Корвони китоб аз Федератсия Русия ба Тоҷикистон расид

Шоми 29-уми августи соли равон аз ҷониби Федератсияи Русия ба муассисаҳои таҳсилоти миёнаи умумии Тоҷикистон, ки бо забони русӣ дарс мегӯянд, 60 ҳазору 538 адад китоби дарсӣ кумак расонида шуд. Ҳамчунин дар чаҳорчуби ҳамкориҳои дуҷониба 30 нафар омӯзгори дигар барои таълим толибилмони муассисаҳои русзабони кишвар ба муддати як сол ба Тоҷикистон омаданд.

Китобҳои дарсӣ барои хонандагони  синфҳои 1 то 11 пешбинӣ шудаанд ва ба гуфти дастандаркорон аллакай шурӯъ аз соли нави хониш толибилмон аз онҳо дарс мегиранд. Китобҳои мазкурро 165 муассисаи таълимии русӣ дастрас хоҳанд кард.

Шурӯъ аз 1-уми сентябр аллакай омӯзгорони рус ба дарсомӯзӣ оғоз хоҳанд кард ва ба иттилои масъулин аксари омӯзгорон дар чор ноҳияи шаҳри Душане, ноҳияҳои тобеи марказ ва вилояти Хатлон ба толибилмони тоҷик дарс мегӯянд. Қобил ба тазаккур аст, ки тадбири мазкур дар асоси муносибатҳои неки ҳар ду кишвар рӯи даст гирифта шуда,  тибқи нақша ин ҳамкориҳо дар оянда низ идома хоҳанд ёфт.

Ҷалби ҷавондухтарон ба қолинбофӣ ва атласу адрасбофӣ дар ноҳияи Тоҷикобод

Мақомоти иҷроияи маҳалии ҳокимияти давлатии ноҳияи Тоҷикобод бо мақсади ба касбомӯзӣ ва ба шуғлҳои муфид ҷалб намудани ҷавондухтарон тадбирҳои заруриро  роҳандозӣ менамояд.

Дар назди Маркази таълимии калонсолон ва Муассисаи давлатии таълимии «Литсейи касбӣ-техникии ноҳияи Тоҷикобод» курсҳои омӯзишии қолинбофӣ ва атласу адрасбофӣ ташкил карда шуда,   20 нафар ҷавондухтарон ва бонувони маҳаллӣ  ба омӯзиши касбҳои мазкур фаро гирифта шуданд. Тадбирҳои андешидашуда барои роҳандозӣ ва рушди ҳунарҳои мардумӣ дар ноҳия мусоидат менамояд.

Консерти мусиқии вокалии классикии ҳиндӣ

1 сентябри соли 2017 дар Филармонияи давлатии Тоҷикистон ба номи Акашариф Ҷӯраев «Консерти мусиқии вокалии классикии ҳиндӣ» баргузор мегардад. Ба иттилои Вазорати фарҳанги Ҷумҳурии Тоҷикистон ҳаводорони санъати классикии ҳиндро дар ин консерт хонум Ручира Панда ва ансамбли ӯ бо барномаи ҷолиби ҳунарӣ истиқбол хоҳанд кард. Чорабинӣ ба 70-солагии Истиқлолияти Ҳиндустон ва 25-солагии муносибатҳои дипломатии Тоҷикистону Ҳиндустон бахшида мешавад.

Сафари давлатӣ ба Ҷумҳурии Мардумии Чин

Имрӯз Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати анҷоми сафари давлатӣ ва иштирок дар Ҳамоиши IX сарони давлатҳои узви БРИКС ба Ҷумҳурии Мардумии Чин сафар карданд.

Дар фурудгоҳи байналмилалии Душанбе Президенти Ҷумҳурии Тоҷикистон Эмомалӣ Раҳмонро раиси Маҷлиси миллии Маҷлиси Олии Ҷумҳурии Тоҷикистон, раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон Эмомалӣ Раҳмонро Вазири корҳои хориҷӣ, Ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ, Вазирони рушди иқтисод ва савдо, энергетика ва захираҳои об, маориф ва илм, молия, Раиси Кумитаи давлатии сармоягузорӣ ва идораи амволи давлатӣ, Президенти академияи илмҳо ва дигар шахсони расмӣ ҳамроҳӣ мекунанд.

Ифтитоҳи бинои нави Академияи Вазорати корҳои дохилии Ҷумҳурии Тоҷикистон

Имрӯз дар шаҳри Душанбе Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар расми мавриди баҳрабардорӣ қарор додани бинои маъмурию таълимӣ ва иншооти Академияи Вазорати корҳои дохилии Ҷумҳурии Тоҷикистон иштирок намуданд.

Президенти Ҷумҳурии Тоҷикистон,Пешвои миллат муҳтарам Эмомалӣ Раҳмонро дар саҳни маҷмааи олии таълимии навбунёд роҳбарият ва ҳайати шахсии Вазорати корҳои дохилии Ҷумҳурии Тоҷикистон самимона истиқбол гирифтанд.

Сарвари давлат муҳтарам Эмомалӣ Раҳмон парда аз лавҳаи рамзӣ бардошта, расман ба фаъолияти марҳилаи аввали Маҷмааи Академияи Вазорати корҳои дохилии Ҷумҳурии Тоҷикистон оғоз бахшиданд ва онро туҳфаи арзандаи роҳбарияти давлату Ҳукумати Ҷумҳурии Тоҷикистон ба истиқболи ҷашни 26-солагии Истиқлолияти давлатии Ҷумҳурии Тоҷикистон арзёбӣ намуданд.

