Ифтитоҳи расмии Рӯзҳои фарҳанги Федератсияи Россия дар Тоҷикистон

Дирӯз дар Театри давлатии академии опера ва балети ба номи Садриддин Айнӣ Рӯзҳои фарҳанги Федератсияи Россия дар Тоҷикистон дар вазъияти тантанавӣ ва бо иштироки доираи васеи ҳунармандону санъатдӯстон оғоз гардид. Нахуст Вазири фарҳанги Ҷумҳурии Тоҷикистон Шамсиддин Орумбекзода ва муовини Вазири фарҳанги Федератсияи Россия Сергей Обривалин ба сухан баромада, аз рушди муносиботи ду кишвар дар ҳама соҳаҳо, аз ҷумла соҳаи фарҳанг ибрози андеша намуданд.

Ҳамин гуна пас аз суханони ифтитоҳи Рӯзҳои фарҳанги Россия дар Тоҷикистон бо барномаи бошукӯҳ оғоз гардид. Қобили зикр аст, ки Ансамбли давлатии академии рақсии «Алан»-и Осетияи Шимолӣ ва гурӯҳи овозадори созии «Трио»-и Консерваторияи Москва иштирокчиёни асосии Рӯзҳои фарҳанги Россия дар Тоҷикистон мебошанд.

Маросими ботантанаи пӯшидашавии Рӯзҳои фарҳанги Федератсияи Россия дар Ҷумҳурии Тоҷикистон дар Театри давлатии академии опера ва балети ба номи Садриддин Айнӣ 26-уми сентябр соати 18 баргузор мегарданд.

Операи «Рӯдакӣ» дар Театри опера ва балет

Ҳунармандони Театри давлатии академии опера ва балети ба номи Садриддин Айнӣ дар доираи чорабиниҳо бахшида ба Рӯзи Рӯдакӣ, ки ҳамасола дар Тоҷикистон 22-юми сентябр қайд карда меашавад, тамошобинон ва дӯстдорони саҳнаҳои театриро бо ҳаёт ва фаъолияти ин шоири забардаст аз наздик ошно сохтанд.

“Рӯдакӣ” операи бастакор Шарофиддин Сайфиддинов мебошад, ки аз ду қисмат иборат аст. Оҳанги ин асари саҳнавӣ солҳои 70-уми асри гузашта, эҷод шудааст. То кунун ин намоишномаро чандин ҳунармандони машҳур коргардонӣ кардаанд. Вале имрӯз он дар таҳияи роҳбари бадеии театри опера ва балет — Адҳам Холиқов бо диду нигоҳи тоза ба саҳна гузошта шуд. Ба гуфти ин коргардон ба саҳна гузоштани операҳои таърихӣ, аз ҷумла “Рӯдакӣ” нисбатан мушкилтару серташвиш аст. Чунки он дар жанри ҷаҳонии опера пешкаши тамошобинон мегардад.

Ифтитоҳи ботантанаи Фестивали байналмилалии Шашмақом дар шаҳри Конибодом

Шоми 20 сентябри соли 2017 дар маҷмааи Қаҳрамонони шаҳри Конибодоми вилояти Суғд аввалин Фестивали байналмилалии «Шашмақом» ботантана оғоз гардид.

Чорабиниро намояндагони Вазорати фарҳанг ва ҳукумати вилояти Суғд ҳусни ифтитоҳ бахшида, аҳли иштирокчиёни ҷашнвораро бо оғози он шодбош ва дар бораи аҳамият ва рушди санъати «Шашмақом» сухан гуфтанд.

Ба иттилои Вазорати фарҳанги Ҷумҳурии Тоҷикистон дар Фестивал ансамблҳои шашмақомсаро аз шаҳрҳои Конибодом, Панҷакент, Истаравшан, Исфара, Бӯстон, ноҳияҳои Бобоҷон Ғафуров ва Ҷаббор Расулов истеъдоди навозандагӣ ва сарояндагии худро дар санъати «Шашмақом» намоиш дода, соҳиби сертификат ва дипломи ҷашнвора гардиданд.

Субҳи рӯзи 21 сентябр дар шаҳри Конибодом дар доираи Фестивал Ҳамоиши байналмилалии олимон ва ҳунармандони санъати «Шашмақом» дар мавзӯи «Инкишофи санъати «Шашмақом» дар давраи Истиқлолият» баргузор гардид.

Фестивал то 23 сентябр идома ёфта, дар он ансамблҳои шашмақомсаро аз дигар шаҳру навоҳии Тоҷикистон ва Ҷумҳурии Ӯзбекистон иштирок доранд.

Иштирок дар ҷаласи чоруми Панели сатҳи баланд оид ба масъалаҳои об

Имрӯз дар шаҳри Ню Йорк Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҷаласи чоруми Панели сатҳи баланд оид ба масъалаҳои об иштирок ва суханронӣ намуданд.

