлакат, пайваста дар мадди назари аввали роҳбарияти давлату Ҳукумати Ҷумҳурии Тоҷикистон қарор дошта, барои онҳо марҳила ба марҳила дар ҳамаи шаҳру ноҳияҳо шароити арзандаи корӣ ва зиндагонӣ фароҳам оврада мешавад.

Мулоқот бо Президенти Бонки Исломии Рушд Бандар Ҳамза Ҳаҷҷар

Имрӯз дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Президенти Бонки Исломии Рушд Бандар Ҳамза Ҳаҷҷарро ба ҳузур пазируфтанд.

Дар мулоқот масъалаҳои ҳамкории имрӯза ва дурнамои равобити Тоҷикистон бо ин ташкилоти бонуфузи молиявӣ баррасӣ карда шуд.

Президенти мамлакат муҳтарам Эмомалӣ Раҳмон аз рушди ҳамкории созандаи дуҷониба давоми 20 сол дар самти татбиқи як қатор лоиҳаҳои афзалиятноки соҳаҳои маориф, тандурустӣ, энергетика, нақлиёт, обёрӣ ва заминсозӣ изҳори қаноатмандӣ карданд.

Таъкид гардид, ки аз оғози ҳамкорӣ бо бонк маблағи зиёда аз 335 миллион доллари амрикоӣ барои татбиқи лоиҳаҳои афзалиятнок равона гардидааст. Айни ҳол, дар кишвар ба маблағи зиёда аз 173 миллион доллари амрикоӣ 7 лоиҳаи сармоягузорӣ дар самти маориф, паст кардани сатҳи камбизоатӣ, энергетика, обёрӣ намудани заминҳо ва нақлиёт амалӣ шуда истодааст. Соли ҷорӣ аз тарафи Бонки Исломии Рушд ду лоиҳаи дигар — сохтмони ду қитъаи роҳи автомобилгарди Кӯлоб — Қалъаихумб ва лоиҳаи беҳтар намудани хадамоти саломатии модар ва кӯдак ҷонибдорӣ гардид.

Ҷонибҳо зимни мулоқот масъалаҳои татбиқи Стратегияи миллии рушди Тоҷикистон то соли 2030-ро, ки бо мақсади густариши рушди минбаъдаи иқтисодиёти кишвар қабул гардидааст, баррасӣ карданд.

Дар мулоқот омодагии Тоҷикистон барои ҳамкорӣ дар доираи барномаҳои Бонки Исломии Рушд, алалхусус, «Барномаи махсус барои Осиёи Миёна барои солҳои 2016 — 2020» ва «Фонди ҳаёт ва воситаҳои ҳаёт» таъкид карда шуд.

Нақши Донишкадаи давлатии санъат ва дизайни Тоҷикистон дар тарбияи кадрҳои рассомию дизайнерӣ

Имсол Донишкадаи давлатии санъат ва дизайни Тоҷикистонро беш аз 100 нафар донишҷӯ хатм карда, наздики 150 нафар ба он ҳуҷҷат супориданд.

Донишкадаи давлатии санъат ва дизайни Тоҷикистон бо иқдоми наҷибонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2013 ба фаъолият пардохта буд. Ҳадаф аз таъсиси ин донишкада тарбияи ҷавонон дар рӯҳияи ватандӯстию зебоипарастӣ ва тарғибу ташвиқи анъанаҳои ниёгон, аз қабили рассомию нақшакашӣ мебошад.

Фестивали ҷумҳуриявии бозиҳои миллии варзишӣ

Шоми дирӯз Фестивали ҷумҳуриявии бозиҳои миллии варзишӣ ягона манбаъе гардид, ки дар доираи тантанаҳои ҷашнӣ бахшида ба солгарди Истиқлолияти давлатӣ ва Соли ҷавонон тамоми варзишгарони мамлакатро ба ҳам овард.
Марҳилаи якум ва дуюми мусобиқаҳои ин Фестивал дар шаҳру ноҳияҳои мамлакат доир гардид. Аз 8-ум то 10-уми сентябр даври ниҳоии ин мусобиқот дар шаҳри Душанбе баргузор шуд. Дар расми интиҳои ин тадбири варзишӣ намояндагони Дастгоҳи иҷроияи Президенти Ҷумҳурии Тоҷикистон, Роҳбарияти Кумитаи кор бо ҷавонон ва варзиш, Вазорати фарҳанг, намоянадгони мақомоти иҷроияи ҳокимияти давлатии шаҳри Душанбе ва дигар шахсони расмӣ иштирок карда, дар айни ҳол баргузории мусобиқоти мазкурро фоли нек арзёбӣ намуданд.

