31 март мулоқоти дуҷонибаи Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон Садир Жапаров, ки бо сафари корӣ ба шаҳри Хуҷанд ташриф оварданд, баргузор гардид.

Сарвари давлати мо меҳмони воломақомро хайрамақдам гуфта, ӯро бо ҷашни байналмилалии Наврӯз табрик намуданд ва таъкид доштанд, ки вохӯриҳои имрӯза бо назардошти масъалаҳои баррасишаванда аҳамияти хосса доранд.

Ҳарду роҳбар ҳамфикр буданд, ки имзои Протокол дар бораи табодули тасдиқномаҳои Шартнома дар бораи сарҳади давлатӣ ва ифтитоҳи хатти интиқоли барқи 500-киловолтаи «Датка-Хуҷанд»-и лоиҳаи КАСА-1000 байни Тоҷикистон ва Қирғизистон рӯйдодҳои таърихӣ мебошанд.

Зимни музокирот сарони ду давлат вазъ ва дурнамои муносибатҳои дуҷонибаи Тоҷикистону Қирғизистонро ҳамаҷониба баррасӣ карда, оид ба доираи васеи масъалаҳои марбут ба рушд ва таҳкими муносибатҳои накуҳамсоягии ду кишвар табодули афкор намуданд.

Сарони давлатҳо таҳкими муколамаи сиёсии дуҷониба дар ҳама сатҳҳо ва такон бахшидан ба рушди ҳамкории тиҷоратию иқтисодиро бо таваҷҷуҳ ба афзун намудани ҳаҷми гардиши мол мутобиқ ба иқтидори мавҷудаи ду кишвар ба мақсад мувофиқ донистанд. Дар робита ба ин, аҳамияти андешидани тадбирҳои муштарак оид ба рушди инфрасохтори наздисарҳадӣ, аз ҷумла марказҳои нақлиётӣ ва ифтитоҳи гузаргоҳҳои нави сарҳадӣ бо мақсади тавсеаи имконоти пешбурди муносибатҳои тиҷоратию иқтисодӣ таъкид гардид. Бартараф намудани монеаҳои мавҷуда ва сода гардонидани расмиёти убури сарҳад, рушди ҳамкорӣ дар соҳаҳои сармоягузорӣ, обу энергетика ва кишоварзӣ, инчунин дар бахши кооператсияи саноатӣ муҳим дониста шуд.

Дар ин замина, ба фаъол кардани кори сохторҳои  байниҳукуматӣ оид ба баррасии тамоми маҷмуи муносибатҳои дуҷониба таваҷҷуҳ зоҳир карда шуда, масъалаи дар ояндаи наздик баргузор намудани ҷаласаи нахустини Шурои байниҳукуматӣ дар сатҳи Сарвазирон мавриди баррасӣ қарор гирифт. Қобили зикр аст, ки қарор дар бораи таъсиси ин Шуро зимни мулоқоту музокироти сатҳи баланд дар Бишкек дар доираи сафари давлатии Пешвои миллат муҳтарам Эмомалӣ Раҳмон ба Қирғизистон қабул карда шуд.

Ҷонибҳо, ҳамчунин, ба таҳкими равобити фарҳангиву гуманитарӣ, бахусус дар соҳаҳои илму маориф, фарҳанг, сайёҳӣ ва варзиш таваҷҷуҳ зоҳир намуданд.

Ҳамчунин, оид ба идомаи ҳамоҳангсозии мавқеъҳои ду кишвар дар доираи созмонҳои байналмилалӣ ва минтақавӣ табодули афкор сурат гирифт.

Музокирот дар фазои ҳамдигарфаҳмӣ ва дар руҳияи созанда баргузор шуд.

Анонс. Шоми чоршанбе.

Анонс. Шоми ҷумъа дар ТВС.

9 ноябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ноҳияи Абдураҳмони Ҷомӣ бо роҳбарон ва фаъолони вилояти Хатлон мулоқот намуданд.

Сарвари давлат муҳтарам Эмомалӣ Раҳмон сафари корӣ дар шаҳру ноҳияҳои Ёвон, Левакант, Бохтар, Ҷалолиддини Балхӣ, Кӯшониён ва Абдураҳмони Ҷомиро натиҷагирӣ намуда, барои татбиқи ҳадафҳои стратегии Ҳукумати Ҷумҳурии Тоҷикистон ва иҷрои дастуру супоришҳо баҳри истиқболи арзандаи 35-солагии Истиқлоли давлатии Ҷумҳурии Тоҷикистон дар назди роҳбарияти вилояти Хатлон ва шаҳру ноҳияҳои он вазифаҳои нав гузоштанд.

Таъкид гардид, ки бо мақсади истиқболи сазовори ҷашни 35-солагии Истиқлоли давлатӣ дар вилояти Хатлон бунёду азнавсозии 6 ҳазору 260 иншооти истеҳсоливу иҷтимоӣ ба нақша гирифта шудааст, ки аз ин шумора, аллакай, беш аз 3,5 ҳазор иншоот сохта, мавриди баҳрабардорӣ қарор дода шудааст.

Аз ҷумла, дар ноҳияи Абдураҳмони Ҷомӣ сохтмону барқарорсозии 118 иншооти ҷашнӣ ба анҷом расидааст, ки 58 фоизи нақшаро ташкил медиҳад.

Ба роҳбарияти вилоят ва шаҳру ноҳияҳои он супориш дода шуд, ки корро баҳри сазовор истиқбол гирифтани ҷашни 35-солагии Истиқлоли давлатӣ ва амалисозии ҳадафҳои стратегии рушд, аз ҷумла саноатикунонии босуръат ва таъмини аҳолӣ бо шуғли пурмаҳсул боз ҳам вусъат бахшанд.

