Шиносоӣ бо фаъолияти кооперативи тиҷоратии «Сомон»-и ноҳияи Бохтар

Субҳи имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба шаҳру ноҳияҳои вилояти Хатлон ба ноҳияи Бохтар ташриф оварданд.

Роҳбарият, фаъолон, аҳли илму ҳунар ва намояндагони ҷавонон Пешвои миллат муҳтарам Эмомалӣ Раҳмонро дар деҳоти Заргари ноҳия бо самимияти хосса истиқбол гирифтанд.

Сарвари давлат муҳтарам Эмомалӣ Раҳмон моҳи августи соли гузашта низ дар доираи сафари корӣ дар ноҳияи Бохтар як қатор иншооти гуногунро ифтитоҳ намуда, бо фаъолияти кишоварзон шинос ва бо фаъолони вилоят суҳбати самимӣ анҷом дода буданд.

Дар ноҳияи Бохтар Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нахуст бо фаъолияти аҳли заҳмати кооперативи тиҷоратии «Сомон» шинос шуданд.

Кооперативи тиҷоратии «Сомон» дар деҳоти Заргар 51,2 гектарро ташкил намуда, аҳли заҳмат ба боғдорӣ, зироаткорӣ ва чорводорӣ машғул ҳастанд.

Ба Пешвои миллат муҳтарам Эмомалӣ Раҳмон маълумот дода шуд, ки аз майдони умумии хоҷагӣ 4,7 гектарашро боғ, 2 гектарашро лиму, 30 гектарашро пахта ва 15 гектари дигарашро юнучқа ташкил медиҳад.

Парвариши лиму дар асоси омӯзишу таҷрибаи ғанӣ дар 10 гармхона ба роҳ монда шудааст, ки дар ҳар кадоми он вобаста ба ғунҷоиш аз 110 то 200 ниҳоли лиму парвариш меёбад.

Соли гузашта аҳли заҳмат бештар аз 42 тонна ҳосили лиму ба даст оварда буданд. Имсол бо назардошти он, ки шумораи гармхонаҳо 2 адад зиёд шуда, майдони умумии ниҳоли дарахтони ситрусӣ ба 2 гектар расонида шудааст, ҳосили интизории хоҷагидорон бештар аз 50 тонна лимуро ташкил медиҳад.

Ба Сарвари давлат Эмомалӣ Раҳмон иттило дода шуд, ки соли равон майдони гармхонаҳои лимупарварӣ дар ноҳияи Бохтар ба 60 гектар расонида шудааст, ки аз ин 20 гектараш майдони ҳосилдеҳ мебошанд.

Президенти Ҷумҳурии Тоҷикистон муҳтарам Эмомалӣ Раҳмон бо назардошти зиёд будани талабот ба чунин навъи маҳсулот омӯзиш ва ба таври васеъ ҷорӣ кардани таҷрибаи пешқадамро барои гирифтани ҳосили баланду дилхоҳ дар дигар хоҷагиҳо муҳим арзёбӣ намуданд.

Аҳли заҳмати кооперативи тиҷоратии «Сомон» имсол дар майдони 30 гектар чигити навъи «Хатлон 2014» кишт намудаанд ва ҳосили интизории кишоварзон аз ҳар гектар то 45 сентнериро ташкил медиҳад.

Дар маҷмуъ соли равон дар ноҳияи Бохтар дар майдони 11481 гектар кишти пунбадона гузаронида шудааст.

Ҳоло чорвои шохдор дар кооперативи тиҷоратии «Сомон» 150 сарро ташкил медиҳад ва ҷамъоварии хошок аз ҳисоби юнучқаи худи хоҷагӣ сурат мегирад.

Хоҷагиҳои хӯрди «Акбари Тоҷиддин», «Ҳалими Қаландар» ва «Хусрав 96» дар назди кооперативи тиҷоратии «Сомон» фаъолият доранд.

Соли равон дар маҷмуъ дар ноҳияи Бохтар дар майдони 17 594 гектар кишти зироатҳои гуногун гузаронида шудааст, ки нисбат ба соли 2016 8 гектар зиёд мебошад.

