Ифтитоҳи бинои нави Муассисаи таҳсилоти миёнаи умумии №4 дар деҳаи Мирзоободи ноҳияи Абдураҳмони Ҷомӣ

Имрӯз ҳамчунин Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ бо ҷараёни корҳои бунёдкорию созандагӣ, ифтитоҳи як қатор иншооти таъйиноти гуногун, боздид аз фаъолияти хоҷагиҳои деҳқонӣ ва суҳбату мулоқот бо сокинону фаъолон ба ноҳияи Абдураҳмони Ҷомии вилояти Хатлон ташриф оварданд.

Дар даромадгоҳи ноҳия Президенти мамлакат муҳтарам Эмомалӣ Раҳмонро роҳбарият, фаъолону собиқадорон, намояндагони ҷавонон ва аҳли илму фарҳанг бо самимияти беандоза истиқбол намуданд.

Дар ноҳияи Абдураҳмони Ҷомии вилояти Хатлон Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нахуст дар расми мавриди баҳрабардорӣ қарор додани бинои замонавии Муассисаи таҳсилоти миёнаи умумии № 4 иштирок намуданд.

Ин бинои таълимӣ, ки барои 620 хонанда дар ду баст пешбинӣ шудааст, бо харҷи 2 миллиону 680 ҳазор сомонӣ бунёд гардида, дар ин ҷо барои таълиму тарбияи насли наврас тамоми шароиту имкониятҳои муосири илмомӯзӣ фароҳам мебошад.

Бинои асосии мактаб, ки аз ду ошёна иборат аст, дорои 10 синфхонаи муҷаҳҳази фаннӣ, аз ҷумла синфхонаи химия, биология, асосҳои кор бо компютер, физика, математика, омӯзиши забонҳои хориҷӣ, ҳунаромӯзӣ ва утоқҳои кории омӯзгорон буда, дар арафаи 26-умин солгарди Истиқлолияти давлатии Ҷумҳурии Тоҷикистон мавриди баҳрабардорӣ қарор гирифтани он барои омӯзгорону хонандагони ин муассисаи таълимӣ туҳфаи арзишманд ба ҳисоб меравад.

Зимни шиносоӣ бо шароити таълиму тарбия ба Президенти Ҷумҳурии Тоҷикистон муҳтарам Эмомалӣ Раҳмон иттилоъ доданд, ки  корҳои сохтмониро коргарону мутахассисони ҶДММ «Сорво» дар муҳлати бештар аз як сол дар асоси лоиҳа ва тарҳу услуби нотакрори сохтмонию меъморӣ бо сатҳу сифати баланд ба анҷом расониданд.

Ба таъкиди Пешвои миллат муҳтарам Эмомалӣ Раҳмон, аз рӯзҳои аввали соҳибистиқлолии мамлакат давлат ва Ҳукумати Ҷумҳурии Тоҷикистон дар самти рушди соҳаи маориф, алалхусус зиёд намудани теъдоди мактабҳои наву бо техникаву технологияи муосир муҷаҳҳаз намудани онҳо тадбирҳои муассир андешида, ҷиҳати мунтазам беҳтар намудани сатҳу сифати таълим таваҷҷуҳи доимӣ зоҳир менамояд. Бо ин мақсад аз омӯзгорону роҳбарияти мактаб даъват карда шуд, ки бо истифода аз шароити хуби дар ин муассиса муҳайёгардида, сатҳу сифати таълиму тарбияро беҳтар намуда, барои ба камол расонидани насли наврасу ҷавон дар рӯҳияи худшиносию худогоҳӣ ва аз худ намудани илмҳои замонавӣ аз таҷрибаи пешрафта истифода баранд.

Дар ин муассисаи таълимӣ ҳамчунин се синфхонаи ҳунаромӯзӣ, аз қабилӣ дуредгарӣ, дӯзандагӣ ва омода кардани таомҳои гуногун мавриди баҳрабардорӣ қарор гирифт, ки барои соҳибкасб гардидани духтарону писарони деҳаи мазур метавонанд нақши калон дошта бошанд.

