Таҷлили ботантанаи Рӯзи пойтахт дар Душанбе

Имрӯз фазои пойтахти Ҷумҳурии Тоҷикистон –шаҳри Душанбе қабои идона ба бар дорад, зеро дар ин рӯзи зебои баҳорӣ, сокинони Душанбе Рӯзи пойтахтро ҷашн мегиранд. Ин сана ҳамасола шанбеи сеюми моҳи апрел таҷлил мегардад.

Аз субҳ инҷониб сокинони меҳмонони Душанбе дар ин рӯзи офтобӣ ба сайругашти идона баромадаанд. Дар иртибот ба таҷлили Рӯзи пойтахт бо иқдоми Мақомоти иҷроияи ҳокимияти давлатии шаҳри Душанбе дар тамоми боғҳои фарҳангивю фароғатии пойтахт базмҳои пуршукӯҳи идона бо иштироки дастаҳои ҳунарӣ — ромишгарону мутрибон ташкил гардида, ҳамзамон маҳсули дастони ҳунармандони чирадасти пойтахт, ба намоиш гузошта шудаанд.

Баргузории «Фестивали филмҳои Ҳинд» дар Тоҷикистон

Дар шаҳри Душанбе «Фестивали филмҳои Ҳинд» ифтитоҳ ёфт. Ин чорабинии фарҳангӣ бо ташаббуси Иттифоқи синамогарони Тоҷикистон ва «Киноклуби Сатяҷид Рей» дар ҳамкорӣ бо Сафорати Ҷумҳурии Ҳиндустон дар Тоҷикистон ташкил шуда, ҳадаф аз он таҳкими муносибатҳои дӯстии халқҳоямон мебошад.

Ташкилкунандагони «Фестивали Филмҳои Ҳинд», ки маротибаи аввал аст, дар Тоҷикистон баргузор мегардад, кӯшиш намуданд, ки намунаи беҳтарин филмҳои ин кишвари афсонавиро ба барнома ҷо кунанд. Ин фестивалро мутахассисон рӯйдоди муҳими фарҳангӣ дар кишвар арзёбӣ мекунанд. Масъулини фестивал филмҳоеро интихоб намудаанд, ки бо забони ноби тоҷикӣ баргардонида шудаанд ва ин аз рушди дубляжи тољик низ дарак медиҳад.

Дар доираи ин чорабинӣ 6 филм пешниҳоди тамошобини тоҷик карда мешавад. Давоми 5 рӯзи баъдӣ дар кинотеатри Зебунисои шаҳри Душанбе боз 5 филми ҷолиби дигари истеҳсоли Ҳиндустон намоиш дода хоҳад шуд.

Нахустнамоиши «Эй ҷавонӣ, ҷавонӣ» дар Театри ҷавонон

Дар Театри давлатии ҷавонони Тоҷикистон ба номи Маҳмудҷон Воҳидов намоишномаи наву диданӣ тавлид шуд. Ин спектакл, ки «Эй ҷавонӣ, ҷавонӣ» ном дорад, дар таҳияи коргардон Шавкат Халилов ба саҳна гузошта шуд.

Таҳиягарон мегӯянд, ки тайи чанд муддат ҳайати ҳунарӣ бо ин асар ҳамнафас буданд ва дар якҷоягӣ талош карданд, ки спектаклро диданиву хотирмонро пешниҳод созанд. «Эй ҷавонӣ, ҷавонӣ» драмаи шоир ва нависандаи муосири тоҷик Меҳмон Бахтӣ мебошад ва дар ҳамкорӣ бо ӯ тавлид шуд. Муаллиф маҷбур шуд, ки ин асарро аз нав коркард кунанд, то он ба талаботи имрӯза ва диду завқи бинанда наздику мувофиқ бошад.

Консерти арғунун дар Донишкадаи давлатии фарҳанг ва санъати Тоҷикистон ба номи Мирзо Турсунзода

Масъулони Донишкадаи давлатии фарҳанг ва санъати Тоҷикистон ба номи Мирзо Турсунзода бо ташкили як консерти пуршкӯҳ садои аруғунунро дар фазои ободу озоди ватан дубора танинандоз карданд.

Арғунун садои малакути дошта, аз қадим маҳсули ҳамгироии Шарқу Ғарб эътироф гардидааст. Маҳз садои рӯҳафзову дилнавози арғунун ҳаводорони ин савти малакутиро дар кишвари мо низ хеле зиёд кардааст.

Дар ин консерт арғунуннавозони тоҷик бо маҳорати нотакрор асарҳои бастакорони Тоҷикистону Россия ва дигар бастакорони ҷаҳониро иҷро карданд. Навозиши аруғунун  ва дигар асбобҳои мусиқӣ бо кафкӯбиҳои пурмавҷи тамошобинон истиқбол гардид.

Намоиши асарҳои эҷодии рассомон ва донишҷӯён

Дар Театри мусиқӣ-мазҳакавии вилоятии ба номи А. Муҳаммадҷонови шаҳри Бохтар маросими кушодашаваии намоиши асарҳои эҷодии рассомон ва донишҷӯён баргузор гардид.

Намоиши мазкур ба Соли рушди сайёҳӣ ва ҳунарҳои мардумӣ бахшида шуда, аз ҷониби Вазорати фарҳанги Ҷумҳурии Тоҷикистон, Иттифоқи рассомони Тоҷикистон ва Коллеҷи ҷумҳуриявии рассомии ба номи М. Олимов ташкил гардидааст.

Дар намоиш асарҳои эҷодии устодон ва донишҷӯёни Коллеҷи ҷумҳуриявии рассомии ба номи М. Олимов, аз ҷумла асарҳои санъати тасвирӣ, заргарӣ, наққошӣ, кандакорӣ, ҳайкалтарошӣ, кундал ва дигар ҳунарҳои мардумӣ ба маърази тамошо гузошта мешаванд. Ба меҳмонони чорабинӣ инчунин намоиши муд – тарҳи нави либосҳо пешниҳод карда мешавад.

Дари намоиши мазкур ба ҳаводорони санъат ва ҳунар то 20 апрели соли ҷорӣ боз аст.