1 апрели соли 2022 дар доираи татбиқи сиёсати фарҳангпарварона ва таваҷҷуҳу ғамхории доимии Президенти Ҷумҳурии Тоҷикистон муҳтарам Эмомалӣ Раҳмон нисбат ба фарҳангу маданияти миллӣ, Муассисаи давлатии телевизиони «Сайёҳӣ ва ҳунарҳои мардумӣ» ба фаъолият шурӯъ намуд. Ин яке аз муҳимтарин рӯйдодҳоест, ки дар шашмоҳаи аввали соли равон дар соҳаи телевизион ва радиошунавонии мамлакат ба амал омад. Ин нуктаро имрӯз Раиси Кумитаи телевизион ва радиои назди Ҳукумати Ҷумҳурии Тоҷикистон Нуриддин Саид дар ҷамъи хабарнигорон таъкид намуд. Тибқи иттилои роҳбарияти Кумита, телевизиони «Сайёҳӣ ва ҳунарҳои мардумӣ» ҳамарӯза барои бинандагон силсилаи намоишҳои иттилоотӣ, маърифатӣ, фарҳангию фароғатӣ, ролику лавҳаҳои тарғиботии инъикоскунандаи бахши сайёҳию ҳунармандии мамлакатро таҳия ва пешниҳод менамояд. Тибқи иттилои Нуриддин Саид, айни замон Кумита масъалаи ба моҳвора пайваст намудани ТВ «Сайёҳӣ ва ҳунарҳои мардумӣ» ва ТВ «Илм ва табиат» бо ширкати «Ал-Майсан» – Аморати Муттаҳидаи Араб баррасӣ дорад ва аз рӯйи мувофиқаи пешакии тарафҳо, шабакаҳои номбурда низ дар қатори дигар шабакаҳои ватанӣ дар арафаи 31- солагии Истиқлолияти давлатӣ ба моҳвора пайваст хоҳад шуд.
Вобаста ба такмили ихтисоси кормандони соҳа хабар дода шуд, ки дар ин самт бо Академияи васоити ахбори омма корбарӣ ҷараён дошта, ояндаи наздик барои баланд бардоштани такмили ихтисоси кормандон мутахассисони маъруфи ҷаҳонӣ даъват мешаванд. Дар доираи «Барномаи давлатии рушди телевизион ва радио дар Ҷумҳурии Тоҷикистон барои солҳои 2021-2025» чанд нафар кормандон барои табодули таҷриба ба хориҷи кишвар фиристода мешаванд. Тавре зикр шуд, онҳо маҳз ба омӯзиши ихтисосҳое, ки дар дохили кишвар ба роҳ монда нашудаанд, ҷалб мегарданд. Зикр гардид, ки дар шаш моҳи соли 2022 дар Муассисаи давлатии «Академияи васоити ахбори оммаи Тоҷикистон» 10 машғулияти омӯзишӣ гузаронида шуда, дар он 115 нафар корманди эҷодию техникии шабакаҳои телевизионию радиои марказӣ ва минтақавӣ, инчунин матбуоти даврӣ иштирок намуданд ва ба 84 нафар гувоҳнома ( сертификат ) супорида шуд.