Дар ҳамин ҷо Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъулин, олимони соҳа ва хоҷагидорон дар ин ва дигар хоҷагиҳои шаҳру ноҳияҳои мамлакат барои гирифтани то 3 ҳосил аз як замин ва истифодаи мақсадноки он ҳидоятҳои муфид доданд.

Ифтитоҳи сардхонаи замонавӣ дар Ҷамоати деҳоти «Заргар»-и ноҳияи Бохтар

Дар Ҷамоати деҳоти «Заргар»-и ноҳияи Бохтари вилояти Хатлон Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маросими ифтитоҳи сардхонаи замонавӣ иштирок карданд.

Сардхона барои нигоҳдории маҳсулоти хоҷагии қишлоқ дар Ҷамоати деҳоти «Заргар»-и ноҳияи Бохтар дар асоси вазифагузориҳои пайвастаи роҳбарияти олии сиёсии Тоҷикистон бунёд гардида, ҳаҷми ғунҷоиши иншооти мазкур 2000 тонна мебошад.

Иншооти мазкур аз тарафи соҳибкори маҳаллӣ Назарбек Шарифов тавассути сармоягузории хориҷӣ сохта шуда, мақсад аз он дар фаслҳои тирамоҳу зимистон таъмин намудани аҳолӣ бо меваю сабзавоти тару тоза мебошад, ки ин раванд ба танзими нарху наво дар бозори истеъмолӣ низ мусоидати фаъол мекунад.

Дастандаркорони ин ташаббус хабар доданд, ки арзиши лоиҳавии ин сардхона 2,5 миллион сомонӣ буда, он дар давоми як сол бунёд ёфтааст.

Сарвари давлат муҳтарам Эмомалӣ Раҳмон ин иқдоми соҳибкорро намунавӣ хонда, бобати бештар кардани теъдоди чунин сардхонаҳо дар ҳудуди ноҳияи Бохтар ва дигар шаҳру навоҳии вилояти Хатлон масъулонро вазифадор карданд. Зеро вилояти Хатлон аз минтақаи калидии аграрии Тоҷикистон буда, таъминоти аҳолии ҷумҳурӣ бо аксар номгӯи маҳсулот аз ҳамин минтақа бастагии амиқ дорад.

Сипас Президенти Ҷумҳурии Тоҷикистон муҳтарам Эмомалӣ Раҳмон дар Ҷамоати деҳоти “Заргар” дар намоиши маҳсулоти кишоварзии хоҷагидорону барзгарони ин ноҳияи калони аграрии ҷумҳурӣ ширкат варзиданд. Дар намоишгоҳ намунаҳои дастранҷи деҳқонон ва дастовардҳои ҷомеаҳои меҳнатии ноҳияи Бохтар ба маърази тамошо гузошта шуд. Зикр гардид, ки айни замон дар ноҳияи Бохтар 1917 хоҷагӣ дар соҳаи кишоварзӣ ба қайд гирифта шудааст, ки аз ин теъдод 1861 адад хоҷагии деҳқонӣ, 4 адад хоҷагии ёрирасони тухмипарварӣ, 6 ширкати аграрӣ, 4 хоҷагии давлатӣ, 37 хоҷагии ҷамъиятӣ ва 5 ҷамъияти дорои масъулияти маҳдуд фаъолият менамоянд.

Кишоварзони ноҳия намунаи ҳосили ғалладона, сабзавоту полезӣ, мевагиҳо ва маҳсулоти занбӯри асалро ба намоиш гузоштанд, ки басо диданӣ буд. Маҳсулоти ба намоиш гузошташуда гувоҳӣ аз он медод, ки хоҷагидорону барзгарони ин ноҳияи калони вилояти Хатлон дар пайгирӣ аз дастуру супоришҳои роҳбарияти давлату Ҳукумат ба нишондодҳои баланди истеҳсолӣ ноил гардидаанд.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳангоми боздид аз намоишгоҳи маҳсулоти кишоварзӣ, ноҳияи Бохтарро аз зумраи минтақаҳои фаъол дар самти таъмини амнияти ғизоӣ дар сатҳи ҷумҳурӣ арзёбӣ карда, фаъолияти босамари деҳқонони кордон ва сокинони меҳнатқарини онро, ки дар истифодаи мақсадноки неъматҳои табиӣ, аз ҷумла обу замин пешқадам мебошанд, намунаи ибрат маънидод карданд.