Айни замон дар ин муассисаи таълимӣ 40 нафар омӯзгор ба зиёда аз 900 нафар хонандагон дарс мегӯянд.

Танҳо дар давоми 20 соли охир дар ноҳияи Абдураҳмони Ҷомӣ беш аз 30 муассисаи нави таълимӣ ба истифода дода шуд ва ҳамзамон дар асоси «Барномаи давлатии рушди муассисаҳои соҳаи маорифи вилояти Хатлон барои солҳои 2017-2021» дар ин ноҳия бунёди 14 иншооти замонавии дигар тарҳрезӣ гардидааст.

Мулоқот бо роҳбарону фаъолон ва сокинони ноҳияҳои Абдураҳмони Ҷомӣ ва Хуросони вилояти Хатлон

Дар ноҳияи Абдураҳмони Ҷомӣ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баъди шиносоӣ бо рафти корҳои саҳроӣ, дастовардҳои меҳнатии кишоварзон ва ифтитоҳи иншооти муҳим бо роҳбарону фаъолон ва сокинони ноҳияҳои Абдураҳмони Ҷомӣ ва Хуросони вилояти Хатлон мулоқоти самимию созанда доир карданд.

Зимни суханронӣ Сарвари давлат муҳтарам Эмомалӣ Раҳмон аз эҳсоси баланди худшиносию худогоҳии шаҳрвандон, ҷонибдории амиқи онҳо аз сиёсати созандаи ҳукумати кишвар изҳори қаноатмандӣ карда, ба онҳо азму иродаи қавӣ орзу намуданд.

Президенти мамлакат муҳтарам Эмомалӣ Раҳмон фаъолияти бахшҳои муҳими хоҷагии халқи ноҳияҳои Абдураҳмони Ҷомӣ ва Хуросонро натиҷагирӣ карда, таъкид доштанд, ки давоми солҳои соҳибистиқлолӣ аз тарафи роҳбарияти давлату Ҳукумати кишвар ба хотири рушду пешрафти ин минтақаҳои мамлакат аз ҳисоби буҷети давлат маблағҳои зиёд ҷудо гардид.

Аз ҷумла, таъкид гардид, ки дар даҳ соли охир ва нимсолаи аввали соли ҷорӣ барои таъмин намудани пешрафти иқтисодиву иҷтимоии ноҳияи Абдураҳмони Ҷомӣ аз ҳисоби буҷети давлатӣ 620 миллион сомонӣ равона гардидааст. Дар 15 соли охир дар ноҳия барои сохтмон ва таъмири муассисаҳои таълимӣ, рушди устувори соҳаи кишоварзӣ, барқарорсозии иншооти обрасонӣ ва обёрии заминҳо, мутобиқшавӣ ба тағйирёбии иқлим ва  рушди деҳот 6 лоиҳаи давлатии сармоягузорӣ ба маблағи умумии зиёда аз 35 миллион сомонӣ татбиқ шудааст. Ҳукумати мамлакат ба нақша гирифтааст, ки дар се соли оянда барои таъмин кардани тараққиёти ноҳия аз ҳисоби буҷети давлатӣ 270 миллион сомонӣ ҷудо намояд.

Пешвои миллат муҳтарам Эмомалӣ Раҳмон таваҷҷуҳи ҳозиринро ба масъалаи нигоҳдорӣ ва таъмиру таҷдиди роҳҳои маҳаллӣ, амалисозии лоиҳаҳо ва барномаҳои рушд, ободонии деҳот, маҳалҳои аҳолинишин, ҳолат ва фаъолияти корхонаҳои саноатӣ, таъсиси коргоҳҳои нав ва таъмини аҳолӣ бо шуғл ҷалб намуда, барои ислоҳи камбудию норасоиҳо ва бартараф кардани дигар мушкилоту монеаҳо дар ин самт ба мақомоти иҷроияи ҳокимияти давлатии ноҳияи Абдураҳмони Ҷомӣ ва як қатор вазорату идораҳои дахлдор дастуру супоришҳо доданд.

