Ба истифода додани Корхонаи давлатии дӯзандагӣ ва коркарди меваю сабзавот дар ноҳияи Шамсиддини Шоҳин

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба ноҳияи Шамсиддини Шоҳини вилояти Хатлон дар маҳаллаи Ҷавонони ҷамоати деҳоти Шӯрообод бо буридани лентаи рамзӣ ба фаъолияти Корхонаи давлатии дӯзандагӣ ва коркарди меваю сабзавот оғози расмӣ бахшиданд.

Тавре иттилоъ дода шуд, корҳои сохтмонӣ дар корхонаи коркарди меваю сабзавот ва коргоҳи дӯзандагӣ соли равон оғоз гардида, дар як муддати кӯтоҳ бо сифати баланд ба анҷом расонида шудаанд. Дар ҷараёни корҳои сохтмонӣ дар иншооти мазкур асосан мутахассисони маҳаллӣ ба кор ҷалб гардида буданд.

Бинои дуошёнаи корхонаи саноатӣ бо фармоиши Агентии таъминоти амволи махсуси назди Ҳукумати Ҷумҳурии Тоҷикистон қомат афрохта, бо сабку услуби муосири меъморӣ ба ин гӯшаи зебои кишвар ҳусни дигар зам намуд.

Сардори давлат муҳтарам Эмомалӣ Раҳмон бо дастгоҳу технологияи муосири корхона ва басту банди маҳсулоти ватанӣ шинос гардида, бо кормандон суҳбати озоду самимӣ доир карданд.

Корхонаи мазкур имкон дорад дар як шабонарӯз 1 тоннаву 500 килограмм маҳсулоти боғдоронро коркард ва басту банд намояд.

Дар назди ин коргоҳ сардхона низ ҷойгир мебошад, ки дар он 200 тонна маҳсулоти боғпарваронро захира мекунанд.

Тавре зикр гардид, барои корҳои сохтмонӣ ва таҷҳизонидани иншоот бо технологияи пешрафта 6 миллион сомонӣ харҷ гардида, бинои хуштарҳ дар майдони 0,48 садяк замин сохта шудааст.

Иттилоъ дода шуд, ки таҷҳизоти Корхонаи давлатии дӯзандагӣ ва коргоҳи мева аз Германия ворид карда шуда, аз ҷониби мутахассисони ватанию хориҷӣ васлу насб гардидаанд.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ошёнаи дуюми бино бо чеварони коргоҳи дӯзандагӣ суҳбати самимӣ доир намуданд.

Занону духтарони хонашин дар ин коргоҳ бо мошинаҳои дарздӯзӣ таъмин шуда, ба омода намудани либосҳои гуногун машғуланд.

Чеварони ин коргоҳ пеши худ мақсад гузоштаанд, ки дар оянда дар таъмини хонандагони муассисаҳои таълимии ноҳияи Шамсиддини Шоҳин бо либосҳои ягонаи мактабӣ саҳми худро гузоранд. Бинои номбурда дорои ҳуҷраҳои алоҳидаи корӣ, 3 толор ва 5 ҳуҷра бо масоҳати умумии 782 метри мураббаъ мебошад.

Бо ифтитоҳи иншооти нав 22 нафар дар корхонаи коркарди меваю сабзавот ва 130 нафари дигар дар коргоҳи дӯзандагӣ бо шуғли доимӣ ва маоши хуб ва дар маҷмӯъ 160 нафар бо ҷойи кор таъмин гардидаанд.

Оғози сафари корӣ ба ноҳияи Шамсиддин Шоҳини вилояти Хатлон

Субҳи рӯзи 13-уми сентябри соли 2017 Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ аз вазъи зиндагии мардум, ҷараёни корҳои бунёдкориву созандагӣ, ифтитоҳи як қатор иншооти муҳими хоҷагии халқ ва суҳбату мулоқот бо сокинону фаъолон ба ноҳияи Шамсиддин Шоҳини вилояти Хатлон ташриф орваданд.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро роҳбарият ва сокинони сарбаланду меҳнатқарини ноҳияи Шамсиддин Шоҳин бо самимияти хосса ва арҷгузорӣ ба хизматҳои шоёни Сарвари давлат муҳтарам Эмомалӣ Раҳмон ба нафъи давлату миллат истиқбол гирифтанд.

