Фестивал-озмуни ҷумҳуриявии “Бӯстон-2017” дар ноҳияи Рӯшон

Дар ноҳияи Рӯшон низ Фестивал-озмуни телевизионии ҷумҳуриявии «Бӯстон-2017» бо омодагии пурра баргузор гардид. Ҳаваскорони ноҳияи Рӯшон дар ин Фестивал-озмун бо маҳорати баланд  ҳунарнамоӣ карданд.

Ҳайати ҳакамони Фестивал-озмун аз гӯшаи ҳунарҳои  мардумӣ, ки бахши якуми Фестивал аст, дидан намуданд. Ин зебогиву таровати ҳунари тоҷикони кӯҳистон бозгӯй аз он буд, ки Фестивал-озмуни телевизионии ҷумҳуриявии «Бӯстон-2017» дар ҳақиқат чорабинии ҷавонон буда, саривақтӣ ташкил гардидааст. Он аз ҷониби ҷавонони рӯшонзамин бо дилгармии хоса пазироӣ гардида, бо омодагии пурра ташкил карда шуд.

Ҳайати ҳакамон дар нуҳ номинатсия ҳаваскорони ноҳияи Рӯшонро бо дипломи Фестивал-озмуни телевизионии ҷумҳуриявии «Бӯстон-2017» қадрдонӣ намуданд.

Фестивали ҳунармандони халқӣ бахшида ба Рӯзи Истиқлолияти давлатӣ дар ноҳияи Ишкошим

Дар маркази ноҳияи Ишкошим фестивали ҳунармандони халқӣ баргузор шуд, ки дар он табибони мардумӣ, косибону бофандагон, ансамблҳои этнографӣ, донандагони урфу одат ва расму русуми миллӣ ширкат намуданд.

Тавре АМИТ “Ховар” иттилоъ додааст, Фестивал бо ибтикори созмони ҷамъиятии «Гулу гиёҳ», ки роҳбарии онро ҷарроҳ ва табиби мардумӣ Ширинбек Давлатмамадов бар дӯш дорад, баргузор гардид. Ба гуфтаи ин табиби мардумӣ, «мақсади фестивал эҳёи мероси табиӣ ва фарҳангии Бадахшон аст. Дар деҳоти ноҳияи Ишкошим косибону бофандагони зиёд ҳастанд, ки ҳунари ниёгони худро фаромӯш накардаанд ва аз маҳсулоти маҳаллӣ ашёи мухталифи рӯзгор  тавлид мекунанд. Аммо  азбаски дар деҳоти дурафтода зиндагӣ мекунанд, маҳсули ҳунари онҳо аз назари мардум дур мемонад. Ҳамчунин дар дараву кӯҳҳои ин ноҳия зиёда аз 200 намуди гулу гиёҳои дармонбахш мерӯянд ва табибони халқӣ аз онҳо дорую давои аз ҷиҳати экологӣ пок истеҳсол мекунанд, аммо на ҳама имкони сафар ба ин деҳотро доранд».

Созмони «Гулу гиёҳ» тасмим гирифтааст, ки дар маркази ноҳия барои ин ҳунармандон дуконҳо боз кунад, то онҳо тавонанд маҳсулоти дастии худро ба фурӯш гузоранд.

Бо дастгирии  созмони ҷамъиятии «Гулу гиёҳ» дар давоми панҷ соли охир китобу маҷаллаҳое, чун «Чашмаҳои маъдании дармонбахши Бадахшон», «Гилдармонӣ», «Тақвими ҷамъоварии набототи шифобахши Бадахшон», «Ганҷинаи Ғоронзамин» ва «Таомҳои миллии тоҷикони кӯҳистон» ба нашр расондаанд.

Дар Ҳуҷанд «Тоҷикшиноси бузург» рӯи чоп омад

Дар шаҳри Хуҷанд китоби «Тоҷикшиноси бузург» ба нашр расид. Ба иттилои АМИТ “Ховар” асари мазкур феҳристи китобу осор ва мақолаҳои илмиву оммавии Қаҳрамони Тоҷикистон академик Бобоҷон Ғафуров ва асарҳоеро, ки зери таҳрири ин олими номвар ба чоп расидаанд, фаро гирифтааст.