Президенти мамлакат дар идомаи суханронӣ вобаста ба рушди ноҳияи Хуросон таъкид доштанд, ки дар даҳ соли охир аз ҳисоби ҳамаи сарчашмаҳои маблағгузории буҷети давлатӣ барои тараққиёту пешрафти он беш аз 340 миллион сомонӣ равона карда шуда, ба ин мақсад дар се соли оянда зиёда аз 153 миллион сомонӣ пешбинӣ гардидааст. Ҷиҳати ҳалли мушкилоту масъалаҳои ҷойдошта ҳоло Барномаи рушди иҷтимоиву иқтисодии ноҳия барои солҳои 2016-2020 амалӣ шуда истодааст, ки 119 лоиҳаро ба маблағи умумии 210 миллион сомонӣ дар бар мегирад. Сарвари давлат муҳтарам Эмомалӣ Раҳмон зикр карданд, ки дар тӯли 15 соли охир дар ноҳия барои таъмин намудани фаъолияти устувори соҳаҳои маорифу кишоварзӣ, идоракунии захираҳои об ва рушди деҳот 12 лоиҳаи давлатии сармоягузорӣ ба маблағи зиёда аз 50 миллион сомонӣ татбиқ гардида, амалисозии боз 5 лоиҳаи дигар ба маблағи 17 миллион сомонӣ идома дорад. Татбиқи қисми асосии лоиҳаи азнавсозии роҳи мошингарди “Душанбе — Қӯрғонтеппа” дар ҳудуди ноҳияҳои Хуросону Абдураҳмони Ҷомӣ сурат мегирад, ки бо ҷалби сармояи хориҷӣ дар ҳаҷми қариб 900 миллион сомонӣ пешбинӣ шудааст.

Сарвари давлат ба мақомоти иҷроияи ҳокимияти давлатии ноҳияи Хуросон дастур доданд, ки якҷо бо соҳибкорони бонангу номус ба хотири ободии маркази ноҳия ҷаҳду талош намоянд ва онро боз ҳам дилкашу зебо гардонанд.

Дар охир Президенти мамлакат муҳтарам Эмомалӣ Раҳмон бо итминон иброз доштанд, ки сокинони ноҳияҳои Хуросону Абдураҳмони Ҷомӣ корҳои ободонӣ ва тозаву озода нигоҳ доштани хонаву манзили зист ва хиёбону роҳу маҳаллаҳоро боз ҳам вусъат бахшида, ҷашни пурифтихору муқаддаси истиқлолияти давлатиро бо дастовезҳои шоиста истиқбол менамоянд.

Зимни баромади хеш сокинони ноҳияҳои Абдураҳмони Ҷомӣ ва Хуросони вилояти Хатлон ҷонибдории худро барои дар амал татбиқ намудани сиёсати созандаи Пешвои миллат иброз дошта, ба Президент ва Ҳукумати мамлакат баҳри таъмини зиндагии шоиста изҳори сипосу миннатдорӣ карданд.

Сафари корӣ ба ноҳияи Хуросони вилояти Хатлон

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  бобати  шиносоӣ бо вазъи зисту зиндагии сокинон ва фаъолияти барзгарон ба ноҳияи Хуросони вилояти Хатлон ташриф оварданд.

Мардуми сарбаланди ин ноҳия муҳаббат ва самимияти худро нисбат ба Пешвои муаззами миллат ба воситаи барномаи вижаи фарҳангӣ, ки ба хотири  истиқболи арзандаи Сарвари давлат дар фурудгоҳи муваққатӣ доир шуд, баён намуданд.