Сарвари давлат муҳтарам Эмомалӣ Раҳмон баҳри иҷрои барномаҳои рушди иқтисодиву иҷтимоии вилояти Хатлон ва шаҳру ноҳияҳои он барои солҳои 2021 – 2025 роҳбарияти вилоят ва шаҳру ноҳияҳои онро вазифадор намуданд, ки камбудиву норасоиҳои мавҷударо бартараф карда, якҷо бо вазорату идораҳои дахлдор, инчунин, дар ҳамкорӣ бо сармоягузорони ватаниву хориҷӣ иҷрои пурра ва саривақтии онҳоро таъмин намоянд.

Тавре таъкид гардид, дар вилояти Хатлон дар даврони соҳибистиқлолӣ 83 лоиҳаи сармоягузории давлатӣ ба маблағи 12 миллиард сомонӣ амалӣ гардида, ҳоло корҳо дар доираи боз 46 лоиҳа бо арзиши умумии 12,8 миллиард сомонӣ идома доранд.

Лоиҳаҳои зикршуда ба ҳалли масъалаҳои рушди иқтисодиву иҷтимоии вилоят, аз ҷумла дар соҳаҳои маорифу тандурустӣ, саноату энергетика, кишоварзӣ, хоҷагии манзилию коммуналӣ, нақлиёт, сайёҳӣ ва пешгирии ҳодисаҳои фавқулода равона карда шудааст.

Пешвои миллат муҳтарам Эмомалӣ Раҳмон таъкид намуданд, ки дар нӯҳ моҳи соли ҷорӣ барои амалӣ намудани ҳадафу нақшаҳои созанда ба вилоят аз ҳисоби ҳамаи манбаъҳои буҷети давлатӣ беш аз 3,4 миллиард сомонӣ сарф карда шудааст.

Роҳбарони мақомоти иҷроияи ҳокимияти давлатии вилояти Хатлон ва шаҳру ноҳияҳои он аз Сарвари давлат супориш гирифтанд, ки фаъолияти худро дар самти ҷалби сармояи мустақими ватаниву хориҷӣ вусъат бахшанд.

Гуфта шуд, ки дар 9 моҳи соли 2024 дар вилояти Хатлон иҷрои нақшаи ҷамъоварии андозу пардохтҳо 102,4 фоиз таъмин шудааст. То ҳол бақияи қарзи андоз дар вилоят зиёд буда, ба ҳолати 1-уми октябри соли ҷорӣ 171 миллион сомониро ташкил медиҳад.

Бинобар ин, ба роҳбарони вилояти Хатлон ва шаҳру ноҳияҳои он супориш дода шуд, ки якҷо бо Вазорати молия ва Кумитаи андоз барои сари вақт ва пурра ҷамъоварӣ намудани андозҳо, кам кардани бақияпулиҳо ва роҳ надодан ба афзоиши онҳо тадбирҳои қатъӣ андешанд.

Зимни таҳлили вазъи соҳаи саноат Сарвари давлат муҳтарам Эмомалӣ Раҳмон иброз доштанд, ки имконияту иқтидорҳои вилоят барои тараққӣ додани он, махсусан, саноати коркард ниҳоят зиёданд.

Барои пурра ва самаранок истифода намудани имкониятҳои мавҷуда Президенти кишвар ташаббускориву навоварии роҳбарону масъулони вилоят, шаҳру ноҳияҳои он, вазорату идораҳои соҳавӣ ва ҳамкории судманди онҳоро бо бахши хусусӣ зарур шумурданд.

Пешвои миллат дар робита ба рушди соҳаи энергетика таваҷҷуҳи масъулини соҳаро ба масъалаҳои омодагии ҳамаҷонибаи хатҳои интиқоли барқ ва истгоҳҳои барқӣ барои фаъолият дар давраи тирамоҳу зимистон ҷалб намуданд.

Вазорати энергетика ва захираҳои об, ширкатҳои соҳа ва мақомоти иҷроияи ҳокимияти давлатии вилоят ва шаҳру ноҳияҳои он вазифадор шуданд, ки камбудиву норасоиҳои дар соҳа ҷойдоштаро сари вақт бартараф созанд.

Таъкид гардид, ки дар моҳҳои январ-сентябри соли 2024 кишоварзони вилоят ба маблағи беш аз 28 миллиард сомонӣ маҳсулот истеҳсол кардаанд, ки нисбат ба ҳамин давраи соли гузашта 11,5 фоиз зиёд мебошад.

Роҳбарони шаҳру ноҳияҳои вилояти Хатлон вазифадор карда шуданд, ки барои сари вақт ва беталаф ҷамъоварӣ намудани ҳосили пахта чораҳои таъхирнопазир андешида, бо назардошти имкониятҳои мавҷуда ба хотири ҳифзи амнияти озуқаворӣ, дар ҳамаи фаслҳои сол бо маҳсулоти озуқаворӣ таъмин намудани бозори истеъмолӣ ва зиёд кардани содироти маҳсулот беш аз ҳарвақта кӯшиш намоянд.

Зикр карда шуд, ки вилояти Хатлон дорои иқтидори бузурги содироти меваю сабзавот, бахусус, меваю сабзавоти барвақтӣ мебошад.

Ба роҳбарияти вилоят ва шаҳру ноҳияҳои он супориш дода шуд, ки доир ба истифодаи самараноки заминҳои корам, таъмин намудани афзоиши истеҳсоли маҳсулоти кишоварзӣ, баланд бардоштани ҳосилнокӣ, инчунин, бунёди инфрасохтори нигоҳдорӣ, коркард, бастубанд ва содироти маҳсулот мунтазам чораҷӯйӣ намоянд.

