24 июл дар доираи нишасти Шурои вазирони корҳои хориҷии давлатҳои аъзои Созмони ҳамкории Шанхай дар шаҳри Чолпон-Отаи Ҷумҳурии Қирғизистон Вазири корҳои хориҷии Ҷумҳурии Тоҷикистон Сироҷиддин Муҳриддин бо вазирони корҳои хориҷии Чин, Қирғизистон ва Покистон мулоқот намуд. Дар ин хусус ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.
Дар мулоқот бо узви Шурои давлатӣ ва бюрои сиёсии Кумитаи Марказии Ҳизби коммунисти Чин, Мудири канселярии Комиссияи Кумитаи Марказии Ҳизби коммунисти Чин оид ба корҳои хориҷӣ, Вазири корҳои хориҷии Ҷумҳурии Мардумии Чин Ван И ҷонибҳо вазъ ва дурнамои рушди муносибатҳои Тоҷикистону Чинро дар доираи васеи масъалаҳои рӯзномаи дуҷониба баррасӣ намуда, оид ба таҳкими ҳамкорӣ дар бахшҳои мавриди таваҷҷуҳи муштарак мубодилаи афкор карданд.
Ҳамчунин масъалаҳои ҳамкорӣ дар доираи созмонҳои байналмилалӣ ва минтақавӣ, аз ҷумла Созмони ҳамкории Шанхай мавриди баррасӣ қарор гирифтанд.
Зимни мулоқот бо Вазири корҳои хориҷии Ҷумҳурии Қирғизистон Жеенбек Кулубаев масъалаҳои рушду таҳкими муносибатҳои дуҷониба ва бисёрҷониба баррасӣ гардиданд.
Таваҷҷуҳи махсус ба дурнамои густариши ҳамкории тиҷоратию иқтисодӣ, инчунин рушди робитаҳои фарҳангию гуманитарӣ зоҳир карда шуд.
Ҷонибҳо ҳамчунин оид ба масъалаҳои муҳими рӯзномаи байналмилалӣ мубодилаи афкор намуда, барои идомаи таҳкими ҳамкорӣ дар доираи Созмони Милали Муттаҳид, Созмони ҳамкории Шанхай ва дигар ниҳодҳои байналмилалӣ изҳори омодагӣ намуданд.
Дар мулоқот бо муовини Сарвазир, Вазири корҳои хориҷии Ҷумҳурии Исломии Покистон Муҳаммад Исҳоқ Дор ҷонибҳо атрофи масъалаҳои муҳими ҳамкории дуҷониба, инчунин тақвияти ҳамкории Тоҷикистону Покистон дар чаҳорчӯби созмонҳои минтақавӣ ва байналмилалӣ мубодилаи афкор намуданд.
Дар анҷоми мулоқотҳо ҷонибҳо барои густариши ҳамкории мутақобили судманд ва таҳкими минбаъдаи робитаҳо, бахусус дар бахшҳои иқтисод, тиҷорат, саноат, энергетика ва ҳамкорӣ дар доираи созмонҳои байналмилалӣ ибрози омодагӣ карданд.