Ба ифтихори 30-солагии Истиқлоли давлатии Ҷумҳурии Тоҷикистон ва 110-солагии зодрӯзи Шоири халқии Тоҷикистон, Қаҳрамони Тоҷикистон Мирзо Турсунзода бо ташаббуси Ҷамъияти «Тоҷикони Шарқи Дур» дар китобхонаи бачагонаи №1-и шаҳри Хабаровск барномаи пуршукӯҳи фарҳангӣ-адабӣ баргузор гардид.
Тавре АМИТ «Ховар» иттилоъ медиҳад, дар ин маҳфил хонандагони мактаби кадетии шаҳри Хабаровск иштирок намуда, нахуст аз намоши аксу мусаввараҳо, расму оинҳои миллӣ ва дигар дастовардҳо, ки инъикоскунандаи таърихи солҳои соҳибистиқлолии Тоҷикистонанд, дидан намуда, сипас дар қисми дигари барнома ширкати фаъол намуданд.
Хонандагонро бо дастовардҳои арзандаи халқи тоҷик, ки бо талошҳои пайвастаи Пешвои миллат муҳтарам Эмомалӣ Раҳмон давоми 30 соли Истиқлоли давлатӣ ба он ноил гардидаанд, шинос намуданд. Қисми дигари маҳфил ба ифтихори 110-солагии Шоири халқии Тоҷикистон Мирзо Турсунзода, ҳаёту фаъолият ва эҷодиёти ин шоири тавоно бахшида шуд. Хонандагон дар баробари шиносоӣ бо осори гаронбаҳои Қаҳрамони Тоҷикистон, ҳамчунин аз ашъори ӯ бо забонҳои тоҷикӣ ва русӣ шеърҳо қироат карданд.