Президенти кишвар муҳтарам Эмомалӣ Раҳмон оид ба дастгирии давлатии соҳаҳои иҷтимоии вилоят андешаронӣ намуда, ба роҳбарияти вилоят, шаҳру ноҳияҳои он ва вазоратҳои дахлдор дастур доданд, ки барои ислоҳи саривақтии камбудиҳои мавҷуда дар бахшҳои маорифу тандурустӣ тадбирҳои мушаххас андешанд.

Пешвои миллат ҳамчунин, падару модарон, устодону омӯзгорон, аҳли зиё ва фаъолонро ваифадор намуданд, ки ба тарбияи наврасону ҷавонон, яъне насли ояндасоз диққати ҷиддӣ диҳанд ва ба онҳо барои омӯхтани илму дониш ва касбу ҳунар шароити беҳтарин муҳайё созанд.

Дар фароварди сухан Президенти кишвар муҳтарам Эмомалӣ Раҳмон изҳори умед намуданд, ки мардуми ватандӯст, бонангу номус ва матиниродаи вилояти Хатлон бо заҳмати содиқонаву софдилонаи худ Ватани маҳбубамонро боз ҳам ободу пешрафта мегардонанд.

Баъди суханронии Президенти Ҷумҳурии Тоҷикистон муҳтарам Эмомалӣ Раҳмон оид ба натиҷаҳои рушди иҷтимоию иқтисодии вилоят дар нуҳ моҳи соли 2024 раиси вилояти Хатлон Давлаталӣ Саид ва роҳбарони як қатор шаҳру ноҳияҳои вилоят ба Сарвари давлат ҳисобот доданд.

12 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар доираи сафари корӣ дар Вилояти Мухтори Кӯҳистони Бадахшон дар ноҳияи Роштқалъа бо роҳбарон ва фаъолони ноҳия мулоқоти самимӣ доир намуданд.

Сарвари давлат муҳтарам Эмомалӣ Раҳмон аз заҳмати содиқонаи мардуми ноҳияи Роштқалъа баҳри пешрафти Тоҷикистони азиз ва саҳмгузорӣ дар шукуфоии сарзамини аҷдодӣ изҳори қаноатмандӣ карданд.

Таъкид гардид, ки аз ҷониби Ҳукумати кишвар барои таъмин намудани рушди иҷтимоиву иқтисодии ноҳияи Роштқалъа ва баланд бардоштани сатҳу сифати зиндагии сокинони он дар муддати 33 соли соҳибистиқлолӣ беш аз 1,5 миллиард сомонӣ равона карда шудааст. Ғайр аз ин, то имрӯз дар ҳудуди ноҳия 10 лоиҳаи сармоягузории давлатӣ ба маблағи 62 миллион сомонӣ амалӣ гардидааст.

Президенти кишвар таъкид намуданд, ки ҳамаи талошҳои Ҳукумат дар доираи лоиҳаҳои амалигардида ба самти сохтмону муҷаҳҳазгардонии мактабҳо, дастрас гардонидану баланд бардоштани сифати хизматрасониҳои тиббӣ, нигоҳдории роҳҳо, бо барқ таъмин намудани деҳаҳо, дастгирии гурӯҳҳои осебпазири аҳолӣ ва хоҷагиҳои кишоварзӣ, инчунин, пешгирӣ кардани офатҳои табиӣ равона шудааст.

Аз ҷумла, зикр карда шуд, ки Барномаи рушди иҷтимоиву иқтисодии ноҳияи Роштқалъа барои солҳои 2021-2025 бо мақсади ҳалли мушкилоту масъалаҳои иҷтимоӣ ва баланд бардоштани сатҳи некуаҳволии сокинон амалӣ гардида истодааст.

Сарвари давлат дар робита ва вазъи мураккаби сиёсӣ ва иқтисодӣ дар ҷаҳон таваҷҷуҳи иштирокдорони мулоқотро ба истифодаи самараноку оқилонаи имкониятҳои мавҷуда, аз ҷумла обу замин ҷалб намуданд.

Зарур шумурда шуд, ки роҳбарону мутахассисон, хоҷагиҳои деҳқонӣ ва тамоми сокинони ноҳия раванди афзоиши ҳаҷми истеҳсоли маҳсулотро минбаъд низ идома дода, аз шароити беҳтарине, ки дар ноҳия вуҷуд дорад, аз ҷумла обу замин самараноку оқилона истифода баранд.

Зимни таҳлили вазъи соҳаҳои маориф ва тандурустӣ дар ноҳия роҳбарияти вилоят ва масъулини ин бахшҳо барои ислоҳи камбудиҳо аз Сарвари давлат супоришҳои мушаххас гирифтанд.

Ба ифтихори ҷашни 35-солагии Истиқлоли давлатӣ дар ноҳияи Роштқалъа бунёду таҷдиди 206 иншооти гуногун ба маблағи умумии қариб як миллиард сомонӣ ба нақша гирифта шудааст.

Президенти кишвар муҳтарам Эмомалӣ Раҳмон бо итминон иброз доштанд, ки роҳбарият, соҳибкорон ва аҳолии ватандӯсти ноҳия якҷо бо вазорату идораҳои дахлдор дар муҳлатҳои муайянгардида ва бо сифати баланд ба истифода додани иншооти боқимондаро таъмин месозанд.

Дар интиҳои суханронӣ Пешвои миллат барои татбиқи ҳадафу нақшаҳои неку созанда ба сокинони ватандӯсту сарбаланди ноҳияи Роштқалъа барори кору сарфарозӣ орзу намуданд.

23 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Ню-Йорк бо Дабири кулли Созмони Милали Муттаҳид Антониу Гутерриш мулоқот намуданд.

