Ҷашни Наврӯзро кишварҳои форсизабон дар соли 2010 дар шаҳри Шерози Эрон истиқбол мекунанд, гуфт зимни нишатси матбуотӣ Сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст.
Душанбе, 1 феврал. - Сафир афзуд, ки Президенти Ҷумҳурии Тоҷикистон барои ширкат дар ҷашни Наврӯзи бостон дар Шероз даъват шудааст. Ҳамчунин, дар таҷлили ин ҷашни шукӯҳманди ориёинажодҳо ҳайатҳои баландпояи беш аз 20 кишвари ҷаҳон, ки дар онҳо Наврӯз таҷлил мегардад, иштирок менамоянд.
Бояд зикр кард, ки тӯли ду соли охир ҳайатҳои баландпояи се кишвари форсизабон- Тоҷикистон, Афғонистон ва Эрон Наврӯзро дар Душанбеву Ҳисор ва Мазори Шариф таҷлил намуда буданд. Наврӯз яке аз ҷашнҳои қадимаи мардумони ориёинажод аст. Наврӯз рӯзи нав аз Соли нав аст, ки ба аввали фарвардинмоҳ, оғози моҳи ҳамали шамсии ҳиҷрӣ ва 21 марти солшумории мелодӣ рост меояд ва таърихи шаш ҳазорсола дорад.
Бинобар ривояти достонии дар «Шоҳнома» овардаи Фирдавсӣ «Наврӯз ҳанӯз аз замони Каюмарс- нахустин подшоҳи пешдодӣ маълум буд».
Дар даврони давлатдории ҳахоманишиён (асрҳои 6-4 то мелод) ҷашн гирифтани Наврӯз ба расмият даромад ва дар асотири мардумони эронӣ, таҷлили онро ба шоҳ Ҷамшед нисбат медиҳанд.
