Сафари корӣ ба ноҳияи Носири Хусрави вилояти Хатлон

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба вилояти Хатлон ба ноҳияи Носири Хусрав ташриф оварданд.

Дар деҳоти «Истиқлол»-и ноҳия Пешвои миллат муҳтарам Эмомалӣ Раҳмонро роҳбарият, фаъолон ва намояндагони ҷавонон бо самимияти хосса истиқбол гирифтанд.

Дар идомаи сафари кории худ дар ноҳияи Носири Хусрави вилояти Хатлон ҳамчунин Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо вазъи киштзори хоҷагиҳои деҳқонии «Авазбобо», «Каромат», «Оғобек-2012», «Одилҷон» ва «Каримбобо» шинос шуда, дар ҳамин мавзеъ намоиши маҳсулоти кишоварзии деҳқонони ноҳияро тамошо карданд.

Тавре ба Сарвари давлат иттилоъ доданд, хоҷагиҳои мазкур дар ихтиёри худ наздики 32 гектар замин дошта, шумораи коргарон ба 40 нафар мерасанд. Хоҷагидорон ба парвариши дарахтони гуногуни мевадиҳанда, ҳамчунин кишти пахта, ғалладонагӣ, картошка ва полезӣ машғул буда, аз кишти такрории замин ҳосили дилхоҳи кунҷит, маккадон, мош ва тарбузу харбуза ба даст меоранд. Аз он ки иқлими ноҳия ба рушди соҳаи кишоварзӣ созгор аст, ҳамасола фаъолияти деҳқонони хоҷагиҳои «Авазбобо», «Каромат», «Оғобек-2012», «Одилҷон» ва «Каримбобо» низ беҳтар гардида, заҳматкашон аз ҳар порча замин ҳосили дилхоҳ ба даст меоранд. Нашъунамои пахта дар соли ҷорӣ хуб буда, интизор аст, ки аз он ҳосили дилхоҳ ба даст оварда шавад.

Зимни шиносоӣ ба Пешвои миллат иттилоъ доданд, ки заминҳои корами хоҷагиҳои зикргардида тариқи канале, ки аз дарёи Кофарниҳон сарчашма мегирад, обёрӣ мегарданд.

Айни ҳол дар қисми асосии заминҳои ин хоҷагиҳо деҳқонон кишти такрории ҷуворимакка, тарбузу харбуза, каду, лубӣ, мош ва помидору бодиринг гузаронидаанд, ки тибқи мушоҳидаҳо нашъунамои хуб доранд.

Дар ҳамин ҷо Президенти Ҷумҳурии Тоҷикистон муҳтарам Эмомалӣ Раҳмон ҳамзамон аз намоиши маҳсулоти кишоварзии деҳқонони ноҳияи Носири Хусрав дидан карданд. Аҳли заҳмати ноҳия навъҳои гуногуни меваҳои шаҳдбор, мағзу мавиз, полезӣ ва маҳсулоти нониро ба намоиш гузоштанд. Ҳамаи ин маҳсулоти кишоварзӣ самараи заминҳои пурбори ноҳияи Носири Хусрав буда, ҳамасола деҳқонони ноҳия бо истифодаи самараноку оқилонаи ҳар порча замин ҳосили дилхоҳ ба даст меоранд ва бо ин дар таъмини амнияти озуқавории кишвар ҳиссаи сазовор мегузоранд.

Меҳнаткашони ноҳияи Носири Хусрав дар маҷмӯъ бештар аз 50 навъи маҳсулоти кишоварзиро ба намоиш гузоштанд.

Дар намоишгоҳ ҳамчунин занони ҳунарманди ноҳия маҳсули дастранҷи хешро, ки анвои гуногуни маҳсулоти нониву қаннодиро дар бар мегирифт, пешкаши меҳмонон карданд.

Асали шаҳдбори хоҷагиҳои занбӯри асалпарварии ноҳия қисме аз намоишгоҳи имрӯзаи маҳсулоти кишоварзиро ташкил дод. Ба Сарвари давлат иттилоъ доданд, ки айни ҳол дар ҳудуди ноҳияи Носири Хусрав 250 оилаи занбӯри асал парвариш карда мешаванд, ки имсол аллакаи 8 тонна асали аълосифат ба даст оварда шудааст.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъулини соҳаи кишоварзии ноҳия барои истифодаи самараноки ҳар порча замин, рӯёнидани ҳосили дилхоҳ ва таъмини фаровонии маҳсулоти кишоварзӣ дар бозорҳои кишвар дастуру ҳидоятҳои муфид доданд.