Дар мулоқот рушди ҳамкории Тоҷикистон бо Созмони Милали Муттаҳид ва ниҳодҳои он мавриди баррасӣ қарор дода шуд.

Президенти кишвар муҳтарам Эмомалӣ Раҳмон иброз доштанд, ки мо нақши созмонро дар татбиқи барномаҳои муҳимми сиёсиву амниятӣ ва иқтисодиву иҷтимоии кишварамон қадр мекунем.

Ҷонибҳо вазъи мураккаб ва зудтағйирёбандаи ҷаҳон, паёмадҳои буҳронҳои иқтисодиву молиявӣ, камбизоатӣ ва ноамнии озуқавориро муҳокима намуда, амалҳои дастҷамъонаи ҷомеаи ҷаҳониро дар ин самтҳо зарур шумурданд.

Ба масоили тағйирёбии иқлим, норасоии оби ошомиданӣ, обшавии пиряхҳо, нобудшавии гуногунии биологӣ ва вазъи иҷтимоиву иқтисодӣ, расидан ба Ҳадафҳои рушди устувор, татбиқи Рӯзномаи-2030 ва натиҷаҳои Саммити оянда таваҷҷуҳи зиёд зоҳир гардид.

Масоили омодагӣ ба Конфронси байналмилалии ҳифзи пиряхҳо дар соли 2025 ва Конфронси навбатии Созмони Милали Муттаҳид оид ба масъалаҳои об дар соли 2028, ки ҳарду дар шаҳри Душанбе баргузор хоҳанд шуд, низ аз мавзуъҳои муҳимми суҳбат буд.

Мубодилаи афкор доир ба масъалаҳои мубрами мубориза бо терроризм, ифротгароӣ ва дигар таҳдидҳои амниятӣ ҳам сурат гирифт.

16 июл Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Исмоили Сомонии пойтахт корхонаи истеҳсоли маҳсулоти нонию қаннодии Ҷамъияти дорои масъулияти маҳдуди “Нонпаз”-ро мавриди истифода қарор доданд.

Иншоот дар заминаи корҳои ободонию созандагӣ ба истиқболи ҷашни бузургу муқаддаси миллӣ – 35-солагии Истиқлоли давлатии Ҷумҳурии Тоҷикистон бо риояи санъати хоси меъмории миллӣ бунёд ёфта, корҳои навсозӣ ва мутобиқгардонӣ ба замони муосир соли 2021 оғоз гардидааст.

Таъкид бояд кард, ки Ҷамъияти дорои масъулияти маҳдуди “Нонпаз” аз солҳои 30-юми қарни гузашта фаъолият дошт ва бо пешрафти замону рушди ҷомеа тамоми дастгоҳу таҷҳизоти он корношоям гардида буд.

Бо дастгирӣ ва ҳидоятҳои созандаи роҳбарияти олии сиёсии кишвар иншоот пурра навсозӣ гардида, дар он тамоми инфрасохтор барои истеҳсоли маҳсулоти нонию қаннодӣ муҳайё гардидааст.

Сарвари давлат муҳтарам Эмомалӣ Раҳмон зимни боздид аз шароити фароҳамгардида ва раванди истеҳсолот ба ташаббускорон ҷиҳати ҳамоҳангӣ дар амалисозии ҳадафҳои созандаи Ҳукумати кишвар изҳори миннатдорӣ карда, иқдоми мазкурро намунаи олии дастгирӣ ёфтани сиёсати давлату Ҳукумат дар самти бунёдкориву созандагӣ арзёбӣ намуданд.

Иттилоъ дода шуд, ки имрӯз дар корхонаи “Нонпаз” беш аз 80 намуди маҳсулоти нонию қаннодӣ, аз ҷумла нон, батон, баггет, кулчаҳои қандин, торт, круассан, шириниҳои варақӣ ва амсоли инҳо истеҳсол карда мешавад, ки бо тамъҳои хоса дар бозори истеъмолӣ харидорони худро пайдо кардааст. Иқтидори истеҳсолӣ дар як шабонарӯз 40 тонна маҳсулоти нонӣ ва 5 тонна маҳсулоти қаннодӣ мебошад.

Тамоми дастгоҳу таҷҳизоти насбшуда истеҳсоли насли нав буда, аз давлатҳои Олмон ва Италия ворид гардидааст, ки аз ҷиҳати самаранокии неруи барқ каммасраф ва бисёрфунксионалӣ мебошанд.

Тавре иттилоъ доданд, бо пурра ба истифода додани корхонаи нонию қаннодии “Нонпаз” теъдоди кормандон аз 200 то ба 400 нафар расонида мешавад, ки дар ин замина иқтидори истеҳсолӣ низ ба маротиб зиёд хоҳад шуд.

Барои ба фурӯш баровардани маҳсулоти ниҳоӣ дар ҳудуди ноҳияҳои пойтахт ташкили 24 нуқтаи фурӯш дар назар дошта шудааст ва барои анҷоми хизматрасонӣ мошинҳои хизматӣ ҷалб хоҳанд шуд.

Мавриди зикр аст, ки намои зоҳирии бино бо усулҳои нави меъморӣ бунёд ва чароғон шудааст. Саҳн ва атрофи корхона сабзкорӣ шуда, ҳамчунин роҳравҳои берунии он ва таваққуфгоҳ, асфалтпӯш гардидааст.

Корхона дар масоҳати 4 ҳазору 800 метри мураббаъ доман густурда, аз ҷониби соҳибкори ҷавон Усмон Мирзоалиев бунёд гардидааст. Иншоот аз сехҳои алоҳидаи истеҳсолӣ иборат буда, ҳуҷраҳои роҳбарият, муҳосибот, фурӯш, маҷлисгоҳ ва ошхона барои 100 нафар дар бинои маъмурии дуошёна ҷойгир карда шудааст.

