Муштариёни азиз!
Дар Ҷумҳурии Тоҷикистон об манбаи асосии истеҳсоли неруи барқ мебошад.
Зиёда аз 90 фоизи барқи кишвар дар неругоҳҳои барқи обӣ истеҳсол карда мешавад ва ҳаҷми истеҳсоли барқ ба ташаккули оби дарёҳо алоқамандии бевосита дорад.
Ҳамватанони мо дар хотир доранд, ки зимистони гузашта камбориш омад ва вобаста ба ин захираи об дар минтақаҳои ташаккулёбии дарёи Вахш хеле кам гардид.
Ғайр аз ин, сол ба сол зиёд шудани талаботи аҳолӣ ва соҳаҳои иҷтимоиву иқтисодии мамлакат ба барқ норасоии мавсимии онро ба миён меоварад.
Чунин вазъ тақозо менамояд, ки барои дар фасли зимистон бо барқ таъмин намудани муштариён тадбирҳои иловагӣ андешида шаванд.
Ҳоло манбаи асосии захираи энергетикии кишвари мо обанбори неругоҳҳои барқи обии «Норак» ва «Қайроқум» мебошанд, ки аз рӯи таъиноти худ имкони танзими яксолаи захираи обро доранд.
Имрӯз обанбори неругоҳи «Норак» то нуқтаи ниҳоӣ аз об пур карда шудааст.
Вале ҳаҷми воқеии резиши об дар муқоиса ба соли гузашта ва ҳисоби миёнаи бисёрсола кам аст.
Вобаста ба ин, аз рӯи ҳисоби мутахассисони соҳа соли ҷорӣ норасоии мавсимии неруи барқ дар ҳаҷми беш аз як миллиард киловатт – соат пешгўӣ карда шудааст.
Кам будани ҳаҷми захираи об моро водор месозад, ки барои истеҳсоли барқ дар мавсими зимистон асосан оби дар обанборҳо захирашударо истифода барем.
Ҳамзамон бо ин, таҷрибаи солҳои қаблӣ нишон медиҳад, ки барои таъмини беҳтари барқ дар мавсими сармо ҷорӣ кардани маҳдудият дар давраи нисбатан гарм будани ҳаво барои аҳолӣ мушкилоти зиёд намеоварад.
Амалисозии ин тадбир имкон медиҳад, ки оби сарфагардида дар мавсими сармо, яъне моҳҳои декабр, январ ва феврал барои шабонарӯзӣ бо неруи барқ таъмин кардани аҳолӣ истифода гардад.
Ҳамчунин, мутахассисону коршиносон зимистони дарпешистодаро бисёр сард ва тӯлонӣ пешгӯӣ карда истодаанд.
Аз ин рӯ, тасмим гирифтем, ки аз 22 сентябри соли 2024 дар ҳолатҳои зарурӣ дар таъмини барқ маҳдудият ҷорӣ намоем.
Ҳамватанони азизи мо як масъаларо бояд дар назар дошта бошанд, ки мушкилоти имрӯза, яъне маҳдудияти интиқоли барқ дар солҳои надиктарин, яъне бо расидан ба истиқлоли энергетикӣ аз байн меравад.
Дар шароити бавуҷудомада мо аз мардуми шарифи Тоҷикистон хоҳиш мекунем, ки ба зимистон омодагии ҳамаҷониба бинанд, ҳар як оила, ташкилоту муассиса ва корхона дар мавсими тирамоҳу зимистон неруи барқро сарфакорона истифода баранд.
Вобаста ба ин, хотиррасон месозем, ки агар мо истифодаи сарфакоронаи неруи барқро аз ҳар як оила сар карда, то ташкилоту муассисаву корхонаҳо таъмин кунем, ба истифодаи ғайриқонунӣ ва талафоти он роҳ надиҳем, захираҳои мавҷуда барои таъминоти аҳолӣ ва соҳаҳои иқтисодиёт басанда мебошанд.
Муштариёни азиз!
Сохторҳои низоми энергетикии кишвар барои маҳдуд намудани таъминоти барқ манфиатдор нестанд.
Вале захираҳои обию энергетикие, ки мо имрӯз дар ихтиёр дорем, ҳаминро тақозо менамояд.
Ҳар як киловатт соате, ки дар ин рӯзҳои мусоид сарфа мегардад, барои дар мавсими сармои шадид бештар бо барқ таъмин намудани муштариён истифода бурда мешавад.
Маркази матбуоти
ҶСК «Барқи Точик»