18 май бахшида ба ҷашни 30-солагии Истиқлоли давлатии Ҷумҳурии Тоҷикистон, Пойтахти фарҳангии ИДМ эълон гардидани шаҳри Душанбе ва Рӯзи байналмилалии осорхонаҳо дар Осорхонаи миллии Тоҷикистон таҳти унвони «Шабе дар Осорхона» иқдоми байналмилалӣ баргузор шуда, дар як шаб 30 барномаи фарҳангӣ-фароғатӣ пешниҳоди меҳмонон ва иштирокчиён гардонида мешаванд. Дар ин бора сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев ба хабарнигори АМИТ «Ховар» иттилоъ дод.
Мавсуф зикр намуд, ки барномаҳо ба ҳамаи қишрҳои ҷомеа нигаронида шудаанд. Яъне, дар ин шаб аз тамошобини хурд то бузург вобаста ба синн метавонанд барои худ барномае пайдо намоянд.
Осорхонаи миллии Тоҷикистон дар ин шаб дар якҷоягӣ бо ҳунармандони театри Лоҳутӣ барномаи ҷолиби дигарро пешниҳоди ҳозирин мегардонад. Инчунин бахшида ба 30-солагии Истиқлоли давлатӣ дастовардҳои меъмории шаҳри Душанбе низ муаррифӣ мегарданд. Иқдоми «Шабе дар Осорхона» дар Тоҷикистон маротибаи 8-ум аст, ки баргузор мегардад. Ёдовар мешавем, ки ҳамасола 18 май Рӯзи байналмилалии осорхонаҳо ( International Museum Day ) ҷашн гирифта мешавад ва аз соли 1978 инҷониб 150 давлати ҷаҳон ин рӯзро таҷлил менамоянд.