Вобаста ба Пешниҳоди Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз 6.06.2025, №11-1939 “Дар бораи бартараф кардани сабаб ва шароитҳое, ки ба содир шудани ҳуқуқвайронкунии маъмурӣ мусоидат намудаанд” ва ҷараёни татбиқи Стратегияи муқовимат бо коррупсия дар Ҷумҳурии Тоҷикистон барои солҳои 2021-2030, дар МДТВ “Сафина” мулоқоти сарнозири Раёсати муқовимат бо коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон подполковники адлия Розиқзода Алихони Абдулҳаким баргузор гардид.
Масъули Агентӣ дар ҷараёни мулоқот зикр намуд, ки Ҳукумати Ҷумҳурии Тоҷикистон ҷиҳати дар амал татбиқ намудани ҳадафҳои олии худ дар самти фароҳам овардани шароити арзандаи зиндагӣ тамоми чораҳоро амалӣ месозад. Аз ҷумла ба вуҷуд омадани муносибатҳои истеҳсолӣ ва таъмин гардидани рушди ҳамаи соҳаҳои ҳаёти ҷамъиятӣ зарурати таъсис додани як мақоми ваколатдори махсус оид ба пешгирии ҷиноятҳои марбут бо коррупсияро ба миён овард. Ҳамин тариқ 10 январи соли 2007 Агентии назорати давлатии молиявӣ ва мубориза бо коррупсия таъсис дода шуд, ки минбаъд фаъолияти бонизоми ин Агентӣ дар татбиқи ҳадафҳои иқтисодию иҷтимоии давлат мусоидати фаъол менамояд.
Розиқзода ҳамчунин доир ба санадҳои меъёриву ҳуқуқӣ, аз ҷумла 4 стратегияи мубориза бо коррупсия, ки аз соли 2008 то соли 2030-ро дар бар мегирад, маълумот дод. Гуфта шуд, ки дар доираи татбиқи самараноки ин стратегияҳо дигар санадҳои меъёриву ҳуқуқии амалкунанда, дар давоми ин солҳо волоияти қонун татбиқ карда мешавад.
Номбурда ҳамчунин афзуд, ки мубориза бо коррупсия ва дигар ҷиноятҳои марбут ба он на танҳо кори мақомоти назоратӣ, балки вазифаи шаҳрвандии ҳар як сокини мамлакат мебошад. Вобаста ба ин, аз кормандони МДТВ “Сафина” низ даъват ба амал оварда шуд, ки дар баробари аз ҷониби худи онҳо риоя шудани талаботи қонунгузорӣ, ҳамчунин бо таҳияи барномаву гузоришҳои ҷолиб дар мубориза бо ин зуҳуроти номатлуб саҳми муносиб гузоранд.