Вазири корҳои хориҷии Тоҷикистон Ҳамрохон Зарифӣ 30 ноябр ба шаҳри Афинаи Юнон рафт.
Душанбе, 1 декабр. - Мухбири АМИТ «Ховар» хабар медиҳад, ки ҳайати Ҷумҳурии Тоҷикистон таҳти роҳбарии вазири корҳои хориҷии мамлакат Ҳ.Зарифӣ рӯзҳои 1 ва 2 декабр дар машварати 17 – уми вазирони корҳои хориҷии мамлакатҳои аъзои Созмони амнияту ҳамкории Аврупо ширкат хоҳад варзид.
Тибқи нақша вазири корҳои хориҷии Тоҷикистон дар ҷараёни сафар бо роҳбарони ҳайатҳои Иёлоти Муттаҳида, Олмон, Қазоқистон, Булғористон, Словакия ва Юнон мулоқотҳо анҷом медиҳад. Инчунин мулоқотҳои Ҳамрохон Зарифӣ бо Муншии умумии Созмони амнияту ҳамкории Аврупо Марк Перрен де Бришамбо, директори маркази пешгирии муноқишаҳои созмон Херберт Залбер, Комиссари олии масъалаҳои ақаллиятҳои миллии созмон Кнут Воллебек ва Намояндаи махсуси Иттиҳоди Аврупо дар Осиёи Марказӣ Пер Морел ба нақша гирифта шудаанд. Дар ин мулоқотҳо масъалаҳои марбут ба муносибатҳо ва ҳамкории Тоҷикистон бо САҲА ва Иттиҳоди Аврупо муҳокима карда мешаванд.
