Гузоштани санги асос ба сохтмони бинои Коллеҷи аграрии вилояти Хатлон дар маркази ноҳияи Вахш

Дар деҳоти Рӯдакии ноҳияи Вахш Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо гузоштани санги асос ба сохтмони бинои Коллеҷи аграрии вилояти Хатлон оғози расмӣ бахшиданд.

Зимни муаррифии лоиҳаи ин иншоот ба Сарвари давлат муҳтарам Эмомалӣ Раҳмон иттилоъ доданд, ки арзиши лоиҳа  14 миллион сомониро ташкил дода, барои 600 нафар хонанда пешбинӣ шудааст.

Бинои мазкур аз 3 ошёна ва таҳхона иборат буда, дорои синфхонаҳои барҳавои таълимӣ, маҷлисгоҳ, майдони варзишӣ ва дигар иншооти ёрирасон мебошад.

Ҳамзамон дар шафати бинои Коллеҷ барои 400 нафар хобгоҳ сохта мешавад, ки аз 4 ошёна иборат хоҳад буд. Масоҳати умумии бино 3 ҳазору 494 метри мураббаъро ташкил медиҳад.

Президенти мамлакат муҳтарам Эмомалӣ Раҳмон ба масъулини дахлдор барои сари вақт ва босифат анҷом додани корҳои сохтмонӣ дар ин иншооти таълимӣ дастуру супоришҳои мушаххас доданд.

Фармоишгари иншоот Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон буда, лоиҳаи он аз тарафи Корхонаи воҳиди давлатии лоиҳакашии шаҳри Душанбе тарҳрезӣ шудааст.

Бо мақсади фароҳам сохтани шароити арзандаи таълим ва омодасозии мутахассисони баландихтисоси ба талаботи бозори меҳнат ҷавобгӯ бо дастгирӣ ва таваҷҷуҳи бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тадбирҳои судманд амалӣ карда шуда, дар ҳамаи шаҳру ноҳияҳои мамлакат муассисаҳои наву замонавии таълимӣ бунёд карда мешаванд.

Фестивал-озмуни ҷумҳуриявии “Бӯстон-2017” дар ноҳияи Варзоб

Чун дигар шаҳру ноҳияҳои тобеи марказ аҳли фарҳанги ноҳияи Варзоб низ сабти телевизионии Фестивал-озмуни ҷумҳуриявии “Бӯстон-2017”-ро доир карданд. Фестивали “Бӯстон” дар ин ноҳия низ ба таври хоса тантана дошт ва ҳавскорону истеъдодҳои ҷавон рӯйи саҳна ҳунарнамоӣ карданд.
Дар Фестивал-озмуни ҷумҳуриявии телевизионии эҷодиёти халқ “Бӯстон-2017” ҳаваскорони ноҳияи Варзоб 13 номераи ҳунарӣ пешниҳод карданд. Саломномаву маҳорати суханварӣ, навозишу рақс, суруду ҳаҷв аз қабили бахшҳои таҳиякардаи аҳли фарҳанги ноҳия буд ва аз миёни иштирокчиён аъзои ҳакамон тавонистанд чеҳраҳои навро пайдо кунанд.
Бояд гуфт, ки ҳадаф аз ташкили Фестивал-озмуни ҷумҳуриявии “Бӯстон-2017” кашфи истеъдодҳои ҷавону роҳнамоии онҳо ба саҳнаҳои бузурги ҳунарӣ мебошад. Агар дар ҳама шаҳру ноҳияҳои мамлакат аз ин истеъдодҳо якнафарӣ пайдо шаваду онҳо дастгирӣ ёбанд, метавон гуфт, ки Фестивал ба ҳадаф расид.

Аксия-чорабинӣ дар шаҳри Душанбе

Дар шаҳри Душанбе аксия-чорабинии фарҳангӣ-фароғатӣ таҳти унвони “Рахна дар фарҳанг кори душман аст” баргузор гардид. Он бахшида ба 10-солагии Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон”  роҳандозӣ гардида, дар роҳу кӯчаҳои пойтахт ба сокинону меҳмонон 10 ҳазор варақаи таблиғотӣ барои ҳифз ва нигаҳдошти рукнҳои фарҳанги миллӣ ва пешгирӣ аз бегонапарастиву тақлид ба фарҳанги ғайр тақсим карда шуд.