Мулоқот бо роҳбарону фаъолон ва сокинони ноҳияҳои Шаҳритус ва Қубодиёни вилояти Хатлон

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ бо роҳбарону фаъолон ва сокинони ноҳияҳои Шаҳритус ва Қубодиёни вилояти Хатлон мулоқоти самимию созанда доир карданд.

Президенти мамлакат муҳтарам Эмомалӣ Раҳмон зимни суханронӣ оид ба дастовардҳои даврони соҳибистиқлолӣ, талошҳову тадбирҳои Ҳукумати кишвар бобати беҳтар кардани сатҳи зиндагии мардум андешаронӣ карда, аз сатҳи рушди бонизоми иқтисодиёти ҷумҳурӣ, пешрафти соҳаҳои муҳими хоҷагии халқи ноҳияҳои Шаҳритусу Қубодиён изҳори қаноатмандӣ намуданд.

Таъкид гардид, ки то имрӯз дар доираи барномаи рушди иқтисодиву иҷтимоии ноҳияи Шаҳритус даҳҳо лоиҳа ба маблағи 55 миллион сомонӣ амалӣ гардида, қариб 70 ҳазор ҷойҳои нави корӣ таъсис дода шудааст. Аз соли 2006 то ба ҳол барои таъмини рушди иқтисодиву иҷтимоии ноҳия ва баланд бардоштани сатҳу сифати зиндагии сокинони он аз буҷети давлат 350 миллион сомонӣ ҷудо гардида, илова бар ин, 13 лоиҳаи давлатии сармоягузорӣ дар ҳаҷми 63 миллион сомонӣ татбиқ шудааст ва азхудкунии маблағҳо дар доираи 6 лоиҳаи дигар идома дорад.

Танҳо дар 10 соли охир аз  ҳисоби буҷети давлатӣ барои таъмин намудани пешрафти иқтисодиву иҷтимоии ноҳияи Қубодиён қариб 450 миллион сомонӣ равона гардида, 8 лоиҳаи давлатии сармоягузорӣ татбиқ шудааст ва 5 лоиҳаи дигар дар ҳоли амалисозӣ қарор дорад.

Илова бар ин, дар се соли оянда аз буҷети давлат барои соҳаҳои иҷтимоӣ, бахши кишоварзӣ, бунёду таҷдиди роҳҳои дохилӣ ва дастгирии буҷети маҳаллӣ 184 миллион сомонӣ пешбинӣ гардида, дар доираи Барномаи рушди иҷтимоиву иқтисодии ноҳияи Қубодиён барои солҳои 2016-2020 амалисозии 103 лоиҳа ба маблағи умумии 109 миллион сомонӣ ба нақша гирифта шудааст.

Ба андешаи Сарвари давлат бунёд гардидани корхонаҳои истеҳсолӣ, иншооти муосир, роҳу пулҳои нав ва муассисаҳои иҷтимоиву хизматрасонӣ далели рушди устувори ноҳия ва натиҷаи саъю талоши мардуми заҳматдӯсти он мебошанд.

Президенти мамлакат муҳтарам Эмомалӣ Раҳмон аз таҷрибаи сокинони ноҳияҳои Шаҳритус ва Қубодиён дар соҳаи азхудкуниву истифодаи замин ва умуман, пешбурди соҳаи кишоварзӣ, хусусан, пахтакорӣ ёдовар шуда, ба Ҳукумати ҷумҳурӣ ва вазорату идораҳои дахлдор, инчунин мақомоти иҷроияи маҳаллии ҳокимияти давлатии ноҳияҳои Шаҳритусу Қубодиён бобати иҷрои босамари супоришҳои ҳукумат, татбиқи лоиҳаву барномаҳои давлатӣ дастурҳои муфид доданд.

Зимни баромади худ сокинони ноҳияҳои Шаҳритусу Қубодиён намояндагони касбу кори гуногун ба Пешвои миллат муҳтарам Эмомалӣ Раҳмон барои ҳамаи дастгириҳо ва талошҳои шабонарӯзӣ бобати фароҳам овардани шароити зиндагии ободу осоишта ва сазовор, изҳори сипос карда, татбиқи саривақтии қонунҳои миллии ҷумҳурӣ, аз ҷумла Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Тоҷикистон” ва Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”-ро амри зурурӣ ва воқеӣ арзёбӣ намуданд.

Сафари корӣ ба ноҳияи Қубодиёни вилояти Хатлон

Субҳи имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо мақсади шиносоӣ бо корҳои бунёдкорию созандагӣ ва рафти кишту кор ба ноҳияи Қубодиёни вилояти Хатлон ташриф оварданд.