Як гӯшаи дигари намоишгоҳро дастовардҳои саноатчиёни ноҳия оро медод. Бояд зикр намуд, ки дар давоми солҳои соҳибистиқлолӣ соҳаи саноат ҳам дар ноҳияи Бохтар рушди тадриҷӣ пайдо кардааст. Вобаста ба он ки соҳаи кишоварзӣ дар ноҳия хеле тараққикарда аст, фаъолияти аксари корхонаҳои саноатӣ ҳам ба коркарди маҳсулоти ҳамин соҳа нигаронида шудааст, яъне стратегияи давлатии табдил додани ҷумҳурӣ ба кишвари индустриаливу аграрӣ дар ин ноҳия тадриҷан амалӣ мешавад.

Тавре иттилоъ дода шуд, дар маҷмӯъ дар шаш моҳи сипаришудаи соли равон дар ноҳияи Бохтар дар ҳаҷми бештар аз 53 миллиону 863 ҳазор сомонӣ маҳсулоти саноатӣ истеҳсол шудааст, ки ин нишондод нисбат ба ҳамин давраи соли гузашта зиёд аст. Ҳамин тариқ дар намоишгоҳ маҳсулоти истеҳсолкардаи ширкатҳои ҶДММ “Бохтар – Инвест — Коттон”, ҶДММ “Коттон-Ансор”, ҶДММ “Ресандаи Хатлон”, ҶДММ “Муъмин-Коттон” ҶСШП “Мину — Фарм” ва амсоли ин ба маърази тамошо гузошта шуда буд.

Роҳбари давлати Тоҷикистон муҳтарам Эмомалӣ Раҳмон фаъолияти босамари корхонаҳои саноатиро ҳамчунин як воситаи муҳими таъмини мардум бо ҷойи кори доимӣ номида, аз саноатчиёни ноҳия даъват ба амал оварданд, ки сифати маҳсулоташонро боз ҳам беҳтар ва ба талаботи бозори ҷаҳонӣ мутобиқ гардонанд. Зеро маҳз сифати баланд ва намои зебои маҳсулот кафолати асосии таъмини фаъолияти бонизоми ҳар як корхонаи саноатӣ мебошад.

Ба истифода додани Мактаби №14 дар ҷамоати деҳоти Заргари ноҳияи Бохтар

Дар чаҳорчӯби боздиди корӣ аз ноҳияи Бохтар, Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Комсомоли ҷамоати деҳоти Заргари ноҳия дар расми мавриди баҳрабардорӣ қарор додани Муассисаи таҳсилоти миёнаи умумии №14 барои 1320 ҷойи нишаст дар ду баст иштирок варзиданд.

Хонандагони ин мактаб бо нишони арҷгузорӣ ба ғамхориҳои пайвастаи роҳбарияти олии сиёсии Тоҷикистон нисбат ба соҳаи маориф, Пешвои миллат муҳтарам Эмомалӣ Раҳмонро дар даромадгоҳи муассисаи таълимӣ бо самимияти беандоза истиқбол гирифтанд.

Хабар дода шуд, ки муассисаи мазкур тибқи нақшаи тарҳрезигардида барои 660 ҷойи нишаст бо назардошти 27 синфхона, аз ҷумла ҳафт кабинети фаннӣ, кабинети инкишофи кӯдак, утоқ барои директор ва муаллимон, қабулгоҳ, муҳосибот, утоқи ҳамшираи шафқат, се кабинет барои омӯзгорони тарбияи ҷисмонӣ, синфхонаҳои алоҳида барои гузаронидани дарсҳои иловагӣ бунёд ёфтааст. Инчунин сохтмони толори варзишӣ бо 183 ҷойи нишаст, корти теннис, толори маҷлисгоҳ бо 204 ҷойи нишаст, ошхона барои 60 нафар, китобхона бо 32 ҷойи нишаст, иншооти ёрирасони муассисаи зикршуда сифатан хуб ба анҷом расонида шудааст.