Пазироии самимии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби сокинони ин ноҳияи кӯҳистон нишонаи пуштибонии онҳо аз сиёсати бунёдкоронаву созандаи роҳбарияти олии мамлакат мебошад.

Дар деҳоти Шӯрообод ноҳияи Шамсиддин Шоҳини вилояти Хатлон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вазъияти тантанавӣ бо буридани лентаи рамзӣ бинои маъмурии шуъбаи Раёсати Кумитаи давлатии амнияти миллии Ҷумҳурии Тоҷикистонро дар ноҳияи Шамсиддин Шоҳин мавриди баҳрабардорӣ қарор доданд.

Аснои шиносоӣ бо бинои маъмурии навбунёд ба Сарвари давлат муҳтарам Эмомалӣ Раҳмон иттилоъ доданд, ки корҳои сохтмонии ин иншоот моҳи марти соли 2014-ум оғоз гардида, он бо харҷи як миллону 700 ҳазор сомонӣ бунёд карда шудааст.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ифтитоҳи бинои навро,ки дар он шароити хуби корӣ фароҳам оварда шудааст, дар рӯзҳои таҷлил аз 26 солагии Истиқлолияти давлатӣ туҳфаи арзанда барои кормандони Кумитаи давлатии амнияти миллӣ дар ноҳияи Шамсиддин Шоҳин арзёбӣ карданд ва онҳоро ба хизмати софдилонаву содиқона ба нафъи халқу Ватан ва таъмини амнияту оромӣ ҳидоят намуданд.

Бинои мазкур аз 3 ошёна иборат буда, дорои 6 утоқи корӣ, маҷлисгоҳ ва дигар иншооти зарурӣ мебошад.

Дар бинои навсохт ҳамчунин барои кормандони шуъба манзили истиқоматӣ бунёд карда шудааст, ки шароити хуби зист доранд. Дар ҳамин рӯз Сарвари давлат муҳтарам Эмомалӣ Раҳмон ба кормандони соҳа калиди хонаҳои таъмин бо ашёи рӯзгорро тақдим намуданд.

Фармоишгари ин иншоот Кумитаи давлатии амнияти миллии Ҷумҳурии Тоҷикистон буда, пудратчии он Ҷамъияти дорои масъулияти маҳдуди «Сабр» мебошад.

Масоҳати умумии мавзеи шуъбаи Раёсати Кумитаи давлатии амнияти миллӣ дар ноҳияи Шамсиддин Шоҳин бунёдшуда 0,29 гектарро ташкил медиҳад.

Мавриди баҳрабардорӣ қарор додани чунин бинои хуштарҳу замонивиро кормандони ин ниҳоди қудратии мамлакат ҳамчун туҳфаи беназири Пешвои миллат муҳтарам Эмомалӣ Раҳмон дар рӯзҳои таҷлил аз ҷашни 26-солагии Истиқлолияти давлатии Ҷумҳурии Тоҷикистон пазируфтанд

Умуман таъмини шароити арзандаи зиндагӣ ва фаъолият барои кормандони мақомоти қудратии мамлакат, пайваста дар мадди назари аввали роҳбарияти давлату Ҳукумати Ҷумҳурии Тоҷикистон қарор дошта, барои онҳо марҳила ба марҳила дар ҳамаи шаҳру ноҳияҳо шароити арзандаи корӣ ва зиндагонӣ фароҳам оврада мешавад.

Мулоқот бо Президенти Бонки Исломии Рушд Бандар Ҳамза Ҳаҷҷар

Имрӯз дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Президенти Бонки Исломии Рушд Бандар Ҳамза Ҳаҷҷарро ба ҳузур пазируфтанд.

Дар мулоқот масъалаҳои ҳамкории имрӯза ва дурнамои равобити Тоҷикистон бо ин ташкилоти бонуфузи молиявӣ баррасӣ карда шуд.

Президенти мамлакат муҳтарам Эмомалӣ Раҳмон аз рушди ҳамкории созандаи дуҷониба давоми 20 сол дар самти татбиқи як қатор лоиҳаҳои афзалиятноки соҳаҳои маориф, тандурустӣ, энергетика, нақлиёт, обёрӣ ва заминсозӣ изҳори қаноатмандӣ карданд.