Сарвари давлатро дар фурудгоҳи муваққатӣ сокинони шарафманд ва меҳнатқарини ноҳия бо самимияти хоса ва муҳаббати беандоза истиқбол намуданд.

Дар доираи сафари корӣ ба ноҳияи Қубодиёни вилояти Хатлон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо рафти корҳои саҳроӣ, аз ҷумла оғози ҷамъоварии ҳосили пахта ва парвариши сабзавот дар хоҷагиҳои деҳқонии деҳаи Ҳаваскори Ҷамоати деҳоти «Тахти Сангин» шинос шуда, ҳамзамон аз намоиши маҳсулоти кишоварзию чорводорӣ ва саноатии ноҳияи мазкур дидан намуданд.

Иттилоъ дода шуд, ки соли равон кишоварзони ноҳияи Қубодиён аз кишти ҳамаи навъҳои ғалладонагиҳо маҳсулоти дилхоҳ ба даст овардаанд. Тибқи нишондод то 1 июли соли равон барзгарон аз майдони умумии 2 ҳазору 300 гектар зиёда аз 10 ҳазор тонна маҳсулоти ғалладонагӣ рӯёнидаанд.

Пешвои миллат муҳтарам Эмомалӣ Раҳмон инчунин бо вазъи пахтакорӣ дар Хоҷагии деҳқонии Маҳмадӣ Полвон-и деҳаи Ҳаваскор шинос гардиданд. Меҳнаткашони хоҷагии мазкур соли равон дар майдони 6 гектар кишти пахтаи навъи «Тоҷикистон»-ро бо усули ҷадиди зери плёнка ба роҳ мондаанд. Истифодаи чунин усул имкон дод, ки деҳқонони ин хоҷагӣ дар ноҳия аввалин шуда, ба ҷамъоварии ҳосили пахта шурӯъ намоянд.

Иттилоъ дода шуд, ки имсол дар тамоми хоҷагиҳои деҳқонии ноҳияи Қубодиён дар масоҳати 7 ҳазору 510 гектар пахта кишт шудааст. Тибқи мушоҳидаҳо нашъунамои пахта хуб буда, барзгарони ноҳия дар мавсими соли 2017 нақша доранд, ки ба ҳисоби миёна аз ҳар гектар 25-30 сентнерӣ ҳосил рӯёнанд.

Сарвари давлат инчунин бо рафти кишти такрорӣ дар Хоҷагии деҳқонии «Мӯсобобо» -и деҳаи Ҳаваскор шинос гардиданд. Дар заминҳои ин хоҷагӣ, ки масоҳати 5 гектарро дарбар мегирад, кишти зироати барвақтӣ ба роҳ монда шудааст. Меҳнаткашони хоҷагии мазкур 80 дарсади корҳои вобаста ба кишти такрориро аллакай ба анҷом расондаанд. Онҳо кишти зироати гуногун, ба монанди картошка, помидор, карам, пиёз, шолӣ ва навъҳои дигари сабзавотро дар маъракаи кишти такрорӣ ба роҳ мондаанд. Дар маҷмӯъ дар ноҳия дар майдони 2764 гектар кишти такрорӣ гузаронда шудааст, ки 92 дарсади иҷрои дурнаморо дар бар мегирад.

Дар намоишгоҳ маҳсулоти тайёри саноатӣ пешниҳод гардида буд. Яке аз корхонаҳое, ки имрӯз дар доираи барномаи давлатии рушди соҳибкорӣ дар ноҳияи Қубодиён фаъолият дорад, ин ҶДММ «Насими Раҳим» мебошад. Корхонаи мазкур дар намоишгоҳ 10 намуди консерва аз меваю сабзавотро ба намоиш гузошт.

Дар ноҳия истеҳсоли масолеҳи сохтмонӣ низ васеъ ба роҳ монда шудааст. ҶДММ «Ороиши диёр» аз ҷумлаи корхонаҳои истеҳсолие мебошад, ки аз семент ҳар гуна масолеҳи сохтмонӣ, аз ҷумла тахтасангҳои ороишӣ тайёр мекунад. ҶСП «Аввалин» аз корхонаҳои бузургтарини ноҳияи Қубодиён ба шумор меравад, ки дар он ба воситаи коркарди решаи ширинбия доруҳои қиматбаҳои табобатӣ барои бемориҳои ҷигар ва кислотаи глисирринзин ҳосил менамоянд. Корхонаи мазкур ҳанӯз соли 2010-ум бо дастгирии Ҳукумати ҷумҳурӣ таъсис ёфта, ҳоло дар он аз навъи гиёҳи ширинбия дору ва аз пасмондаи он маҳсулоти сӯзишвории брикет тавлид карда мешавад.