Сарвари давлат дар ноҳияи Хуросон нахуст бо ҷараёни  кишти такрорӣ  дар Хоҷагии деҳқонии ба номи “Бобои Сайфиддин”-и Ҷамоати деҳоти «Садриддин Айнӣ» шинос гардиданд. Хоҷагии мазкур 10 гектар замини обиро дар ихтиёр дорад, ки дар майдони 0,30 гектари он пас аз гирифтани ҳосили якум аз гандум дигар зироату сабзавот, аз ҷумла карам, сабзӣ ва қулфинай такроран кошта шудааст.

Иттилоъ дода шуд, ки имсол барзгарони ин хоҷагӣ аз ҳамаи навъҳои маҳсулоти кишоварзӣ ҳосили дилхоҳ ба даст оварданд. Аз ҷумла, дар ноҳия деҳқонон аз як гектар замини обӣ то  52 сентнерӣ ҳосили гандум рӯёндаанд. Дар маҷмўъ дар миқёси ноҳияи Хуросон аз майдони умумии 4 ҳазору 975 гектар замин 17 ҳазору 550 тонна ҳосили гандум ғундошта шудааст.

Пешвои миллат дар ин хоҷагӣ бо вазъи пахтакорӣ низ шинос шуда, мавсими имсолаи ғунучини пахтаро расман оғоз бахшиданд. Иттилоъ дода шуд, ки соли дуюм аст дар ин хоҷагӣ дар майдони 5 гектар пахтаи навъи «Хатлон-2014» кишт мегардад, зеро он ба иқлими ин минтақа мутобиқ буда, деҳқонон аз ҳар як гектар замини кишт аз 40 то 50 сентнерӣ ҳосил мегиранд. Тибқи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Хуросон майдони пахтазор сол аз сол васеъ шуда, соли ҷорӣ дар ҳамаи ҳоҷагиҳои деҳқонии ноҳия дар майдони умумии 4 ҳазору 330 гектар пахта кишт шудааст.

Дар назди заминҳои хоҷагиҳои деҳқонии Ҷамоати деҳоти ба номи «Садриддин Айнӣ» намоиши дастранҷи деҳқонон, маҳсули дасти ҳунармандон ва дастовардҳои соҳаи саноати ноҳияи Хуросон ба маърази дид гузошта шуд. Дар саҳни намоиш Сарвари давлатро   кадбонуҳои чирадасти ноҳия бо  нонҳои боллазати тоҷикӣ, ки аз орди гандуми маҳаллӣ омода шудаанд, пешвоз гирифтанд. Дар намоиш инчунин дигар хӯрокҳои миллӣ ва маҳсулоти қаннодӣ ба маърази тамошо гузошта шуданд. 22 намуди меваи  хушсифати содиротӣ, ба монанди себ, ангур, олу, бодом, нок, биҳӣ ва  шафтолу, ки ҳамаи ин маҳсулоти кишоварзӣ дар Хоҷагии фермерии ба номи «Асадулло» парвариш карда мешаванд, ба намоиш гузошта шуда буд.

Ба Сарвари давлат иттилоъ доданд, ки масоҳати умумии боғҳои хоҷагии мазкур ба 2 ҳазор гектар расонида шудааст, ки дар он 17 намуди дарахтони мевадиҳанда парвариш карда мешавад. Дар хоҷагии мазкур дар масоҳати 130 гектар боғи интенсивӣ бунёд шудааст, ки дар он 14 навъи себи содиротӣ парвариш меёбад.

