Паҳлавонони тоҷик се медал ба даст оварданд
2 феврал 2012 | Хонданд: 195 нафар | Варзиш
Паҳлавонони тоҷик дар мусобиқаи гуштини самбо барои дарёфти ҷоизаи президенти Қазоқистон се медал ба даст оварданд.
Душанбе, 2 феврал. (ТВ "Сафина", М.Ҳусейнов) - Ин мусобиқа, ки ҳамчунин яке аз давраҳои Ҷоми ҷаҳон маҳсуб мешуд, дар ду намуд – самбои варзишӣ ва самбои муборизавӣ бо ширкати беш аз 300 гуштигир аз 15 кишвари ҷаҳон дар шаҳри Уралски Қазоқистон барпо гардид.
Тоҷикистонро дар ин мусобиқа 25 гуштигир дар намуди самбои варзишӣ намояндагӣ кард. Акмалиддин Каримов дар рақобатҳо дар вазни то 57 килограмм ҷойи дувумро касб намуд ва бо медали нуқра сарфароз гашт. Ду гуштигири дигари тоҷик – Ибод Шайхов ва Илҳомиддин Алиев дар вазни беш аз 100 килограмм ҷойҳои севумро гирифтанд ва бо медалҳои биринҷӣ мукофотонида шуданд.
