23 апрел Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Италия муҳтарам Серҷо Маттарелла мулоқот карданд.
Маросими истиқболи расмии Президенти Ҷумҳурии Тоҷикистон муҳтарам Эмомалӣ Раҳмон дар назди Қасри Президенти Италия “Квиринал” баргузор шуд.
Меҳмони олимақом – Пешвои миллат муҳтарам Эмомалӣ Раҳмонро дар саҳни Қасри “Квиринал” Президенти Ҷумҳурии Италия самимона истиқбол гирифт.
Президенти Ҷумҳурии Тоҷикистон ва Президенти Ҷумҳурии Италия дар болои қолин қарор гирифтанд ва сурудҳои миллии ду кишвар садо дод.
Дар ин маврид дар болои боми Қасри “Квиринал” парчами давлатии Ҷумҳурии Тоҷикистон бардошта шуд.
Пас аз анҷоми сурудҳои миллии ду кишвар Фармондеҳи Қаровули фахрӣ ба меҳмони олиқадр гузориш дод.
Зимни ҳаракати роҳбарони ду давлат аз назди қаровули фахрӣ Президенти Ҷумҳурии Тоҷикистон, дар назди парчами Ҷумҳурии Италия таваққуф карда, арзи эҳтиром намуданд.
Маросими истиқболи расмӣ бо шиносии сарони давлатҳо бо ҳайатҳои расмии ду ҷониб поён ёфт.
Баррасии масоили ҳамкории Тоҷикистону Италия дар Қасри “Квиринал” дар мулоқоти хосаи сарони давлатҳо оғоз гардида, бо иштироки ҳайатҳои ҳарду ҷониб идома ёфт.
Президенти Ҷумҳурии Тоҷикистон муҳтарам Эмомалӣ Раҳмон ба Президенти Ҷумҳурии Италия барои даъват ҷиҳати анҷом додани сафари расмӣ ва пазироии гарму самимӣ изҳори сипос намуданд.
“Мо Ҷумҳурии Италияро шарики муҳим ва боэътимоди худ дар Аврупо медонем”, – таъкид доштанд Сарвари давлати Тоҷикистон муҳтарам Эмомалӣ Раҳмон дар оғози суҳбат.
Ҷонибҳо зимни музокирот маҷмӯи масоили ҳамкории байни ду давлат ва густариши робитаҳо дар соҳаҳои сиёсӣ, иқтисодию тиҷоратӣ, инчунин имконоти татбиқи лоиҳаҳои муштараки сармоягузориро баррасӣ карданд.
Баҳрабардорӣ аз таҷрибаи ғании Италия, бахусус дар соҳаҳои гидроэнергетика, саноати сабук, хӯрокворӣ, дорусозӣ, истихроҷи маъдан, истифодаи захираҳои табиӣ ва кишоварзӣ аз самтҳои афзалиятноку барои ҷонибҳо судовар номида шуд.
Таъкид гардид, ки таъсиси Шӯрои муштараки тиҷоратӣ барои густариши ҳамкории ҷонибҳо дар бахши хусусӣ иқдоми саривақтӣ хоҳад буд.
Дар рафти мулоқот масоили дарёфти роҳҳои нави ҳамкорӣ дар самти рафтуомади шаҳрвандон ва таъсиси хатсайри мустақими ҳавоӣ байни ду давлат баррасӣ гардид.
Дар ин ҷода роҳбарони 2 давлат Созишнома дар бораи лағви раводид барои дорандагони шиносномаҳои дипломатиро, ки дар доираи сафар ба имзо мерасад, иқдоми муҳим арзёбӣ намуданд.
Ҷонибҳо оид ба рушди бахши сайёҳӣ ва инфрасохтори он, робитаҳои фарҳангию гуманитарӣ ва ҷалби ҷавонон ба таҳсил дар муассисаҳои олии Италия табодули афкор намуданд.
Зикр карда шуд, ки парлумонҳои ду кишвар дар чаҳорчӯби Парлумони Аврупо ҳамкории судманд доранд ва барои ҷоннок кардани он таъсиси гурӯҳи дуҷонибаи дӯстии парлумонии Тоҷикистону Италия амри зарурӣ аст.
Дар рафти вохӯрӣ масоили ҳамкории кишварҳо дар доираи ташкилоту созмонҳои бонуфузи олам, аз қабили СММ, САҲА ва дигар сохторҳои байналмилалӣ муҳокима гардид.
Дар рафти мулоқот ташаббусҳои глобалии Тоҷикистон дар ҳалли масоили обу иқлим, ҳифзу таҳкими амнияти минтақавӣ ва байналмилалӣ таъкид гардид.
Зимни баррасии масоили амниятӣ ҷонибҳо оид ба роҳҳои муборизаи босамар бар зидди терроризм, ифротгароӣ ва ҷиноятҳои муташаккили фаромиллӣ, аз ҷумла қочоқи маводи мухаддир ва ҷиноятҳои киберӣ андешаронӣ карданд.
Дар фароварди мулоқот Президенти Ҷумҳурии Тоҷикистон аз Президенти Ҷумҳурии Италия даъват ба амал оварданд, ки бо сафари расмӣ ба Тоҷикистон ташриф оранд.