21.07.2026, Муғулистон
Бо даъвати Президенти Муғулистон муҳтарам Ухнаагийн Хурэлсух Президенти Ҷумҳурии Тоҷикистон муҳтарам Эмомалӣ Раҳмон рӯзҳои 20-22 июли соли 2026 бо сафари давлатӣ аз Муғулистон боздид ба амал овард.
Музокироти расмии сарони ду давлат (минбаъд — Тарафҳо) дар фазои дӯстона, самимӣ ва эътимоди мутақобил баргузор гардиданд.
Тарафҳо қайд намуданд, ки сафари давлатии Президенти Муғулистон муҳтарам Ухнаагийн Хурэлсух ба Ҷумҳурии Тоҷикистон дар соли 2025, инчунин сафарҳои давлатии Президенти Ҷумҳурии Тоҷикистон муҳтарам Эмомалӣ Раҳмон ба Муғулистон дар солҳои 2009 ва 2026 муносибатҳои анъанавии дӯстонаи байни ду кишварро ба сатҳи сифатан нав бароварда, самтҳои асосии ҳамкории амалиро барои солҳои минбаъда муайян намуданд.
Дар ҷараёни музокироти расмӣ Тарафҳо оид ба имкониятҳои густариши муносибатҳои анъанавии дӯстонаи Тоҷикистону Муғулистон дар тамоми соҳаҳо мубодилаи афкор намуда, инчунин масъалаҳои фаъолсозии муколамаи сиёсӣ ва ҳамкории дуҷонибаро дар бахшҳои тиҷорату иқтисод, кишоварзӣ, энергетикаи барқароршаванда, нақлиёт ва логистика, маориф, фарҳанг, сайёҳӣ, саноат, канданиҳои фоиданок, геология, инчунин ҳамкорӣ дар чаҳорчӯби созмонҳои байналмилалӣ ва минтақавӣ мавриди баррасӣ қарор доданд.
Бо таъйиди азми худ ҷиҳати таҳкими минбаъдаи муносибатҳои дӯстона ва ҳамкории барои ҷонибҳо судманд дар асоси Изҳороти муштарак оид ба принсипҳои асосии муносибатҳои Ҷумҳурии Тоҷикистон ва Муғулистон, Изҳороти муштараки Ҷумҳурии Тоҷикистон ва Муғулистон дар бораи рушди минбаъда, таҳкими муносибатҳои дӯстона ва ҳамкории гуногунҷанба, инчунин, шартномаҳо ва созишномаҳои байни ду давлат, Тарафҳо бори дигар пуштибонии худро аз рушди муносибатҳои дӯстона ва ҳамкории мутақобилан судманд тасдиқ намуда, дар бораи масъалаҳои зерин ба мувофиқа расиданд:
1. Тарафҳо таъкид намуданд, ки табодули сафарҳои давлатии сарони ду давлат, ки дар давоми як сол анҷом ёфтанд, ифодаи равшани талошҳои Ҷумҳурии Тоҷикистон ва Муғулистон ҷиҳати тавсеа ва рушди минбаъдаи муносибатҳои дӯстона ва ҳамкорӣ мебошад.
2. Тарафҳо аҳамияти рушди робитаҳои байнипарламентиро таъкид намуда, ба мувофиқа расиданд, ки ҳамкорӣ байни Маҷлиси намояндагони Маҷлиси Олии Ҷумҳурии Тоҷикистон ва Хурали давлатии бузурги Муғулистон, инчунин, кумитаҳои доимӣ ва гурӯҳҳои дӯстии онҳо бо мақсади таҳкими минбаъдаи ҳамкорӣ идома дода шавад.
3. Тарафҳо имзои 11 санади ҳамкориро, ки дар доираи сафари давлатӣ дар бахшҳои тиҷорату иқтисод, маориф, сиёсати ҷавонон, варзиш, сайёҳӣ, геология, канданиҳои фоиданок, ҳифзи муҳити зист ва саноат ба имзо расиданд, истиқбол намуданд.
4. Тарафҳо ба мувофиқа расиданд, ки ба афзоиши содироти меваю сабзавот, буттамева ва маҳсулоти пахтагии Ҷумҳурии Тоҷикистон, инчунин воридоти гӯшт ва маҳсулоти гӯштӣ, пашм, кашемир ва ашёи хоми чарм аз Муғулистон мусоидат намоянд.