Дигар самти хоҷагидорие, ки дар ноҳияи Қубодиён рушд кардааст, чорводорӣ мебошад. Дар ноҳия баробари чорвои калони шохдор парвариши моли майда ҳам ба роҳ монда шудааст. Аз ҷумла, дар хоҷагиҳои ноҳия гӯсфандҳои зоти қароқулӣ ва ҳисорӣ васеъ парвариш карда мешаванд.

Ба Сарвари давлат иттилоъ доданд, ки дар ноҳияи Қубодиён саршумори моли майда 32 ҳазор сарро ташкил медиҳад, ки ин шумора нисбат ба соли гузашта 816 сар зиёд мебошад. Саршумори чорвои калони шохдор дар миқёси ноҳия ба 1 ҳазору 769 сар расидааст. Иҷрои дурнамои солонаи соҳаи чорводорӣ дар ноҳия 120 дарсад таъмин шудааст.

Сарвари давлат иброз намуданд, ки аз замонҳои қадим кишоварзӣ пешаи боифтихор буда, соҳиби ин касб ризқофар ва ородиҳандаи дастурхони мардум ба ҳисоб мерафт. Имрӯз ҳам саҳми кишоварзону чорводорон дар таъмини амнияти озуқаворӣ ва баланд бардоштани сатҳи зиндагии мардум назаррас ва боиси таҳсин мебошад.

Шиносоӣ бо дастовардҳои хоҷагии халқи ҷамоати деҳоти Сари Хосори ноҳияи Балҷувон

Дар доираи сафари худ ба ноҳияи Балҷувон Президенти Ҷумҳурии Тоҷикистон муҳтарам Эмомалӣ Раҳмон бо дастовардҳои хоҷагии халқи ҷамоати деҳоти Сари Хосор шинос шуданд.

Дар намоишгоҳ сокинони ҷамоати деҳоти Сари Хосор дастранҷи хеш, аз ҷумла маҳсулоти кишоварзӣ, гулу гиёҳҳои табиии шифобахш ва ҳунарҳои дастиро, ки бо меҳнати ҳалол ва заҳмати зиёд ба даст омадаанд ба маъраз гузоштанд.

Ба дастовардҳои хоҷагидорони ҷамоат бахусус меваҳои шаҳдбор, аз қабили чормағз, тутҳои гуногун, хуч, зилол, маҳлаб, чанд намуди олуча, себи хушк, нок, зардолу, ангур, гелос, шириниҳои аз мева омодакардашуда, донагиҳо ва инчунин гиёҳҳои шифобахше, ки аз ҳудуди ҷамоати деҳоти Сари Хосор ҷамъоварӣ шудаанд, таваҷҷуҳи хоса зоҳир карданд.

Дар маҷмӯъ наздики 20 номгӯй гиёҳҳои шифобахш ба маъраз гузошта шуда буд ва иттилоъ дода шуд, ки дар минтақаи Сари Хосор қариб тамоми намуди гиёҳҳои дорои хусусияти шифобахшӣ мавҷуд мебошанд.

Номгӯи гуногуни маҳсулоти аз зироати кишоварзӣ ба даст овардаи хоҷагидорони ҷамоат, аз қабили картошка, пиёз, сабзӣ, бодаринг, каду ва ғайра ба таври фаровон ба намоиш гузошта шуда буд.

Ба ҳунарҳои дастӣ ва маҳорати пазандагии занону духтарони деҳоти Сари Хосор аз тарафи Сарвари давлат баҳои баланд дода шуд.

Дар ҳамин ҷо ба Пешвои миллат муҳтарам Эмомалӣ Раҳмон лоиҳаи иншооте, ки минбаъд дар ҳудуди ҷамоати деҳоти Сари Хосор бунёд карда мешавад, муаррифӣ карда шуд.

