Баррасии маҷмуи васеи масоили вобаста ба таҳкиму густариши робитаҳои дӯстӣ ва ҳамкории Тоҷикистону Эрон дар мулоқоти хоссаи сарони ду давлат – муҳтарам Эмомалӣ Раҳмон ва муҳтарам Масъуд Пизишкиён оғоз ёфта, дар музокироти расмӣ бо иштироки ҳайатҳои ду ҷониб дар Қасри Миллат идома ёфт.

Сарвари давлати Тоҷикистон муҳтарам Эмомалӣ Раҳмон меҳмони воломақомро самимона хайра мақдам гуфта, зикр намуданд, ки “мардумони Тоҷикистону Эронро муштаракоти безаволи таърихиву фарҳангӣ ва тамаддунӣ ба ҳам мепайванданд”.

Таъкид гардид, ки “нақши муассири ин муштаракот дар таҳкими фазои ҳусни тафоҳум, эътимод ва эҳтироми ҳамдигарӣ миёни ду кишвари ба ҳам дӯсту ҳамкеш ва бародари мо сол ба сол бештар эҳсос мегардад”.

Аз сатҳу муҳтавои имрӯзаи муносибатҳои гуногунҷанбаи Тоҷикистону Эрон изҳори қаноатмандӣ карда шуд.

Зимни музокирот маҷмӯи васеи масоили вобаста ба тавсеаи ҳамкорӣ дар бахшҳои сиёсат, иқтисоду тиҷорат, сармоягузорию гардишгарӣ, амният, илму фарҳанг, тандурустӣ ва дигар ҷанбаҳои мавриди таваҷҷуҳи ду ҷониб гуфтугӯи судбахш сурат гирифт.

Густариши ҳамкорӣ дар бахшҳои гуногуни саноат, аз ҷумла коркарди маъдан, истеҳсоли масолењи сохтмон, хӯрокворӣ, доруворӣ, соҳаҳои энергетика, кишоварзӣ ва истифодаи васеъ аз минтақаҳои озоди иқтисодии Тоҷикистон, ҳамчунин, аз зарфиятҳои нақлиётиву транзитии Эрон, бахусус бандарҳои Чобаҳор ва Бандар-Аббос ба нафъи ҳарду ҷониб номида шуд.

Зикр гардид, ки ҳоло дар Тоҷикистон  160 ширкат бо сармояи эронӣ фаъолият дорад ва соли 2024 ҳаҷми интиқоли молу коло нисбат ба ду соли пеш 3,2  баробар афзоиш ёфт.

Фаъолгардонии бештари Комиссияи байниҳукуматӣ оид ба ҳамкории тиҷоратӣ, иқтисодӣ, техникӣ ва фарҳангӣ, кори мунтазами Шўро ва Кумитаи муштараки соҳибкориву сармоягузорӣ, татбиқи ҳамаҷонибаи Барномаи ҳамкории иқтисодиву тиҷоратӣ то соли 2030 ва Нақшаи роҳи он муҳим дониста шуд.

Ба зарурати густариши робитаҳои байнипарлумонӣ ҳам таваҷҷуҳи зиёд зоҳир гардид. Тавсеаи минбаъдаи равобити байнипарлумонӣ ангезаи муҳимми қаробату наздикии бештари ду ҷониб арзёбӣ карда шуд.

 Ду ҷониб таҳкиму тавсеаи робитаҳои илмиву фарҳангиро муҳим дониста,  алоқамандии худро ба роҳандозии иқдомҳои муштарак ҷиҳати ҳифзи арзишҳо ва мероси муштараки таърихиву фарҳангӣ ва тамаддунӣ иброз доштанд.

Табодули андешаҳо, ҳамчунин, атрофи мавзӯъҳои гуногуни ҳамкорӣ доир ба масоили минтақавию ҷаҳонии мавриди таваҷҷуҳи ду кишвари дӯст ҷараён гирифт. Дар ин робита зарурати ҳамкории ҳамоҳанг дар минтақа ва ҷаҳон дар мубориза бо зуҳуроти номатлуби терроризму ифротгароӣ, қочоқи маводи мухаддир, ҷиноятҳои муташаккили фаромиллӣ ва киберӣ таъкид карда шуд.