Ба иттилои Мақомоти иҷроияи ҳокимияти давлатии вилояти Суғд, дар китоб таълифоти роҷеъ ба ин шахсияти барҷастаи таърихи миллати мо бо забонҳои тоҷикӣ, русӣ ва англисӣ иншогардида низ ҷой дода шудаанд.

Муаллиф ва мураттиби китоб номзади илмҳои таърих, дотсенти Донишгоҳи давлатии Хуҷанд ба номи академик Бобоҷон Ғафуров- Аюбҷон Усмонов рўзгору осори академик Бобоҷон Ғафуровро бар асоси осори илмии таълифшуда мавриди таҳлил қарор додааст.

Мавриди зикр аст, ки китоби мазкур ба таври умум осорномаи академик Бобоҷон Ғафуровро аз соли 1928 то соли 2012 фаро мегирад ва туҳфаи арзанда ба ҷашни 110-солагии аллома Бобоҷон Ғафуров хоҳад буд.

Даъвати ансамблҳои рақсии Тоҷикистон ба чашнвораи IX байналмилалӣ дар Чеченистон

Вазорати фарҳанги Ҷумҳурии Чеченистони Федератсияи Россия ҳунарпешаҳои касбии рақсӣ ва ансамблҳои рақсии Тоҷикистонро барои иштирок дар ҷашнвораи IX байналмилалии рақс ба номи Маҳмуд Эсамбоев даъват менамояд. Тибҳи иттилои АМИТ “Ховар” ҷашнвора аз 15 то 20 октябри соли равон дар шаҳри Грознии Чеченистон баргузор мегардад.

Ба иттилои Вазорати фарҳанги Ҷумхурии Тоҷикистон, мақсад аз баргузории фестивал-озмун таҳкими робитаҳои фарҳангӣ байни кишварҳо, оммавигардонии санъати рақси халқҳои Федератсияи Россия ва кишварҳои хориҷӣ, ҳифзи анъана ва санъати рақсии халқҳои гуногун, дарёфти чеҳраҳои нав, дастгирии гурӯҳҳои рақсии амалкунанда ва ҷалби ҷавонон ба санъати хореографӣ мебошад.
Хоҳишмандони иштирок дар ин озмун бояд аз 15 август то 15 сентябр варақаи дархостиро ба кумитаи тадорукот пешниҳод намоянд.

Ғолибони даври аввали «Дунёи меҳр» муайян гардиданд

Даври аввали Фестивали ҳунарии ҷумҳуриявии нобиноён таҳти унвони «Дунёи меҳр» ба охир расид. Дар ин бора Вазорати фарҳанги Ҷумҳурии Тоҷикистон маълумот нашр кардааст.

Ба иттилои Вазорати фарҳанги ҷумҳурӣ, дар даври аввали фестивал, ки дар ҳама минтақаҳои кишвар баргузор гардид, 162 нафар хоҳишмандони аз 8 то 35-солаи нобино ё қувваи босираашон суст, ки дар навозиши асбобҳои миллӣ ва аврупоӣ, иҷрои сурудҳои фолклорӣ ва классикӣ, инчунин хониши бадеии шеъру тарона ва порчаҳои насрӣ истеъдод доранд, иштирок карда, 27 нафарашон ба даври ниҳоӣ роҳ ёфтанд.

Бояд зикр намуд, ки даври  ниҳоии фестивал 22-юми сентябри соли ҷорӣ дар  Филармонияи давлатии Ҷумҳурии Тоҷикистон ба номи А. Ҷӯраев баргузор мегардад.

Ҳадаф аз баргузории фестивал дарёфти чеҳраҳои нав ва ҷавон, истеъдодҳои нодир дар байни шахсони нобино ва қувваи босираашон суст, арҷ гузоштан ба мероси бойи аҷдодон, тарғибу ташвиқи санъати ниёгон ва муосири тоҷик, беҳтар ба роҳ мондани фаъолияти дастаҳои худфаъолияти бадеӣ дар назди филиалҳои Иттиҳодияи миллии нобиноёни Тоҷикистон, баланд бардоштани завқи зебоипарастӣ, хештаншиносии наврасону ҷавонон ва мустаҳкам намудани робитаи эҷодӣ байни ҳаваскорони санъат ва устодони варзидаи ҷумҳурӣ мебошад.