Сарвари давлат муҳтарам Эмомалӣ Раҳмон зимни суҳбат бо кормандон ва масъулин, ба онҳо ҷиҳати беҳтар кардани сатҳу сифати истеҳсолот ва рақобатпазир намудани он дастуру маслиҳатҳои муфид дода, ба фаъолият пардохтани корхонаро қадами муҳим барои рушди соҳаи саноат дар пойтахт арзёбӣ намуданд.

Дар навбати худ кормандон ва масъулини коргоҳи “Нонпаз” ба Пешвои миллат муҳтарам Эмомалӣ Раҳмон ҷиҳати дастгирии ҳамешагӣ ва фароҳамсозии шароити созгори кору фаъолият изҳори миннатдорӣ намуда, уҳдадор шуданд, ки минбаъд низ дар амалишавии ҳадафҳои созандаи Ҳукумати кишвар дар самти рушди соҳаи саноат саҳми муносиби худро хоҳанд гузошт.

Пас аз анҷоми мулоқоту музокироти сатҳи олии Тоҷикистону Чин дар Қасри миллат маросими имзо ва табодули санадҳои нави ҳамкорӣ баргузор гардид.

Дар ҳузур ва бо иштироки сарони давлатҳо дар маҷмуъ 29 ҳуҷҷати муҳими танзмкунандаи муносибатҳои ду кишвар дар соҳаҳои мухталиф имзо карда шуд.

Нахуст, Сарони давлатҳо муҳтарам Эмомалӣ Раҳмон ва муҳтарам Си Ҷинпин Изҳороти муштараки Ҷумҳурии Тоҷикистон ва Ҷумҳурии Мардумии Чин оид ба таъмиқи минбаъдаи равобити стратегии ҳамаҷониба дар марҳилаи навро имзо карданд.

Сипас, байни аъзои ҳайатҳои расмии ду давлат табодули санадҳои имзошуда сурат гирифт.

Аз ҷумла, Ёддошти тафоҳум оид ба мубодилаи ҳамкорӣ миёни Ҳизби Халқи Демократии Тоҷикистон ва Ҳизби Коммунистии Чин;

Ёддошти тафоҳум оид ба ҳамкорӣ байни Хадамоти иҷрои назди Ҳукумати Ҷумҳурии Тоҷикистон ва Суди Олии Ҷумҳурии Мардумии Чин;

Номаҳои табодулӣ оид ба таҳкими ҳамкорӣ дар соҳаи рушди захираҳои инсонӣ байни Тоҷикистон ва Чин дар самти нерӯи таҷдидшавандаи чаҳорчӯби Ташаббуси ҷаҳонии рушд;

– Созишномаи байниидоравӣ оид ба рушди иқтисодӣ миёни Департаменти робитаҳои байналмилалии Комиссияи миллӣ оид ба рушд ва ислоҳоти Ҷумҳурии Мардумии Чин  ва Вазорати рушди иқтисод ва савдои Ҷумҳурии Тоҷикистон;

Созишнома байни Вазорати саноат ва технологияҳои нави Ҷумҳурии Тоҷикистон ва Вазорати саноат ва технологияҳои иттилоотии Ҷумҳурии Мардумии Чин;

Ёддошти тафоҳум оид ба рушди ҳамкории сармоягузорӣ дар соҳаи энергетикаи нав миёни Вазорати энергетика ва захираҳои оби Ҷумҳурии Тоҷикистон ва Вазорати тиҷорати Ҷумҳурии Мардумии Чин;

Созишнома оид ба ҳавасмандгардонӣ ва ҳифзи мутақобилаи сармоягузорӣ байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин;

Ёддошти тафоҳум оид ба ҳамкорӣ дар самти тиҷорати электронӣ байни Агентии инноватсия ва технологияҳои рақамии назди Президенти Ҷумҳурии Тоҷикистон ва Вазорати тиҷорати Ҷумҳурии Мардумии Чин;

Созишнома байни Вазорати маориф ва илми Ҷумҳурии Тоҷикистон ва Вазорати маорифи Ҷумҳурии Мардумии Чин оид ба эътирофи мутақобила ва баробарарзишии ҳуҷҷатҳои тахассусӣ, дараҷаҳои илмӣ ва унвонҳои илмӣ;

Ёддошти тафоҳум байни Вазорати саноат ва технологияҳои нави Ҷумҳурии Тоҷикистон ва Вазорати савдои Ҷумҳурии Мардумии Чин оид ба маъданҳои нави энергетикӣ;

Ёддошти тафоҳум байни Вазорати рушди иқтисод ва савдои Ҷумҳурии Тоҷикистон ва Агентии давлатии Чин оид ба ҳамкории байналмилалӣ оид ба пешбурди лоиҳаҳои кумакҳои бебозгашт дар соҳаи инфрасохтор;

Номаҳои табодулӣ оид ба гузаронидани тадқиқоти техникӣ – иқтисодӣ роҷеъ ба сохтмони гузаргоҳи бисёрсатҳа дар шаҳри Душанбе;

Ёддошти тафоҳум оид ба ҳамкорӣ байни Вазорати фарҳанги Ҷумҳурии Тоҷикистон ва Медиакорпоратсияи Чин CMG;

Протокол байни Кумитаи бехатарии озуқавории назди Ҳукумати Ҷумҳурии Тоҷикистон ва Саридораи гумруки Ҷумҳурии Мардумии Чин оид ба талаботи фитосанитарӣ доир ба содироти хурмои тару тоза аз Ҷумҳурии Тоҷикистон;

