22 июл Намояндаи доимии Ҷумҳурии Тоҷикистон дар Созмони Милали Муттаҳид Ҷонибек Ҳикмат бо муовини Дабири кулли Созмони Милали Муттаҳид оид ба иртибототи глобалӣ Мелисса Флеминг мулоқот намуд. Дар ин хусус АМИТ «Ховар» бо истинод ба Намояндагии доимии Ҷумҳурии Тоҷикистон дар Созмони Милали Муттаҳид хабар медиҳад.
Зимни мулоқот ҷонибҳо масъалаҳои ҳамкории Тоҷикистон ва Созмони Милали Муттаҳидро дар соҳаи иртибототи глобалӣ, аз ҷумла иртибототи стратегӣ, иттилоърасонии омма, ҳамкорӣ бо воситаҳои ахбори омма, ҳамоҳангсозии чорабиниҳои муштараки дарпешистода, инчунин муаррифии афзалият ва ташаббусҳои Тоҷикистон ва Созмони Милали Муттаҳид дар самти сулҳ ва фарҳанг тавассути воситаҳои муассири иртиботӣ ва иттилоотӣ мавриди баррасӣ қарор доданд.
Дар анҷоми мулоқот ҷонибҳо барои таҳкими ҳамкории мутақобили судманд ва идомаи муколамаи созанда оид ба масъалаҳои мавриди таваҷҷуҳи муштарак изҳори омодагӣ намуданд.