5. Тарафҳо ба мувофиқа расиданд, ки ҳамкории истеҳсолкунандагони пашм ва кашемири босифати Муғулистонро бо саноати пахтаву нассоҷии Ҷумҳурии Тоҷикистон бо мақсади ташкили истеҳсоли муштараки маҳсулоти дорои арзиши баланди иловашуда густариш диҳанд.
6. Тарафҳо ба мувофиқа расиданд, ки Гурӯҳи кории муштарак оид ба ҳамкорӣ дар соҳаи кишоварзии ду кишвар таъсис дода, тадбирҳоро оид ба густариши робитаҳои тиҷоратию иқтисодӣ, афзоиши мубодилаи маҳсулоти кишоварзӣ ва табодули иттилоот байни корхонаҳои содироткунанда марҳила ба марҳила амалӣ намоянд.
7. Тарафҳо ба мувофиқа расиданд, ки ҳамкориро дар самти ҳамоҳангсозии талаботи назорати фитосанитарӣ вобаста ба воридот, содирот ва транзити растаниҳо, маҳсулоти растанигӣ ва дигар молҳои таҳти танзим рушд диҳанд.
8. Тарафҳо ба мувофиқа расиданд, ки дар татбиқи лоиҳаҳо ва барномаҳое, ки ба дастгирии содирот, рушди ҳамкорӣ байни соҳибкорон ва сармоягузорони ду кишвар, инчунин пешбурди муҳити соҳибкорӣ ва сармоягузорӣ равона шудаанд, ҳамкорӣ намоянд.
9. Сарони давлатҳо аз таъсиси Шӯрои соҳибкорони Тоҷикистону Муғулистон истиқбол намуда, таъкид карданд, ки он ба рушди ҳамкории тиҷоратию иқтисодӣ ва сармоягузорӣ мусоидат хоҳад кард.
10. Тарафҳо ба мувофиқа расиданд, ки ҳамкории зичи байни вазорату идораҳои дахлдори ду кишварро дар соҳаи нақлиёт бо мақсади бартараф намудани монеаҳои мавҷуда дар соҳаи нақлиёт ва логистика ва фароҳам овардани шароити мусоид барои ташаккули масирҳои самараноки нақлиётӣ роҳандозӣ намоянд.
11. Муғулистон ҷониби Тоҷикистонро барои иштирок дар сатҳи баланд дар Конфронси вазирони Барномаи ҳамкории иқтисодии минтақавии Осиёи Марказӣ (CAREC), ки моҳи сентябри соли 2026 дар шаҳри Улан-Батор баргузор мегардад, даъват намуд.
12. Тарафҳо аз баргузории чорабинии «Рӯзи фарҳанги Тоҷикистон» дар шаҳри Улан-Батор, ки дар доираи сафари давлатӣ баргузор гардид, истиқбол намуданд.
13. Тарафҳо ба мувофиқа расиданд, ки ҳамкориро байни осорхонаҳои миллии ду кишвар тавассути омӯзиш ва муайян намудани сарчашмаҳои таърихӣ, ҳуҷҷатҳо ва ёдгориҳои марбут ба мероси нодири таърихию фарҳангӣ, анҷом додани таҳқиқоти муштарак оид ба мероси ғайримоддии фарҳангӣ ва татбиқи барномаҳои муштарак густариш диҳанд.
14. Тарафҳо оид ба имкониятҳои ҳамкорӣ ва омӯзиши таҷрибаи Ҷумҳурии Тоҷикистон дар соҳаи гидроэнергетика мубодилаи афкор намуда, зарурати фаъолсозии ҳамкориро дар бахшҳои энергетикаи анъанавӣ, манбаъҳои барқароршавандаи энергия ва «энергияи сабз», ҷорӣ намудани технологияҳои муосир ва таҳкими заминаи ҳуқуқӣ барои татбиқи лоиҳаҳо дар соҳаи неругоҳҳои барқи обӣ таъкид намуданд.
15. Тарафҳо аз баргузории нахустин ҷаласаи Комиссияи байниҳукуматӣ оид ба ҳамкории тиҷоратию иқтисодӣ, илмӣ ва техникӣ истиқбол намуда, изҳори итминон карданд, ки он ба механизми муассири татбиқи тавофуқҳои ҳосилшуда табдил хоҳад ёфт.