Ёддошти тафоҳуми ҳамкорӣ байни Кумитаи рушди сайёҳии назди Ҳукумати  Ҷумҳурии Тоҷикистон ва Вазорати фарҳанг ва сайёҳии Ҷумҳурии Мардумии Чин дар бораи мусоидат ба сафарҳои гурӯҳии сайёҳони чинӣ ба Ҷумҳурии Тоҷикистон;

Созишномаи ҳамкорӣ байни Агентии инноватсия ва технологияҳои рақамии назди Президенти Ҷумҳурии Тоҷикистон ва Вазорати саноат ва иттилооти Ҷумҳурии Мардумии Чин;

Ёддошти тафоҳуми ҳамкорӣ байни Кумитаи телевизион ва радиои назди Ҳукумати Ҷумҳурии Тоҷикистон ва Сарраёсати давлатии радиошунавонӣ ва телевизиони Ҷумҳурии Мардумии Чин дар соҳаи телевизион ва радиошунавонӣ”;

Ёддошти тафоҳум оид ба ҳамкорӣ байни Донишгоҳи байналмилалии забонҳои хориҷии Тоҷикистон ба номи Сотим Улуғзода ва Вазорати маорифи Ҷумҳурии Мардумии Чин;

Ёддошти тафоҳум байни Академияи миллии илмҳои Тоҷикистон ва Идораи миллии матбуот ва интишороти Чин оид ба тарҷума ва нашри осори классикон;

Ёддошти тафоҳум оид ба ҳамкории Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон ва Маъмурияти миллии бехатарии корҳо дар соҳаи кӯҳкории назди Вазорати эътино оид ба ҳолатҳои фавқулодаи Ҷумҳурии Мардумии Чин;

Ёддошти тафоҳум оид ба тақвияти ҳамкорӣ бо мақсади рушд ва мусоидат ба амалишавии Ташаббуси рушди ҷаҳонӣ миёни Вазорати рушди иқтисод ва савдои Ҷумҳурии Тоҷикистон ва Агентии давлатии рушди ҳамкорӣ байналмилалии Чин;

Ёддошти тафоҳум дар самти карантини воридот ва содироти ҳайвонҳо ва гиёҳҳо байни Кумитаи бехатарии озуқавории назди Ҳукумати Ҷумҳурии Тоҷикистон ва Сарраёсати гумруки Ҷумҳурии Мардумии Чин;

Ёддошти тафоҳум байни Академияи миллии илмҳои Тоҷикистон ва Академияи илмҳои кишоварзии Синзяни Ҷумҳурии Мардумии Чин;

Ёддошти тафоҳум дар бораи ҳамкории мутақобилаи Агентии миллии иттилоотии Тоҷикистон “Ховар”-и Тоҷикистон ва рӯзномаи “Жэнмин Жибао”-и Чин;

Ёддошти тафоҳуми ҳамкорӣ байни Агентии миллии иттилоотии Тоҷикистон “Ховар” ва Медиакорпоратсияи Чин CMG;

Ёддошти тафоҳум оид ба ҳамкорӣ байни Муассисаи давлатии “Телевизиони Сафина” ва Медиакорпоратсияи Чин CMG;

Ёддошти тафоҳум оид ба ҳамкорӣ байни Муассисаи далватии “Ҷаҳоннамо” ва Медиакорпоратсияи Чин CMG.

Пас аз анҷоми маросими имзои санадҳо муҳтарам Эмомалӣ Раҳмон ва муҳтарам Си Ҷинпин нишасти матбуотӣ ороста, натиҷаҳои мулоқоту музокироти Тоҷикистону Чинро неку самарабахш арзёбӣ намуданд.

3 июл дар шаҳри Остона Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи ҷаласаи Шӯрои сарони давлатҳои аъзои Созмони Ҳамкории Шанхай бо Президенти Ҷумҳурии Қазоқистон муҳтарам Қосим-Жомарт Токаев мулоқот намуданд.

Дар вохӯрӣ ҷанбаҳои мухталифи ҳамкориҳои дуҷонибаи Тоҷикистону Қазоқистон, масъалаҳои рӯзномаи ҷаласаи навбатии Созмони Ҳамкории Шанхай ва мавзуоти алоҳидаи минтақавию байналмилалӣ баррасӣ шуданд.

Президенти Ҷумҳурии Тоҷикистон муҳтарам Эмомалӣ Раҳмон аз пазироии самимӣ ва имкони дидору мулоқот изҳори сипос намуданд.

Дар вохӯрӣ масоили рушду инкишофи муносибатҳои ҳамкорӣ дар бахшҳои тиҷоративу иқтисодӣ, кишоварзӣ, энергетика, нақлиёти ҳавоӣ ва амният муҳокима гардид.

Ҷонибҳо омодагии худро ҷиҳати идомаи фаъолияти ҳамоҳанг дар масъалаҳои байналмилалӣ ва минтақавӣ иброз доштанд.

Баргузории ҷаласаи навбатии Комиссияи байниҳукуматӣ оид ба ҳамкориҳои тиҷоративу иқтисодӣ дар шаҳри Душанбе аз масъалаҳои дигари мулоқот буд.

Дар рафти суҳбат ҷараёни кор дар соҳаи рақамикунонӣ ва масъалаи ҷудо кардани бурсияҳо барои тайёр намудани мутахассисони тоҷик дар соҳаи технологияи иттилоотӣ баррасӣ гардид.

Ҷонибҳо, инчунин, оид ба дигар масъалаҳои мавриди таваҷҷуҳ гуфтугӯйи судманд анҷом доданд.