Сарвари давлат ҳангоми суҳбат бо хоҷагидорон иброз намуданд, ки аз ноҳияи Хуросон ба давлатҳои хориҷӣ ба ғайр  аз меваю сабзавоти тоза, инчунин маҳсулоти консервашуда низ бояд содирот гарданд. Аз ин хотир масъалаи ташкили  корхонаҳои коркарди меваю сабзавот  дар миқёси ноҳия дар асоси дастуру супоришҳои Пешвои миллат, дар фурсатҳои кӯтоҳ бояд сурат бигирад. Маҳсулоти аз шир истеҳсолшаванда дар ин намоишгоҳ аз ҷониби Хоҷагии зотпарварии «Саодат» пешниҳод гардидааст. Айни ҳол дар фермаи ин хоҷагӣ зиёда аз 560 сар гови ширдеҳи зоти «Сементал» ва «Голдштейн» парвариш карда мешаванд. Дар корхонаи коркарди шири «Саодат» зиёда аз 4 намуди маҳсулоти ширӣ  истеҳсол мешавад.

Пешвои миллат аз пешрафти соҳаи кишоварзӣ ва заҳмати шабонарӯзии барзгарон изҳори хушнудӣ карда, иброз намуданд, ки мардуми меҳнатқарини ноҳияи Хуросон бо меҳнати софдилона ва содиқона дар таъмини амнияти озуқаворӣ ва ғанӣ гардонидани дастархони аҳолии кишвар саҳми арзанда мегузоранд.

Ифтитоҳи мактаби №26 дар деҳаи Баҳори ҷамоати Фирӯзаи ноҳияи Носири Хусрав

Дар доираи сафари кории худ дар ноҳияи Носири Хусрави вилояти Хатлон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Баҳори ҷамоати Фирӯза мактаби боҳашамату навро бо 1680 ҷой дар ду баст мавриди баҳрабардорӣ қарор доданд.

Бинои мактаб, ки бо тарҳи нодиру муосир аз ҷониби Муассисаи давлатии “Маркази татбиқи Лоиҳаи сохтмон ва муҷаҳҳазгардонидани мактабҳо” бо маблағи беш аз 18 миллион сомонӣ сармояи Фонди Саудии Рушд бунёд шудааст, туҳфаи арзандаи Пешвои миллат муҳтарам Эмомалӣ Раҳмон ба фарзандони сокинони ноҳияи Носири Хусрав мебошад.

Ёдовар мешавем, ки санги асос барои бунёди ин иншооти муҳими соҳаи маориф соли 2014 зимни як сафари кории Президенти мамлакат ба ноҳияи Носири Хусрав аз ҷониби Сарвари маорифпарвари кишвар муҳтарам Эмомалӣ Раҳмон гузошта шуда буд.

Баъди ифтитоҳи муассисаи таълимӣ Президенти мамлакат муҳтарам Эмомалӣ Раҳмон дар синфхонаҳои алоҳида ва толорҳои он бо шароити таълиму тарбияи насли оянда шинос шуда, бо хонандагону омӯзгорони даргоҳи илму маърифат суҳбатҳои самимӣ доир карданд.

Муассисаи таҳсилоти миёнаи умумии рақами 26 дар деҳаи Баҳори ҷамоати деҳоти Фирӯза дар масоҳати 2 гектар замин бо 32 синфхона, аз ҷумла ҳафт кабинети фаннии физика, химия, биология, лингафон, компютерӣ, таълими меҳнати духтаронаю писарона, кабинети инкишофи кӯдак, толори варзишӣ бо 300 ҷойи нишаст, толори корти теннис, толори маҷлисгоҳ бо 200 ҷойи нишаст, ошхона бо 60 ҷой, китобхона бо 32 ҷойи нишаст, дигар иншооти ёрирасон аз қабили нуқтаҳои санитарию гигиенӣ ва утоқҳои корӣ сохта шудааст.

Дар саҳни мактаб майдончаҳои варзишӣ барои бозии футбол, волейбол, баскетбол ва майдонча барои дарси тайёрии ҳарбӣ бунёд гардидааст.