Аснои шиносоӣ Сарвари давлат бо хонандагону омӯзгорон суҳбати гарму самимӣ доир карда, муҳассилинро ба омӯзиши густурдаи илмҳои замонавӣ ва истифодаи самараноки имкониятҳои фароҳамшуда ҳидоят карданд.

Иттилоъ дода шуд, ки фармоишгари лоиҳаи мазкур Муассисаи давлатии Маркази татбиқи лоиҳаи «Сохтмон ва муҷаҳҳазгардонии мактабҳо» буда, корҳои лоиҳакашӣ, сохтмониву васлгарӣ ва таъмин намудани мебелу таҷҳизоти мактабиро ширкатҳои ватании ҶДММ «Панасия ЛТД», ҶДММ «Сари Хосор», ҶДММ «Нузам» ва ҶДММ «Арт Медиа» ба анҷом расониданд. Маблағгузории лоиҳа аз ҳисоби Фонди Саудии Рушд сурат гирифтааст.

Ба иттилои бошандагони атроф бинои кӯҳнаи мактаби рақами 14 ҳанӯз солҳои 50-60 асри гузашта сохта шуда, дар ҳолати садамавӣ қарор дошт. Зимнан теъдоди хонандагон дар муассисаи мазкур сол аз сол зиёд гардида, шумораи онҳо ба 2000 нафар расида, танқисии ҷойи нишаст пеш омада буд. Бо назардошти вазъи бамиёномада, лоиҳаи мактаб аз ҷониби Муассисаи давлатии Маркази татбиқи лоиҳаи «Сохтмон ва муҷаҳҳазгардонии мактабҳо» тарҳрезӣ гардида, аввали соли 2016 корҳои сохтмониву васлгарӣ оғоз шуданд.

Бинои нави Муассисаи таҳсилоти миёнаи умумии №14  аз чор қисмат иборат буда, масоҳати умумии қитъаи замини мактаб 2,33 гектарро дар бар мегирад.

 Маблағи умумии корҳои сохтмониву васлгарӣ бо назардошти фондҳои асосӣ, аз ҷумла сохтмон ва муҷаҳҳазгардонӣ бо мебелу таҷҳизот қариб 16 миллион сомониро ташкил дод.

Буғхона бо назардошти технологияи ҳозиразамон сохта шуда, аз деги буғӣ иборат мебошад, ки дар фасли зимистон имкон дорад тамоми утоқҳои биноро тавассути ангишт гарм нигоҳ дорад.

Таъкид гардид, ки сатҳ ва сифати таълиму тарбия дар муассисаҳои таълимии ноҳия назар ба солҳои пешин беҳтар шуда, хонандагони муассисаҳои таҳсилоти миёнаи умумии ноҳия дар олимпиадаи вилоятӣ иштирок ва соҳиби 66 ҷойи ифтихорӣ, аз ҷумла 9 медали тилло, 8 медали нуқра ва 49 медали биринҷӣ гардидаанд. Инчунин хонандагони ноҳияи Бохтар дар олимпиадаи ҷумҳуриявӣ соҳиби 2 медали тилло, 3 медали нуқра ва 10 медали биринҷӣ шудаанд.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баъди шиносоӣ бо корҳои сохтмонӣ ва анҷом додани суҳбатҳои созанда бо хонандагону муаллимони Муассисаи таҳсилоти миёнаи умумии №14, дар саҳни мактаб дар ҳузури намояндагони сершумори маорифчиён ва фаъолони ноҳияи Бохтар сухаронӣ карда, ба масоили беҳдошти сифати таълиму тадрис, тарбияи наслҳои имрӯза дар рӯҳияи илмомӯзиву ватандӯстӣ ва ҳифзу арҷгузорӣ ба фарҳангу тамаддуни миллати тоҷик ва дигар масъалаҳои дархӯри рӯз таваҷҷуҳ зоҳир карданд.