Ин аксия бо ташаббуси Кумитаи иҷрои Ҳизби халқӣ-демократии Тоҷикистон дар ноҳияи Исмоили Сомонӣ ҷараён гирифт.

Ин аксия-чорабинӣ дар Муассисаи фарҳангию фароғатии “Аҳорун” дар ноҳияи Исмоили Сомонии шаҳри Душанбе идома ёфт.

Дар чорабинӣ ҳамчунин оид ба нақши занон дар устувории рукнҳои давлатдории навин сухан рафта, зикр шуд, ки фарҳанги либоспӯшӣ маҳз аз ҷониби модарони мо бояд ҳифз шавад ва дар ин баробар насли ҷавон ҳам дар рӯҳияи миллӣ тарбия ёбад. Ба гуфти нотиқон занону модарони тоҷик бояд аз таҳдиду хатарҳои ҷаҳони муосир огаҳ бошанд ва нагузоранд, ки бегонапарастиву тақлиди фарҳанги бегона дар ҷомеаи мо пояҳои худро мустаҳкам кунад.

Фестивал-озмуни ҷумҳуриявии “Бӯстон-2017” дар ноҳияи Шоҳмансури шаҳри Душанбе

Ҳамчунин ҳаваскорони ноҳияи Шоҳмансури шаҳри Душанбе низ сабти телевизионии Фестивал-озмуни “Бӯстон 2017”-ро доир сохтанд. Ҳам намоишгоҳи фарҳангиёни ин ноҳия ва ҳам барномаи ҳунарии онҳо хубу диданӣ буд.

Аҳли фарҳанги ноҳияи Шоҳмансури шаҳри Душанбе низ бо намоишгоҳи тамошобоб ин чорабинии фарҳангиро шурӯъ карданд. Сокинони маҳаллаҳои ноҳия дар ҳарду ошёнаи Филармонияи давлатии Тоҷикистон ба номи Акашариф Ҷӯраев, ки макони баргузории Фестивали Бӯстон интихоб шуда буд, намоишгоҳ ташкил карданд.

Қисмати ҳунарии Фестивал-озмуни ҷумҳуриявии Бӯстон-2017 бо навозиши умумии ҳаваскорони ноҳияи Шоҳмансур оғоз гардид ва аҳли толорро ба кафкубӣ водор сохт.

Суруду рақс, бадеҳаву суханварӣ ва ҳаҷву мутоиба, ки аз шартҳои дигари ин Фестивал ба шумор мераванд, низ аз ҷониби бӯстончиёни ноҳияи Шоҳмансур бо маҳорати баланд иҷро шуданд ва диққатҷалбкунанда ҳам буданд.

Беҳтарин чеҳраву истеъдодҳои ноҳияи Шоҳмансур низ аз диплому ифтихорномаҳои таъсиснамудаи масъулини Фестивал-озмуни «Бӯстон 2017» бенасиб намонданд.

Фестивал-озмуни ҷумҳуриявии “Бӯстон-2017” дар ноҳияи Исмоили Сомонӣ

Даври дуюми Фестивал-озмуни ҷумҳуриявии “Бӯстон-2017” дар мамлакат идома дорад. Дар шаҳри Душанбе дуюмин шуда ноҳияи Исмоили Сомонӣ сабти телевизионии Фестивал-озмуни “Бӯстон 2017”-ро доир сохт. Ширкаткунандагони ин фестивал-озмун баргузории онро барои тарбияи маънавии аҳолӣ ва кашфи истеъдодҳо дар олами санъату ҳунар муассир арзёбӣ мекунанд.

Аҳли фарҳанги ноҳияи Исмоили Сомонӣ дар ин чорабинии фарҳангӣ асосан ҷавононро ҷалб карданд. Ҳам дар суруду рақс ва ҳам дар бадеҳаву суханварӣ, хуллас дар ҳама бахшҳои Фестивал ҷавонону наврасон баромад карданд.

Иштирокчиёни чорабинӣ, ки дар бахшҳои гуногун ҳунари худро нишон доданд, бо диплому ифтихорномаҳо қадрдонӣ гаштанд.