Пас аз анҷоми мулоқоту музокироти сатҳи олии Тоҷикистону Русия дар ҳузури Сарони давлатҳо муҳтарам Эмомалӣ Раҳмон ва муҳтарам Владимир Путин бастаи нави санадҳои ҳамкорӣ ба имзо расид:

– Нақшаи ҳамкорӣ дар соҳаи саноат байни Вазорати саноат ва технологияҳои нави Ҷумҳурии Тоҷикистон ва Вазорати саноат ва савдои Федератсияи Русия;

– Ёддошти тафоҳум байни Вазорати нақлиёти Ҷумҳурии Тоҷикистон ва Вазорати нақлиёти Федератсияи Русия дар бораи рушди ҳамкорӣ дар тайёрӣ ва бозомӯзии мутахассисон дар соҳаи нақлиёт;

– Нақшаи амалии ҳамкорӣ дар соҳаи нақлиёт байни Ҷумҳурии Тоҷикистон ва Федератсияи Русия барои солҳои 2023-2025;

– Ёддошти тафоҳум оид ба ҳамкорӣ байни Вазорати рушди иқтисод ва савдои Ҷумҳурии Тоҷикистон ва Вазорати рушди иқтисоди Федератсияи Русия;

– Ёддошти тафоҳум оид ба ҳамкорӣ байни Хадамоти иҷрои назди Ҳукумати Ҷумҳурии Тоҷикистон ва Хадамоти федералии приставҳои судии Федератсияи Русия;

– Созишнома байни Хадамоти гумруки назди Ҳукумати Ҷумҳурии Тоҷикистон ва Хадамоти федералии гумруки Федератсияи Русия дар бораи эътирофи тарафайни мақомоти танзимгарони ваколатдори иқтисодӣ;

– Ёддошти тафоҳум оид ба масъалаҳои назорати меҳнат ва мусоидат ба шуғли аҳолӣ байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Хадамоти федералии меҳнат ва шуғли аҳолии Федератсияи Русия;

– Созишнома байни Академияи миллии илмҳои Тоҷикистон ва Маркази миллии таҳқиқоти “Институти Курчатов”-и Федератсияи Русия оид ба ҳамкориҳои илмӣ ва илмию техникӣ.

Пас аз анҷоми маросими имзои санадҳои нави ҳамкорӣ Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Русия муҳтарам Владимир Путин барои доираи васеи хабарнигорон нишасти матбуотӣ оростанд.

Имрӯз, 21 ноябр дар доираи сафари расмии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Федератсияи Русия дар Қасри Кремл мулоқоту музокироти сатҳи олии Тоҷикистону Русия баргузор шуд.

Президенти Ҷумҳурии Тоҷикистонро Президенти Федератсияи Русия муҳтарам Владимир Путин самимона истиқбол гирифт.

Зимни музокирот сарони ду давлат дар доираи мулоқоти хосса ва бо иштироки ҳайатҳои ҷонибҳо дар фазои дӯстона ва ҳусни тафоҳум, ки хоси муносибатҳои байнидавлатии ду кишвар мебошад, маҷмӯи васеи масъалаҳои ҳамкории дутарафаро муҳокима намуданд.

Сарони давлатҳо ҷанбаҳои кунунии шарикии стратегии ҷонибҳо, аз ҷумла масъалаҳои ҳамкорӣ дар бахшҳои иқтисодиву тиҷоратӣ, фарҳангию гуманитарӣ, инчунин дар соҳаи амниятро баррасӣ намуданд.

Ҳамчунин оид ба доираи васеи масъалаҳои дорои хусусияти минтақавӣ ва байналмилалӣ мубодилаи афкор анҷом дода шуд.

Зимни музокирот Пешвои миллат зикр намуданд, ки сафари мазкурро ҳамчун қадами муҳим дар роҳи тавсеаи минбаъдаи шарикии стратегӣ ва ҳампаймонии ду давлат мешуморанд ва ба он ишора намуданд, ки ҳамкории Тоҷикистону Русия имрӯз дар тамоми соҳаҳои манфиатҳои тарафайн дорои ҷараёни устувор мебошад.

Таъкид гардид, ки соли равон барои ҳар ду давлат соли ҷашнӣ ба ҳисоб меравад. 30 сол қабл Шартномаи дӯстӣ, ҳамкорӣ ва ёрии байниҳамдигарӣ ба имзо расида буд. Ба сатҳи расидаи ҳамёрӣ баҳои баланд дода шуд.

Дар музокирот масъалаҳои ҳамкории энергетикӣ, инчунин ҳамкории саноатӣ бо таваҷҷуҳ ба саноати металлургӣ, кӯҳӣ, нассоҷӣ, хӯрокворӣ ва дорусозӣ мавқеи муҳимро ишғол намуданд.

Бояд зикр намуд, ки бо дарназардошти захираҳои бузурги гидроэнергетикӣ давлати мо айни ҳол энергетикаи «сабз»-ро фаъолона рушд медиҳад.

Тоҷикистон дорои 13 ҳазор пирях мебошад, ки 60 дарсади захираҳои обии Осиёи Марказиро ташаккул медиҳанд.

Мамлакати мо дар ҷаҳон аз ҷиҳати захираҳои умумии манбаъҳои гидроэнергетикӣ дар ҷойи ҳаштум ва аз ҷиҳати ҳиссаи хоси он ба сари ҳар як нафар аҳолӣ дар ҷойи дуюм қарор дорад.

Имрӯз Тоҷикистон 98 дарсади неруи барқи худро дар неругоҳҳои барқи обӣ, яъне аз манбаъҳои барқароршавандаи “энергияи сабз” истеҳсол намуда, аз рӯи ин нишондод дар ҷаҳон ҷойи шашумро ишғол менамояд.

Таъкид карда шуд, ки Тоҷикистон азм дорад иқтидори истеҳсоли энергияи тозаро ҳамчун заминаи калидии пешбурди “иқтисоди сабз” дучанд намояд.