Фармоишгари сохтмони мактаб Вазорати маориф ва илми Ҷумҳурии Тоҷикистон буда, дар татбиқи лоиҳаи бунёди мактаби мазкур, аз ҷумла иҷрои корҳои лоиҳакашӣ, сохтмонӣ ва бо ашёи зарурии хониш, мизу курсиҳо таъмин кардани муассисаи таълимӣ пудратчиён Ҷамъиятҳои дорои масъулияти маҳдуди “Панасия ЛТД”, “Қалъасоз”, “Нузам” ва “АртМедиа” иштирок карданд. Дар маҷмуъ дар корҳои сохтмону васлкунӣ беш аз 200 нафар бо кор ва маоши хуб таъмин шуданд. Иншооти мазкур бо сифати баланд ва ҷавобгӯ бо талаботи меъёрҳои муосири меъморию сохтмонӣ ва пеш аз муҳлат бунёд гардид ва аз ҷониби Сарвари давлат ба сифати корҳо баҳои баланд дода шуд.

Баъди мавриди баҳрабардорӣ қарор додани Муассисаи таҳсилоти миёнаи умумии рақами 26 дар деҳаи Баҳори ҷамоати деҳоти Фирӯза Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сокинону фаъолони ноҳияи Носири Хусрав мулоқоти самимию созанда доир карданд.

Ҳадафи сафари навбатии кории Пешвои миллат муҳтарам Эмомалӣ Раҳмон ба ноҳия шиносоӣ бо рафти корҳои саҳроӣ, тадбирҳои ободонию созандагӣ ва иштирок дар ифтитоҳи иншоотҳо арзёбӣ гардида, Сарвари давлат нахуст ҳамаи ҳозиринро бо бунёди ин мактаби муосири таълимӣ муборакбод гуфтанд.

Таъкид гардид, ки дар ноҳияи Носири Хусрав то замони таъсиси ноҳия ҳамагӣ 10 муассисаи таълимӣ фаъолият мекард. Дар 20 соли мавҷудияти ноҳия шумораи муассисаҳои таълимӣ ба 26 адад расида, дар онҳо беш аз 8 ҳазор нафар хонанда ба омӯзиш фаро гирифта шудааст.

Сарвари давлат таъкид доштанд, ки ба хотири беҳтар шудани вазъи соҳаи маориф, бунёди муассисаҳои таълимӣ ва синфхонаҳои иловагӣ бо ҷалби сармояи дохилию хориҷӣ ба роҳ монда шудааст, ки ин ҳам аз иқдомҳои шоиста дар ин самт мебошад.

Дар охир Президенти мамлакат муҳтарам Эмомалӣ Раҳмон бо итминон иброз доштанд, ки хонандагон бо истифода аз ин имкониятҳои фароҳамовардаи роҳбарияти давлату Ҳукумати кишвар нағз таълим гирифта, оянда ҳамчун шахсони соҳибилму соҳибкасб ба халқу ватани хеш содиқона хизмат мерасонанд.

Сокинони ноҳияи Носири Хусрав дар навбати худ ба Пешвои миллат муҳтарам Эмомалӣ Раҳмон барои ҳамаи ғамхориҳо изҳори сипосу миннатдорӣ карда, дар ҷавоб ба ин дастгириҳо ваъда доданд, ки бо кору пайкори хеш дар ободонию шукуфоии ватани азиз саҳми муносиб мегузоранд.

Сафари корӣ ба ноҳияи Носири Хусрави вилояти Хатлон

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба вилояти Хатлон ба ноҳияи Носири Хусрав ташриф оварданд.

Дар деҳоти «Истиқлол»-и ноҳия Пешвои миллат муҳтарам Эмомалӣ Раҳмонро роҳбарият, фаъолон ва намояндагони ҷавонон бо самимияти хосса истиқбол гирифтанд.

Дар идомаи сафари кории худ дар ноҳияи Носири Хусрави вилояти Хатлон ҳамчунин Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо вазъи киштзори хоҷагиҳои деҳқонии «Авазбобо», «Каромат», «Оғобек-2012», «Одилҷон» ва «Каримбобо» шинос шуда, дар ҳамин мавзеъ намоиши маҳсулоти кишоварзии деҳқонони ноҳияро тамошо карданд.

