27-уми январи соли 2025 дар бинои Кумитаи телевизион ва радиои назди Ҳукумати Ҷумҳурии Тоҷикистон нишасти матбуотӣ оид ба ҷамъбасти фаъолияти Кумита ва сохторҳои зертобеъи он дар соли 2024 баргузор гардид, ки дар он ба саволҳои намояндагони воситаҳои ахбори омма раиси Кумита Носир Саидзода ва роҳбарони сохторҳои зертобеъ посух гуфтанд.
Дар нишасти матбуотӣ раиси Кумитаи телевизион ва радиои назди Ҳукумати Ҷумҳурии Тоҷикистон Носир Саидзода, муовинони раис, намояндаи Дастгоҳи иҷроияи Президенти Ҷумҳурии Тоҷикистон, директори шабакаҳои телевизион ва радио, роҳбарони сохторҳои Кумита ва намояндагони ВАО иштирок карданд.
Ба рӯзноманигорон иттилоъ дода шуд, ки Кумитаи телевизион ва радиои назди Ҳукумати Ҷумҳурии Тоҷикистон ва воҳидҳои сохтории он фаъолияти худро дар соли 2024 тибқи Конститутсияи Ҷумҳурии Тоҷикистон, амру фармон ва дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қонунҳои Ҷумҳурии Тоҷикистон, қарору фармоишҳои Ҳукумати Ҷумҳурии Тоҷикистон, Паёми Президенти Ҷумҳурии Тоҷикистон ба Маҷлиси Олӣ ва дигар санадҳои меъёрии ҳуқуқии соҳа ба роҳмонда, соли 2024-ро бо натиҷаҳои назаррас ҷамъбаст намуданд. Аз ҷумла, “Барномаи давлатии рушди телевизион ва радио дар Ҷумҳурии Тоҷикистон барои солҳои 2021-2025” ва “Барномаи давлатии рушди пахши телевизиони рақамӣ барои солҳои 2020-2024” татбиқ гардид. Баъд аз иҷрои пурраи Барномаи давлатии рушди пахши телевизиони рақамӣ фарогирии аҳолии ҷумҳурӣ бо пахши телевизиони рақамӣ аз 65,8% ба 86% расонида шуда, ба андозаи 20,2% зиёд гардид. “Барномаи давлатии рушди телевизион ва радио дар Ҷумҳурии Тоҷикистон барои солҳои 2021-2025” бошад барномаи маҷмуӣ буда, он масъалаҳои баланд бардоштани сатҳу сифати барномаҳо, такмили тахассус ва зина ба зина таҳким бахшидани заминаҳои техникиро дар бар мегирад.
Ҳамчунин, иттилоъ дода шуд, ки дар доираи татбиқи барномаи мазкур дар маҷмуъ соли 2024 Муассисаи давлатии “Академияи ВАО-и Тоҷикистон” 20 машғулияти омӯзишӣ дар самтҳои продюссерӣ, дизайни барномаҳо, сенариянависӣ, ороишгарӣ, маҳорати суханварӣ, наворбардорӣ, рушди мултимедия, коргардонӣ, забономӯзӣ ва дигар равияҳои марбут ба соҳаи телевизион, радио ва матбуот бо ҷалби мутахассисони ватанӣ ва хориҷӣ баргузор намуд.
Дар робита ба саволи хабарнигорон оид ба такмили ихтисоси кормандони соҳа иттилоъ дода шуд, ки дар давоми сол 428 нафар кормандони шабакаҳои телевизион, радио, нашрияҳои даврӣ, котибони матбуотии вазорату идораҳо ба такмили ихтисос фаро гирифта шудаанд.
Дар нишасти матбуотӣ гуфта шуд, ки дар доираи барномаи рушди телевизион дар самти ба формати рақамӣ гузаронидани шабакаҳои телевизионӣ ва радиоии давлатӣ ТВ Бадахшон низ ба формати пахши дақиқияташ баланд HD ба пуррагӣ омода карда шуд, ки рӯзҳои наздик ба истифода дода мешавад.
Доир ба ҳамкориҳои байналмилалии Кумита иттилоъ дода шуд, ки бахши муносибатҳои байналмилалӣ дар ин марҳила раванди ҳамкориҳоро бо шарикони нав рушду тавсеа бахшид. Кумита дар ин давра бо сохторҳои марбутаи Ҷумҳурии Қазоқистон ва Ҷумҳурии Мардумии Чин созишномаи ҳамкорӣ имзо кард.