Тавре иттилоъ дода шуд, дар ояндаи наздик ба хотири рушд бахшидани соҳаи сайёҳӣ дар минтақаи Сари Хосор 7 адад меҳмонхонаи замонавӣ бунёд карда мешавад. Боз ҳам баланд бардоштани сатҳи хизматрасонии тиббию варзишӣ барои сокинони ҷамоати деҳоти Сари Хосор дар мадди назар мебошад ва айни замон лоиҳаи боз 5 иншоот дар ин соҳа тарҳрезӣ карда шуда, мавзеъи ҷойгиршавӣ ва тарҳи биноҳои сохташаванда ба Президенти мамлакат муҳтарам Эмомалӣ Раҳмон аз ҷониби соҳибкорон муаррифӣ гардид. Ҳамчунин иттилоъ дода шуд, ки барои фароҳам овардани шароити хуби хизматрасонӣ ва баланд бардоштани сатҳи некуаҳволии мардум 8 иншооти дигари таъиноташон гуногун сохта мешаванд.

Пешвои миллат муҳтарам Эмомалӣ Раҳмон аз соҳибкорон ва нафарони дар ин самт масъулиятдошта даъват ба амал оварданд, ки дар вақти бунёди иншооти муаррифишуда ба сифати корҳои сохтмонӣ аҳамияти авалиндараҷа зоҳир намоянд.

Оғози сохтмони роҳи мошингарди “Балҷувон-Сари Хосор”

Дар доираи сафари корӣ дар ноҳияи Балҷувони вилояти Хатлон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҷамоати деҳоти Сари Хосор бо лоиҳаҳои иншооти сохташаванда ва оғози сохтмони роҳи мошингарди “Балҷувон-Сари Хосор” шинос шуданд.

Иттилоъ дода шуд, ки дар вақти татбиқи лоиҳа иншоотҳои асосии техникӣ, аз ҷумла 34 километр роҳи паҳноиаш 8 метр, 87 иншоот, қубурҳои оҳанубетонии обгузари қутрашон аз 1 то 4 метра, 1 кӯпрук бо дарозии 120 метр, корҳои соҳилмустаҳкамкунӣ ба масофаи 9,6 километр, сохтмони тумбадеворҳо ба масофаи 150 метри тулонӣ ба нақша гирифта шудааст. Тибқи ҳисобҳои пешакӣ дар сохтмони роҳ бояд 53,1 миллион сомонӣ сарф гардад.

Қад-қади ин роҳ 11 деҳа ва 860 хоҷагӣ ҷойгир буда, зиёда аз 6 000 аҳолӣ зиндагӣ мекунанд. Ноҳияи Балҷувон яке аз минтақаҳои кӯҳии Ҷумҳурии Тоҷикистон мебошад. Релефаш хеле мушкил буда, қисми зиёдашро кӯҳистон ташкил медиҳад ва бинобар набудани роҳи мошингард сокинон барои рафтуомад аз маркази ноҳия ба ҷамоати деҳоти Сари Хосор дар фаслҳои тирамоҳу зимистон ба мушкилӣ рӯ ба рӯ мешаванд.

Фармоишгари бунёди иншооти роҳ Вазорати нақлиёти Ҷумҳурии Тоҷикистон буда, корҳои сохтмониро Мудирияти муассисаи давлатии корхонаҳои сохташудаистодаи Вазорати нақлиёт ва дигар ширкатҳои сохтмонии ватанӣ иҷро менамоянд.

То имрӯз 9 километр роҳҳои мошингарди Балҷувон-Дулонамайдон, Балҷувон-Дашти Майдон сохта шудааст ва соли 1995 лоиҳаи сохтмони роҳи мошингарди “Балҷувон-Сари Хосор” таҳия гардида буд. Ҳар сол аз 500 ҳазор то 1 миллион сомонӣ корҳо иҷро мегардиданд, ки маблағи умумии иҷрои корҳо аз соли 1995 то 2017-ум ҳамагӣ 6 миллиону 50 ҳазор сомониро ташкил медиҳад. Имрӯз корҳо қариб дар ҳамаи қитъаҳои роҳ дар тули 34 километр рафта истодаанд. Соли 2016-ум 10 километр аз Боғи Зоғон то Шаидон сангфарш гардонида шуд, ки деҳаҳои Шаидон, Тоҳирдара, Дашти — Килко, Чилторӣ, Дошмандӣ ва Баҳор дар тамоми фасли сол ба ҳам пайваст гардида, сокинон бемушкилӣ рафтуомад доранд.

Сарвари давлат зимни шиносоӣ бо лоиҳа таъкид доштанд, ки сохтмони босифату саривақтии роҳи мошингарди “Балҷувон – Сари Хосор” барои рафтуомади сокинон, аз худ кардани заминҳои кишт, истифодаи босамари ҷангалзор, ҷамъоварии ҳосили меваю сабзавот ва рушди соҳаи туризм мусоидати амиқ менамояд.