19 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар идомаи сафари корӣ дар ноҳияи Данғара дар деҳаи Булёни болои деҳоти ба номи Исмат Шарифов бо бардоштани парда аз рӯи лавҳаи рамзӣ бинои Муассисаи таҳсилоти миёнаи умумии рақами 15-ро мавриди баҳрабардорӣ қарор доданд.

Иншооти соҳаи маориф дар асоси дастуру ҳидоятҳои Ҳукумати кишвар дар доираи корҳои ободонӣ ба истиқболи шоиста аз 35-умин солгарди Истиқлоли давлатӣ аз ҷониби гурӯҳи соҳибкорон бо тарҳи муосир бунёд карда шудааст.

Муассиса дорои 36 синфхонаи муҷаҳҳаз бо аёниятҳои хониш, китобхона, толори баргузории чорабиниҳои фарҳангӣ бо 198 ҷойи нишаст, ошхона, толори варзиш ва дигар иншооти ёрирасон буда, барои 2160 нафар хонанда дар ду баст пешбинӣ гардидааст.

Бо бунёд ва мавриди истифода қарор гирифтани бинои муосири мактаби №15 барои дар шароити замонавӣ ба таҳсил фаро гирифтани хонандагони деҳаи Булёни болои деҳоти ба номи Исмат Шарифови ноҳияи Данғара заминаи мусоид фароҳам омадааст.

Ба таъкиди Сарвари давлат муҳтарам Эмомалӣ Раҳмон имрӯз бе илму навоварӣ, технологияҳои иттилоотиву коммуникатсионӣ ва ташаккули ҷаҳонбинии техникӣ қадаме ба пеш гузошта намешавад.

Синфхонаҳои химия, биология, физика, география, математика ва асосҳои кор бо компютер дар ин таълимгоҳ бо муҳимтарин технология ва дигар воситаҳои муосир муҷаҳҳаз карда шудааст, ки ин тадбир барои ҷалби насли наврас ба илмҳои дақиқ нақши муассир мегузорад.

Таъсис ва ҷиҳозонидани синфхонаҳои таълими меҳнат бо муҳимтарин дастгоҳу таҷҳизоти зарурӣ имкон медиҳад, ки хонандагон дар баробари омӯзиши илмҳои замони муосир, ҳамчунин аз нозукиҳои ҳунарҳои мутобиқ ба талаботи бозори меҳнат бархӯрдор гарданд.

Дар ин синфхонаҳо ҳайати омӯзгорони соҳибтахассус бо истифода аз шароиту имконоти фароҳамшуда коркарди чӯбу оҳан ва дигар ҳунарҳо, аз ҷумла нақшу нигор ва гулдӯзиро ба шогирдон омӯзиш медиҳанд.

Сарвари давлат муҳтарам Эмомалӣ Раҳмон баъди шиносоӣ бо шароити хуби таълиму тадрис дар иншооти нави соҳаи маориф ба иқдоми соҳибкорони ватанӣ дар самти бунёди ин иншоот баҳои баланд дода, чунин ташаббусҳоро дар самти таҳкиму тақвияти заминаи моддӣ – техникии маорифи навини миллӣ муассир арзёбӣ карданд.

Ёдовар мешавем, ки дар заминаи таваҷҷуҳ ва ғамхориҳои доимии Пешвои миллат муҳтарам Эмомалӣ Раҳмон ба соҳаи илму маориф давоми бештар аз се даҳсолаи охир дар марказ ва ҷамоату деҳоти ноҳияи Данғара 77 муассисаи таълимӣ, аз ҷумла 11 иншооот бо саҳму иқдоми соҳибкорону шахсони ватандӯст бунёду мавриди истифода қарор гирифтааст.

Тибқи маълумот имрӯз дар 88 муассисаи таълимии ноҳияи Данғара наздики 52 ҳазор хонанда дар шароити муосир ба таҳсил фаро гирифта шудааст.

Театри «Афсона» -и ш. Бохтар.

Содирхони Ҳофиз.