Роҳбарияти Кумита вобаста ба тақвияти ҳамкориҳо бо намояндаи як қатор созмонҳои муқими Тоҷикистон суҳбату вохӯриҳо анҷом доданд. Аз ҷумла, бо сардори шуъбаи иртибот, таблиғот ва ҳамкории ЮНИСЕФ дар Тоҷикистон, бо роҳбари дафтари намояндагии Агентии Туркия оид ба ҳамкорӣ ва ҳамоҳангсозӣ (ТИКА) дар Тоҷикистон, бо намояндагони Созмони садо ва симои Ҷумҳурии Исломии Эрон, бо намояндагони Шурои роҳбарони ташкилотҳои давлатӣ ва ҷамъиятии телерадиоии кишварҳои узви ИДМ мулоқоти маҷозӣ баргузор намуда, масъалаҳои рушди ҳамкориҳои байналмилалӣ, аз ҷумла дар бахшҳои такмили ихтисоси кормандон, таҳияи филмҳои аниматсионӣ ва ғайраро баррасӣ кард.
Ҳамзамон, дар нишаст иброз гардид, ки тавассути шабакаҳои давлатии телевизион ва радио сохтори Кумита дар соли 2024 бо мақсади таъмини сабти пурра ва инъикоси рўйдоду чорабиниҳои муҳим, аз ҷумла, сафарҳои дохилию хориҷӣ ва вохўрию мулоқотҳои Президенти Ҷумҳурии Тоҷикистон бо намояндагони ҷумҳуриҳои дигар ва созмонҳои байналмилалию минтақавӣ, рафти баргузории ҷашну идҳои миллию давлатӣ ва касбӣ, инчунин, тарѓибу ташвиқи сиёсати давлату Ҳукумати Ҷумҳурии Тоҷикистон, дастовардҳои замони соҳибистиқлолии мамлакат, баррасии мушкилоти иҷтимоию иқтисодӣ, вазъи минтақа ва ҷаҳон, мубориза бар зидди терроризму ифротгароӣ ва дигар мавзуъҳо як қатор корҳо ба анҷом расонда шуд.
Шабакаҳои телевизиони ҷумҳуриявӣ ва минтақавӣ дар соли 2024, дар маҷмуъ 653 номгӯйи барномаҳои гуногунжанрро таҳия ва пахш намуданд. Аз ин 76 номгӯйи барномаҳо лоиҳаҳои нав мебошанд, ки соли 2024 рӯйи кор омадаанд. Шабакаҳои радиои ҷумҳуриявӣ ва минтақавӣ дар давраи ҳисоботӣ, дар маҷмўъ, 319 номгўйи барномаву гуфторҳои таҳлилию фарҳангиро мунтазам таҳия ва пахш намуданд. Аз ин 33 номгўйи барномаҳо лоиҳаҳои нав мебошанд.
Дар ҷавоб ба саволи хабарнигорон оид ба расмияти фаъолияти шабакаи телевизиониву радиоӣ ва студияи истеҳсоли маҳсулоти аудиовизуалӣ гуфта шуд, ки дар соли 2024 аз ҷониби Бозрасии давлатии назорат дар соҳаи телевизион ва радиошунавонӣ фаъолияти 14 шабакаи телевизиониву радиоӣ ва студияи истеҳсоли маҳсулоти аудиовизуалӣ ба расмият дароварда шуд. Аз ин миқдор 6 адад телевизион, 5 адад радио ва 3 адади дигар студияи истеҳсоли маҳсулоти аудиовизуалӣ мебошад. Айни замон дар мамлакат 101 шабакаи давлативу хусусии телевизиону радио ва студияҳои истеҳсоли маҳсулоти аудиовизуалӣ, аз ҷумла 15 телевизиону 10 радиои давлатӣ, 18 телевизиони хусусӣ, 16 телевизиони ноқилӣ, 4 телевизиони IP, 24 радиои хусусӣ ва 14 студияи истеҳсоли маҳсулоти аудиовизуалӣ фаъолият доранд.
Дар нишасти матбуотӣ намояндагони васоити ахбори омма ба саволҳои худ оид ба паҳлӯҳои фаъолияти Кумита ва сохторҳои он посухҳои мушаххас гирифтанд.