Тавре ба Сарвари давлат иттилоъ доданд, хоҷагиҳои мазкур дар ихтиёри худ наздики 32 гектар замин дошта, шумораи коргарон ба 40 нафар мерасанд. Хоҷагидорон ба парвариши дарахтони гуногуни мевадиҳанда, ҳамчунин кишти пахта, ғалладонагӣ, картошка ва полезӣ машғул буда, аз кишти такрории замин ҳосили дилхоҳи кунҷит, маккадон, мош ва тарбузу харбуза ба даст меоранд. Аз он ки иқлими ноҳия ба рушди соҳаи кишоварзӣ созгор аст, ҳамасола фаъолияти деҳқонони хоҷагиҳои «Авазбобо», «Каромат», «Оғобек-2012», «Одилҷон» ва «Каримбобо» низ беҳтар гардида, заҳматкашон аз ҳар порча замин ҳосили дилхоҳ ба даст меоранд. Нашъунамои пахта дар соли ҷорӣ хуб буда, интизор аст, ки аз он ҳосили дилхоҳ ба даст оварда шавад.

Зимни шиносоӣ ба Пешвои миллат иттилоъ доданд, ки заминҳои корами хоҷагиҳои зикргардида тариқи канале, ки аз дарёи Кофарниҳон сарчашма мегирад, обёрӣ мегарданд.

Айни ҳол дар қисми асосии заминҳои ин хоҷагиҳо деҳқонон кишти такрории ҷуворимакка, тарбузу харбуза, каду, лубӣ, мош ва помидору бодиринг гузаронидаанд, ки тибқи мушоҳидаҳо нашъунамои хуб доранд.

Дар ҳамин ҷо Президенти Ҷумҳурии Тоҷикистон муҳтарам Эмомалӣ Раҳмон ҳамзамон аз намоиши маҳсулоти кишоварзии деҳқонони ноҳияи Носири Хусрав дидан карданд. Аҳли заҳмати ноҳия навъҳои гуногуни меваҳои шаҳдбор, мағзу мавиз, полезӣ ва маҳсулоти нониро ба намоиш гузоштанд. Ҳамаи ин маҳсулоти кишоварзӣ самараи заминҳои пурбори ноҳияи Носири Хусрав буда, ҳамасола деҳқонони ноҳия бо истифодаи самараноку оқилонаи ҳар порча замин ҳосили дилхоҳ ба даст меоранд ва бо ин дар таъмини амнияти озуқавории кишвар ҳиссаи сазовор мегузоранд.

Меҳнаткашони ноҳияи Носири Хусрав дар маҷмӯъ бештар аз 50 навъи маҳсулоти кишоварзиро ба намоиш гузоштанд.

Дар намоишгоҳ ҳамчунин занони ҳунарманди ноҳия маҳсули дастранҷи хешро, ки анвои гуногуни маҳсулоти нониву қаннодиро дар бар мегирифт, пешкаши меҳмонон карданд.

Асали шаҳдбори хоҷагиҳои занбӯри асалпарварии ноҳия қисме аз намоишгоҳи имрӯзаи маҳсулоти кишоварзиро ташкил дод. Ба Сарвари давлат иттилоъ доданд, ки айни ҳол дар ҳудуди ноҳияи Носири Хусрав 250 оилаи занбӯри асал парвариш карда мешаванд, ки имсол аллакаи 8 тонна асали аълосифат ба даст оварда шудааст.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъулини соҳаи кишоварзии ноҳия барои истифодаи самараноки ҳар порча замин, рӯёнидани ҳосили дилхоҳ ва таъмини фаровонии маҳсулоти кишоварзӣ дар бозорҳои кишвар дастуру ҳидоятҳои муфид доданд.