Хотиррасон мешавем, ки ба сохтмони маҷмааи Академияи Вазорати корҳои дохилии Ҷумҳурии Тоҷикистон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 20 июни соли 2014 санги асос гузошта, барои бо сатҳу сифати олӣ анҷом додани корҳои сохтмонӣ дар ин иншоот масъулони соҳаро вазифадор намуда буданд.

Маҷмааи Академияи Вазорати корҳои дохилии Ҷумҳурии Тоҷикистон бо дастуру супоришҳои бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби фармоишгар Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон, лоиҳакаш Ҷамъияти саҳомии кушодаи «Корез-лоиҳа» ва пудратчиёни асосӣ – Корхонаи давлатии сохтмонӣ-васлкунии №2 ВКД Ҷумҳурии Тоҷикистон, ҶДММ «Сари Хосор», Корхонаи воҳиди таъмиру сохтмонии идораи хоҷагии Дастгоҳи иҷроияи Президенти Ҷумҳурии Тоҷикистон ва ҶДММ «Сохтмони Кулиён» бо харҷи беш аз 117 миллион сомонӣ бунёд мегардад.Марҳилаи аввали ин маҷмаа аз бинои таълимии 8 ошёна барои 1680 нафар курсант, 2 хобгоҳ барои 800 нафар барои курсантҳо, бинои истиқоматии 6 ошёнаи 48-ҳуҷрадор барои афсарон, толори варзишӣ ва таваққуфгоҳ барои 50 мошини сабукрав иборат мебошад.

Барои анҷоми марҳилаи аввали сохтмони Маҷмааи Академияи Вазорати корҳои дохилии Ҷумҳурии Тоҷикистон, ки аз бинои таълимӣ ва дигар иншооти зарурӣ иборат аст 69 миллиону 780 ҳазор сомонӣ ҷудо карда шудааст. Аз ҷумлаи ин маблағҳо аз тарафи Вазорати корҳои дохилӣ барои сохтмон 4 миллион ва бо таҷҳизоту мебел муҷаҳҳаз гардонидани бинои таълимӣ 9,5 миллион сомонӣ ҷудо гардидааст.

Бинои таълимии Академияи Вазорати корҳои дохилии Ҷумҳурии Тоҷикистон аз се қисмати А, Б ва В-и ҳампайваст бо таҳхона, бомпӯшҳои ҳамвор ва шервонӣ иборат буда, дорои 8- ошёна мебошад ва масоҳати умумии бино – 18 ҳазору 481,2 м2-ро ташкил медиҳад.

Қисматҳои А ва В-и бинои таълимӣ дорои хазинаи китобхона барои 144400 китоб бо 2 толори хониш барои 35 ҷойи нишастӣ, китобхонаи электронӣ бо толори тестқабулкунӣ, 2 толори лексионии гурӯҳӣ бо 245 ҷойи нишаст, толори маҷлисгузаронӣ барои 433 ҷойи нишаст, 90 синфхонаи таълимӣ аз он ҷумла; синфхонаҳои махсуси криминалистӣ 1 адад, фаъолияти оперативӣ ҷустуҷуӣ 1 адад, ронандагӣ 1 адад, таҷҳизоти махсус 1 адад, бехатарӣ аз сӯхтор 1 адад, утоқи машварати олимон 1 адад ва синфхонаҳои компютерӣ дар ҳар блоку ошёнаҳо 13 адад мебошад.

Дар ошёнаҳои 1 ва 2-юми блоки Б-и бино утоқи навбатдорон, утоқҳои проректорон, қабулгоҳ, утоқи кории ректор, толори хурди маҷлис ва қабули меҳмонон ҷойгир мебошад.

Дар ошёнаи 3-юм то 8-уми бино утоқҳои деканҳо, муовинони деканҳо, мудирони кафедраҳо, утоқҳои корӣ, утоқҳои муаллимон, утоқхои хоҷагидорӣ ва дигар утоқҳои ёрирасон ҷойгир аст.

Робитаи дар байни ошёнаҳои бинои нав бо 5 зинапоя ва 2 лифти мусофиркаши замонавӣ таъмин карда мешавад.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба сатҳу сифати корҳои сохтмонӣ дар иншооти навбунёд баҳои баланд дода, барои истифодаи самараноки имконияту иқтидорҳои таълимию омӯзишӣ ва тайёр намудани мутахассисони варзидаи соҳа ба роҳбарияти вазорату идораҳои дахлдор ва дигар масъулони соҳа дастуру супоришҳои мушаххас доданд.

Баъд аз ифтитоҳи иншооти Академияи Вазорати корҳои дохилии Ҷумҳурии Тоҷикистон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ифтихори ин рӯйдоди фараҳбахш ва фарорасии Рӯзи Дониш дар ҳузури ҳайати омӯзгорону донишҷуёни ин муассисаи олии таълимӣ суханронӣ намуданд.

Дар ҳамин рӯз бо иштироки афсарону курсантҳои ҷузъу томҳои Вазорати корҳои дохилии Ҷумҳурии Тоҷикистон расми гузашти низомӣ баргузор гардид, ки ба муносибати Рӯзи дониш ва ифтитоҳи бинои нави таълимии Академияи Вазорати корҳои дохилии Ҷумҳурии Тоҷикистон бахшида шуда буд.