Таъкид гардид, ки аз оғози ҳамкорӣ бо бонк маблағи зиёда аз 335 миллион доллари амрикоӣ барои татбиқи лоиҳаҳои афзалиятнок равона гардидааст. Айни ҳол, дар кишвар ба маблағи зиёда аз 173 миллион доллари амрикоӣ 7 лоиҳаи сармоягузорӣ дар самти маориф, паст кардани сатҳи камбизоатӣ, энергетика, обёрӣ намудани заминҳо ва нақлиёт амалӣ шуда истодааст. Соли ҷорӣ аз тарафи Бонки Исломии Рушд ду лоиҳаи дигар — сохтмони ду қитъаи роҳи автомобилгарди Кӯлоб — Қалъаихумб ва лоиҳаи беҳтар намудани хадамоти саломатии модар ва кӯдак ҷонибдорӣ гардид.

Ҷонибҳо зимни мулоқот масъалаҳои татбиқи Стратегияи миллии рушди Тоҷикистон то соли 2030-ро, ки бо мақсади густариши рушди минбаъдаи иқтисодиёти кишвар қабул гардидааст, баррасӣ карданд.

Дар мулоқот омодагии Тоҷикистон барои ҳамкорӣ дар доираи барномаҳои Бонки Исломии Рушд, алалхусус, «Барномаи махсус барои Осиёи Миёна барои солҳои 2016 — 2020» ва «Фонди ҳаёт ва воситаҳои ҳаёт» таъкид карда шуд.

Нақши Донишкадаи давлатии санъат ва дизайни Тоҷикистон дар тарбияи кадрҳои рассомию дизайнерӣ

Имсол Донишкадаи давлатии санъат ва дизайни Тоҷикистонро беш аз 100 нафар донишҷӯ хатм карда, наздики 150 нафар ба он ҳуҷҷат супориданд.

Донишкадаи давлатии санъат ва дизайни Тоҷикистон бо иқдоми наҷибонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2013 ба фаъолият пардохта буд. Ҳадаф аз таъсиси ин донишкада тарбияи ҷавонон дар рӯҳияи ватандӯстию зебоипарастӣ ва тарғибу ташвиқи анъанаҳои ниёгон, аз қабили рассомию нақшакашӣ мебошад.

Фестивали ҷумҳуриявии бозиҳои миллии варзишӣ

Шоми дирӯз Фестивали ҷумҳуриявии бозиҳои миллии варзишӣ ягона манбаъе гардид, ки дар доираи тантанаҳои ҷашнӣ бахшида ба солгарди Истиқлолияти давлатӣ ва Соли ҷавонон тамоми варзишгарони мамлакатро ба ҳам овард.
Марҳилаи якум ва дуюми мусобиқаҳои ин Фестивал дар шаҳру ноҳияҳои мамлакат доир гардид. Аз 8-ум то 10-уми сентябр даври ниҳоии ин мусобиқот дар шаҳри Душанбе баргузор шуд. Дар расми интиҳои ин тадбири варзишӣ намояндагони Дастгоҳи иҷроияи Президенти Ҷумҳурии Тоҷикистон, Роҳбарияти Кумитаи кор бо ҷавонон ва варзиш, Вазорати фарҳанг, намоянадгони мақомоти иҷроияи ҳокимияти давлатии шаҳри Душанбе ва дигар шахсони расмӣ иштирок карда, дар айни ҳол баргузории мусобиқоти мазкурро фоли нек арзёбӣ намуданд.

Қобили зикр аст, ки Фестивали мазкур таҳти сарпарастии Президенти Федератсияи футболи Тоҷикистон, Раиси шаҳри Душанбе Рустами Эмомалӣ барпо шуда, ҳадаф аз он эҳёи бозиҳои миллии варзишӣ мебошад. Дар мусобиқаи гуштингирӣ дастаҳо аз шаҳри Душанбе, вилоятҳои Суғду Хатлон ва шаҳру ноҳияҳои тебеи марказ иштирок намуда, беҳтарин доварони мамлакат рафти онро назорат ва ҳакамӣ карданд. Ғолибони Фестивали ҷумҳуриявии бозиҳои миллии варзишӣ бо туҳфаҳо қадрдонӣ гаштанд.