Бо ташаббуси мақомоти иҷроияи ҳокимияти давлатии шаҳри Душанбе дар доираи эълон гардидани солҳои 2019-2021 ҳамчун Солҳои рушди деҳот, сайёҳӣ ва ҳунарҳои мардумӣ ва дар доираи эълон гардидани «Душанбе — пойтахти фарҳангии Иттиҳод — 2021» дар Муассисаи давлатии фарҳангию фароғатии «Аҳорун»-и пойтахт Фестивали «Сад ранги чакан» баргузор гардид.
Қабл аз оғози фестивал иштирокдорон аз намоишгоҳи ҳунарҳои чакандӯзӣ, сӯзанидӯзӣ, попурдӯзӣ, ки аз ҷониби ҳунармандон ва косибони шаҳри Душанбе ташкил гардида буд, дидан намуданд.
Сипас муовини Раиси шаҳри Душанбе Мавсума Муинӣ чорабиниро ифтитоҳ намуда, мақсади асосии баргузории фестивалро баланд бардоштани эҳсоси ватандӯстиву хештаншиносӣ, ифтихори миллӣ, қадру манзалати либоси миллӣ, суръату сифати тоза бахшидан ба истеҳсоли матоъҳои гуногуни миллӣ, аз қабили чакану чакандӯзӣ, сӯзанидӯзиву гулдӯзӣ, порадӯзӣ, инчунин муаррифии санъату ҳунари волои халқи тоҷик дар арсаи байналмилалӣ маънидод намуд.
Дар Фестивал таъкид гардид, ки мояи хурсандист, ки баъд аз ба Рӯйхати мероси фарҳангии ғайримоддии башарият шомил гардидани «Оши палав» ва ҷашни Наврӯз ин навъи санъати гулдӯзии тоҷикӣ низ аз ҷониби Идораи илму фарҳанги Созмони Милали Муттаҳид ЮНЕСКО ба Рӯйхати мероси фарҳангии ғайримоддии башарият ворид карда шуд.
Дар интиҳои чорабинӣ ғолибони бахшҳои он ва иштирокчиёни фаъол бо диплому сипоснома ва туҳфаҳои таъсиснамудаи мақомоти иҷроияи ҳокимияти давлатии шаҳри Душанбе сарфароз гардонида шуданд.