Гузоштани санги асос ба сохтмони бинои Коллеҷи аграрии вилояти Хатлон дар маркази ноҳияи Вахш

Дар деҳоти Рӯдакии ноҳияи Вахш Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо гузоштани санги асос ба сохтмони бинои Коллеҷи аграрии вилояти Хатлон оғози расмӣ бахшиданд.

Зимни муаррифии лоиҳаи ин иншоот ба Сарвари давлат муҳтарам Эмомалӣ Раҳмон иттилоъ доданд, ки арзиши лоиҳа  14 миллион сомониро ташкил дода, барои 600 нафар хонанда пешбинӣ шудааст.

Бинои мазкур аз 3 ошёна ва таҳхона иборат буда, дорои синфхонаҳои барҳавои таълимӣ, маҷлисгоҳ, майдони варзишӣ ва дигар иншооти ёрирасон мебошад.

Ҳамзамон дар шафати бинои Коллеҷ барои 400 нафар хобгоҳ сохта мешавад, ки аз 4 ошёна иборат хоҳад буд. Масоҳати умумии бино 3 ҳазору 494 метри мураббаъро ташкил медиҳад.

Президенти мамлакат муҳтарам Эмомалӣ Раҳмон ба масъулини дахлдор барои сари вақт ва босифат анҷом додани корҳои сохтмонӣ дар ин иншооти таълимӣ дастуру супоришҳои мушаххас доданд.

Фармоишгари иншоот Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон буда, лоиҳаи он аз тарафи Корхонаи воҳиди давлатии лоиҳакашии шаҳри Душанбе тарҳрезӣ шудааст.

Бо мақсади фароҳам сохтани шароити арзандаи таълим ва омодасозии мутахассисони баландихтисоси ба талаботи бозори меҳнат ҷавобгӯ бо дастгирӣ ва таваҷҷуҳи бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тадбирҳои судманд амалӣ карда шуда, дар ҳамаи шаҳру ноҳияҳои мамлакат муассисаҳои наву замонавии таълимӣ бунёд карда мешаванд.

Фестивал-озмуни ҷумҳуриявии “Бӯстон-2017” дар ноҳияи Варзоб

Чун дигар шаҳру ноҳияҳои тобеи марказ аҳли фарҳанги ноҳияи Варзоб низ сабти телевизионии Фестивал-озмуни ҷумҳуриявии “Бӯстон-2017”-ро доир карданд. Фестивали “Бӯстон” дар ин ноҳия низ ба таври хоса тантана дошт ва ҳавскорону истеъдодҳои ҷавон рӯйи саҳна ҳунарнамоӣ карданд.
Дар Фестивал-озмуни ҷумҳуриявии телевизионии эҷодиёти халқ “Бӯстон-2017” ҳаваскорони ноҳияи Варзоб 13 номераи ҳунарӣ пешниҳод карданд. Саломномаву маҳорати суханварӣ, навозишу рақс, суруду ҳаҷв аз қабили бахшҳои таҳиякардаи аҳли фарҳанги ноҳия буд ва аз миёни иштирокчиён аъзои ҳакамон тавонистанд чеҳраҳои навро пайдо кунанд.
Бояд гуфт, ки ҳадаф аз ташкили Фестивал-озмуни ҷумҳуриявии “Бӯстон-2017” кашфи истеъдодҳои ҷавону роҳнамоии онҳо ба саҳнаҳои бузурги ҳунарӣ мебошад. Агар дар ҳама шаҳру ноҳияҳои мамлакат аз ин истеъдодҳо якнафарӣ пайдо шаваду онҳо дастгирӣ ёбанд, метавон гуфт, ки Фестивал ба ҳадаф расид.