Дар кори ин ҷаласаи сатҳи баланд ҳамчунин Дабири кулли Созмони Милали Муттаҳид, Президенти Бонки ҷаҳонӣ ва дигар шахсиятҳои воломақоми давлатҳо ва ташкилоту созмонҳои минтақавию байналмилалӣ иштирок доштанд.

Зимни суханронии худ Сарвари давлат муҳтарам Эмомалӣ Раҳмон изҳор доштанд, ки мавҷудияти Панели сатҳи баланд оид ба масъалаҳои об дар як давраи кутоҳ барои баланд бардоштани дарки моҳияти об барои ноил гардидан ба Ҳадафҳои рушди устувор такони ҷиддӣ бахшида, нақшаи амали он минбаъд дар ҳаллу фасли масъалаҳои марбут ба об мусоидат хоҳад кард.

Ба нақши Тоҷикистон дар пешбурди ташаббуси эълон кардани Даҳсолаи байналмилалии амал «Об барои рушди устувор» барои солҳои 2018-2028 баҳои баланд дода шуд ва таъкид гардид, ки ҷомеаи ҷаҳонӣ метавонад аз имкониятҳои ин Даҳсола васеъ истифода бурда дар паст кардани шиддати мушкилоти марбут ба об ба таври назаррас саҳм гузорад.

Изҳори боварӣ карда шуд, ки Даҳсолаи мазкур барои боз ҳам баланд бардоштани дарки масъалаҳои об дар Рӯзномаи ҷаҳонии рушд ва мусоидат ба татбиқи Ҳадафҳои рушди устувори марбут ба об мусоидат карда, дар ин самт барои муттаҳид сохтани талошҳои давлатҳои ҷаҳон кумак менамояд.

Сарвари давлат муҳтарам Эмомалӣ Раҳмон таъкид бар он доштанд, ки вобаста ба ҳадаф ва вазифаҳои Даҳсола Тоҷикистон Консепсияи татбиқи онро бо маҷмуи чорабиниҳо дар доираи фаъолияти Панел пешниҳод карда, барои амалӣ намудани он ҷаҳд менамояд ва ният дорад, ки Нақшаи чорабиниҳоро оид ба татбиқи Даҳсола қабул карда, барои амалӣ намудани он Маркази махсус ва ҷиҳати назорати иҷрои он Кумитаи тадорукотро дар назди Ҳукумати Ҷумҳурии Тоҷикистон таъсис диҳад.

Дар ҷаласаи чоруми Панели сатҳи баланд оид ба масъалаҳои об ҳамчунин Президенти Ҷумҳурии Маврикий хонум Амина Ғуриб Факим, Президенти Маҷористон Янош Адер, Сарвазири Ҷумҳурии Халқии Бангладеш хонум Шайх Ҳасина, Сарвазири Шоҳигарии Нидерланд Марк Рутте, Вазири корҳои хориҷаи Иттиҳоди Австралия Ҷулия Бишоп, Вазири банақшагирӣ ва ҳамкориҳои байналмилалии Урдун Имад Фахури, Вазири тиҷорати хориҷӣ ва туризми Перу Эдуардо Феррейрос Купперс ва Муовини вазири ҳифзи муҳити зист ва захираҳои табии Мексика Родолфо Ласи Тамаё  суханронӣ намуданд.

Мулоқот бо Ноиби Президент — Мудири иҷроияи ширкати “Ҷенерал Электрик”-и Амрико дар Иттиҳоди Давлатҳои Мустақил Роналд Поллетт

Дар шаҳри Ню-Йорк ҳамчунин мулоқоти Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Ноиби Президент — Мудири иҷроияи ширкати “Ҷенерал Электрик”-и Штатҳои Муттаҳидаи Америка дар Иттиҳоди Давлатҳои Мустақил Роналд Поллетт баргузор шуд.

Аз имкони мулоқоти дуюм дар давоми соли равон изҳори қаноатмандӣ карда шуд ва таъкид гардид, ки муколамаҳои доимӣ дар оянда ба густариши робитаҳои Тоҷикистон ва Ширкати “Ҷенерал Электрик” такони ҷиддӣ хоҳанд бахшид.

Ҷонибҳо муҳимияти ҳамкориҳои манфиатборро дар соҳаи энергетика ва истифодаи самараноки захираҳои бузурги гидроэнергетикии Тоҷикистон, аз ҷумла ҷалби сармоя барои бунёди неругоҳҳои барқи обӣ, таҷдиди неругоҳҳои мавҷуда, бунёди хатҳои интиқоли неруи барқ ва таъмини таҷҳизоти муосири энергетикӣ таъкид карда, изҳори боварӣ намуданд, ки истифодаи таҷриба ва имконияти муосири Ширкати “Ҷенерал Электрик” метавонад дар пешрафти соҳаҳои номбаршуда нақши калон гузорад.

Дар мулоқот доир ба дигар паҳлӯҳои манфиатбори ҳамкориҳои дуҷонибаи Тоҷикистон ва Ширкати “Ҷенерал Электрик”-и Штатҳои Муттаҳидаи Америка табодули афкори судманд доир гардид.