Қобили зикр аст, ки Фестивали мазкур таҳти сарпарастии Президенти Федератсияи футболи Тоҷикистон, Раиси шаҳри Душанбе Рустами Эмомалӣ барпо шуда, ҳадаф аз он эҳёи бозиҳои миллии варзишӣ мебошад. Дар мусобиқаи гуштингирӣ дастаҳо аз шаҳри Душанбе, вилоятҳои Суғду Хатлон ва шаҳру ноҳияҳои тебеи марказ иштирок намуда, беҳтарин доварони мамлакат рафти онро назорат ва ҳакамӣ карданд. Ғолибони Фестивали ҷумҳуриявии бозиҳои миллии варзишӣ бо туҳфаҳо қадрдонӣ гаштанд.

Иштирок дар тантанаҳои идона ба ифтихори 26 — умин солгарди Истиқлолияти давлатии Ҷумҳурии Тоҷикистон

Шоми имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар тантанаҳои бошукуҳи идона ба ифтихори 26 — умин солгарди Истиқлолияти давлатии Ҷумҳурии Тоҷикистон, ки дар варзишгоҳи марказии пойтахт баргузор гардид, иштирок ва суханронӣ карданд.

Президенти мамлакат тамоми мардуми шарифи кишвар, сокинони пойтахт ва кулли ҳамватанони бурунмарзиро ба муносибати ҷашни мубораку муқаддаси умумимиллӣ — бистушашсолагии истиқлолияти давлатӣ самимона табрик гуфта, ба ҳар фарди худогоҳу худшиноси мамлакат бахту саодат ва дастовардҳои рӯзафзун орзу карданд.

Сарвари давлат зикр доштанд, ки истиқлолият ва озодӣ оғози марҳалаи сифатан нави таърихӣ гардид ва мо дар зарфи бисту шаш сол бо шарофати заҳмати софдилонаи халқ дар роҳи таъмини рушди сиёсиву иқтисодӣ ва иҷтимоиву фарҳангии мамлакат ба натиҷаҳои намоён ноил гаштем.

Президенти мамлакат муҳтарам Эмомалӣ Раҳмон бо қаноатмандӣ аз пешравиҳои ҷумҳурӣ ва тараққиёти бонизоми иқтисодиёт таъкид доштанд, ки халқи тоҷик давоми солҳои соҳибистиқлолӣ дар соҳаҳои ҳаётан муҳимми кишвар, аз ҷумла саноату энергетика, нақлиёту коммуникатсия, кишоварзӣ ва бахшҳои дигар ба дастовардҳои назаррас муваффақ шуда, дар соҳаҳои иҷтимоӣ, бахусус, илму маориф ва тандурустиву фарҳанг таҳаввулоти сифатиро таъмин намуд.

Дар охири суханронии хеш бо натиҷагирӣ аз дастовардҳои бахшҳои хоҷагии халқи мамлакат ва бо умеди гиромидошти муқаддасоти миллӣ Сарвари давлат муҳтарам Эмомалӣ Раҳмон бори дигар ҳозирин ва дар шахси онҳо кулли мардуми бофарҳангу тамаддунофари тоҷикро бо ин санаи муҳими таърихӣ табрику таҳният гуфтанд.

Баъд аз суханронии Президенти Ҷумҳурии Тоҷикистон муҳтарам Эмомалӣ Раҳмон, дар Варзишгоҳи марказии ҷумҳуриявӣ барномаи муҳташами фарҳангии ҳунармандону ҳаваскорон ва донишҷӯёни муассисаҳои олии таълимӣ баргузор гардид.

Барномаи театркунонидашудаи ҷашнӣ иборат аз суруду таронаҳо ва саҳнаҳои ҷолиби тараннумкунандаи арзишҳои волои миллӣ дар замони 26 соли истиқлолияти давлатии Ҷумҳурии Тоҷикистон манзури ҳозирин карда шуд, ки хеле ҷолибу диданӣ буд.

Мушакандозии бардавом анҷомбахши барномаи рангини консертӣ буд, ки хушу хотирмон сурат гирифт.

Мавриди зикр аст, ки чунин тадбирҳои бошукуҳи идона ба ифтихори ҷашни умумимиллӣ — 26 солагии Истиқлолияти давлатии Ҷумҳурии Тоҷикистон дар саросари кишвар ва берун аз он ба таври хос таҷлил карда шуд.