16. Тарафҳо ба мувофиқа расиданд, ки лоиҳаҳо ва барномаҳои муштаракро тавассути ҳамоҳангсозии «Барномаи давлатии кабудизоркунии Ҷумҳурии Тоҷикистон барои давраи то соли 2040» ва ҳаракати миллии Муғулистон «Як миллиард дарахт», ки бо ташаббус ва роҳбарии сарони ду давлат амалӣ мешаванд, татбиқ намоянд.
17. Тарафҳо тасдиқ намуданд, ки Ҷумҳурии Тоҷикистон ва Муғулистон ба таври анъанавӣ дар доираи Созмони Милали Муттаҳид ва дигар созмонҳои байналмилалӣ аз якдигар дастгирӣ намуда, минбаъд низ чунин ҳамкориро мутақобиларо идома хоҳанд дод.
18. Ҷумҳурии Тоҷикистон саҳми Муғулистонро дар пешбурди манфиатҳои кишварҳои рӯ ба тараққии маҳсур дар хушкӣ баланд арзёбӣ намуд.
19. Муғулистон ташаббусҳои байналмилалии Президенти Ҷумҳурии Тоҷикистонро дар соҳаҳои дипломатияи об, ҳифзи пиряхҳо ва мубориза бо тағйирёбии иқлим баланд арзёбӣ намуд.
20. Тарафҳо омодагии худро барои таҳкими ҳамкорӣ дар масъалаҳои истифодаи оқилонаи захираҳои об, мутобиқшавӣ ба тағйирёбии иқлим, ҳифзи пиряхҳо ва татбиқи ташаббусҳои байналмилалӣ дар соҳаи об, аз ҷумла Даҳсолаи байналмилалии амал «Об барои рушди устувор» (2018-2028), Соли байналмилалии ҳифзи пиряхҳо (2025) ва Даҳсолаи амал оид ба дастгирии илмҳои криосфера (2025-2034) тасдиқ намуда, нақши муҳими онҳоро дар омодагӣ ба Конфронсҳои Созмони Милали Муттаҳид оид ба захираҳои об дар солҳои 2026 ва 2028 таъкид карданд.
21. Тарафҳо қайд намуданд, ки Ҷумҳурии Тоҷикистон ҳамчун яке аз нахустин давлатҳои узви Маркази байналмилалии тадқиқотии кишварҳои рӯ ба тараққии маҳсур дар хушкӣ, ки бо ташаббуси Муғулистон таъсис ёфтааст, фаъолияти онро пайгирона дастгирӣ намуда, ба мувофиқа расиданд, ки талошҳои худро ҷиҳати ҳифзи манфиатҳои кишварҳои маҳсур дар хушкӣ дар доираи Созмони Милали Муттаҳид ва дигар созмонҳои байналмилалӣ ҳамоҳанг созанд.
22. Ҷумҳурии Тоҷикистон омодагии худро барои иштирок дар кори Иҷлосияи 17-уми Конфронси Тарафҳои Конвенсияи Созмони Милали Муттаҳид оид ба мубориза бар зидди биёбоншавӣ (COP-17), ки соли 2026 дар Муғулистон баргузор мегардад, изҳор намуд.
23. Тарафҳо ба мувофиқа расиданд, ки ба пешбурди брендҳои миллии сайёҳии Ҷумҳурии Тоҷикистон «Feel the Friendship» ва Муғулистон «Go Mongolia», татбиқи лоиҳаҳои муштарак дар соҳаи сайёҳӣ, густариши табодули сайёҳон, такмили зерсохтори сайёҳӣ ва ҷалби сармоягузорӣ ба ин соҳа мусоидат намоянд.
24. Президенти Ҷумҳурии Тоҷикистон муҳтарам Эмомалӣ Раҳмон ба Президенти Муғулистон муҳтарам Ухнаагийн Хурэлсух ва мардуми дӯсти Муғулистон барои меҳмоннавозии гарму самимӣ ва пазироии самимона арзи сипоси самимӣ намуда, изҳори итминон кард, ки тавофуқҳои дар ҷараёни сафари давлатӣ ҳосилшуда ба таҳкими минбаъдаи дӯстии Тоҷикистону Муғулистон, тавсеаи ҳамкории мутақобилан судманд ва шукуфоии мардумони ҳар ду давлат мусоидат хоҳанд намуд.