30 октябр дар шаҳри Пекини Ҷумҳурии Мардумии Чин семинари кормандони хабаргузориҳо ва рӯзноманигорони кишварҳои Осиёи Марказӣ оғоз шуд. Тоҷикистонро дар ин нишаст намояндагони Вазорати фарҳанг, Кумитаи телевизион ва радио, Агентии миллии иттилооти Тоҷикистон «Ховар» ва Мақомоти иҷроияи ҳокимияти давлатии шаҳри Душанбе намояндагӣ мекунанд.
Дар семинар, ки то 12 ноябр идома мекунад, намояндагони Қазоқистон, Ӯзбекистон ва Туркманистон низ ширкат доранд.
Дар маросими ифтитоҳи ин семинар гуфта шуд, ки ин семинар як барномаи вижаи омӯзишии касбӣ барои кормандони хабаргузорӣ ва рӯзноманигорони кишварҳои Осиёи Марказӣ мебошад.
Тавассути семинар як платформаи табодули афкор ва ҳамкории Чин ва кишварҳои Осиёи Марказӣ дар соҳаи ВАО таъсис дода мешавад, ки ба ҳамкориҳо ва табодули амиқи ду ҷониб дар ин замина низ мусоидат мекунад.