Бостоншиносони Осорхонаи миллии Тоҷикистон дар асоси иҷозатномаи мақоми ваколатдори давлатӣ – Агентии ҳифзи мероси таърихию фарҳангии назди Ҳукумати Ҷумҳурии Тоҷикистон корҳои таҳқиқотӣ-бостоншиносиро дар ҳудуди ёдгории таърихии Сайёд оғоз намуданд. Дар ин хусус АМИТ «Ховар» бо истинод ба Осорхонаи миллии Тоҷикистон иттилоъ медиҳад.
Тибқи хабари манбаъ, ёдгории Сайёд марбут ба замони Кушониён буда, дар ноҳияи Абдураҳмони Ҷомии вилояти Хатлон воқеъ аст.
Таҳқиқу омӯзиши ин ёдгории нодир, ки то ҳол мавриди омӯзиши густурда қарор нагирифтааст, дар оянда имконият медиҳад, ки саҳифаҳои нави таърихи миллати тоҷик кушода ва дастраси мардуму аҳли илм гарданд.
Бори нахуст дар замони соҳибистиқлолӣ мутахассисони Осорхонаи миллӣ ин ёдгориро соли 2016 мавриди омӯзиш қарор дода, аз он осори гуногуни таърихӣ пайдо намуданд.