Ҷонибҳо ба мувофиқа расиданд, ки соҳаи кишоварзӣ самти дигари дурнамодори ҳамкорӣ мебошад.

Барои густариши содироти маҳсулоти кишоварзии аз ҷиҳати экологӣ тозаи Тоҷикистон ба Русия изҳори омодагӣ карда шуд.

 Гуфтугӯ ҳамчунин доир ба имкониятҳои васеи ҳамкорӣ дар соҳаи сайёҳӣ анҷом дода шуд.

Тамоюли таваҷҷуҳи сайёҳони рус ба Тоҷикистон ва мутаносибан афзоиши шумораи онҳо таъкид гардид.

Аз натиҷаҳои баланди ҳамкории гуманитарӣ, ки дар ҳоли болоравӣ қарор доранд, изҳори  қаноатмандӣ карда шуд.

Соли гузашта дар моҳи октябр Рӯзҳои фарҳанги Тоҷикистон дар Русия бомуваффақият доир гардида, тобистони имсол дар шаҳрҳои Тоҷикистон Рӯзҳои фарҳанги Русия баргузор шуданд.

Дар музокирот ба омӯзиши забони русӣ, ки дар Тоҷикистон ба он тибқи Конститутсия мақоми забони муоширати байни миллатҳо дода шудааст, таваҷҷуҳи хосса зоҳир карда шуд.

Бояд зикр кард, ки омӯзиши забони русӣ дар Тоҷикистон дар тамоми зинаҳои низоми маориф шуруъ аз кӯдакистон дар беш аз чор ҳазор муассисаи таълимӣ ба таври ҳатмӣ амалӣ карда мешавад.

Ба густариши таҷрибаи фиристодани омӯзгорони рус ба Тоҷикистон дар чаҳорчӯби лоиҳаи «Муаллими рус дар хориҷа», ки дар доираи он ҳоло дар давлати мо 72 омӯзгор фаъолият дорад, изҳори ҷонибдорӣ баён карда шуд.

Сарони давлатҳо ба рушд ва таҳкими робитаҳои байниминтақавӣ аҳаммияти бузург зоҳир намуданд.

Зиёда аз 80 субъекти федералӣ ва хоҷагидории Русия имрӯз бо Тоҷикистон ҳамкорӣ менамоянд.

Изҳори итминон карда шуд, ки густариши минбаъдаи ҷуғрофияи робитаҳои байниминтақавӣ ба рушди муносибатҳои иқтисодию тиҷоратӣ ва дигар муносибатҳои байни давлатҳо мусоидат менамояд.

Доир ба ҷараёни мусбати ҳамкории байнипарлумонӣ суҳбат анҷом дода шуд.

Байни мақомоти қонунгузории ду давлат тақвияти робитаҳо мушоҳида мегардад.

Аҳамияти ҳамёрии ду давлат дар соҳаи амният зикр карда шуд.

9 ноябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Тошканд дар ҳошияи саммити 16-уми Созмони ҳамкории иқтисодӣ (СҲИ) бо Президенти Ҷумҳурии Узбекистон муҳтарам Шавкат Мирзиёев мулоқот карданд.

Ҷонибҳо зимни мулоқот масоили рушду густариши ҳамкориҳоро дар соҳаҳои сиёсӣ, тиҷоратию иқтисодӣ, саноат, энергетика ва фарҳангию гуманитарӣ муҳокима карданд.

Изҳори умед карда шуд, ки ташрифи давлатии Президенти Ҷумҳурии Узбекистон ба Ҷумҳурии Тоҷикистон, ки соли оянда дар назар аст, барои инкишофи минбаъдаи робитаҳои ду кишвар ва ба сатҳи иттифоқчӣ баровардани муносибатҳои Тоҷикистону Узбекистон мусоидати муассир хоҳад намуд.

Ҷонибҳо барои дар доираи ин сафар баргузор кардани силсилаи чорабиниҳо, аз қабили форуми тиҷоратию иқтисодӣ ва сармоягузорӣ, форуми олимон, ҷавонон, мулоқоти занони пешсаф, шоми дӯстӣ, намоиши муштараки маҳсулот ва чорабиниҳои варзишӣ ба мувофиқа расиданд.

Зимни суҳбат Сарони давлатҳо ҳамчунин оид ба дигар масъалаҳои мавриди таваҷҷуҳ гуфтугуйи судманд анҷом доданд.

17 август Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маҳаллаи Хоруғи Боло бинои дуюми Муассисаи таҳсилоти миёнаи умумии рақами 8-ро ифтитоҳ намуданд.

Ин иншоот тӯҳфаи арзандаи Ҳукумати Ҷумҳурии Тоҷикистон барои хонандагони шаҳри Хоруғ дар арафаи соли нави хониш мебошад.

Тибқи лоиҳа, муассисаи таълимӣ аз се бино иборат буда, барои 640 хонанда дар ду баст пешбинӣ шудааст.

Бинои якуми мактаб 21 августи соли 2020 аз ҷониби Президенти мамлакат муҳтарам Эмомалӣ Раҳмон ифтитоҳ ёфта буд.

Акнун дар арафаи 32-юмин солгарди Истиқлоли давлавтӣ бинои дуюми он чун армуғони идона ба сокинони шаҳри Хоруғ эҳдо гардид.

Бинои сеюми муассисаи таълимӣ дар арафаи ҷашни 35-солагии Истиқлоли давлатӣ мавриди баҳрабардорӣ қарор дода мешавад.

Ба Пешвои миллат муҳтарам Эмомалӣ Раҳмон иттилоъ дода шуд, ки муассисаи таълимӣ пурра бо аёниятҳои дарсӣ ва технологияи муосири дарсӣ таъмин карда шудааст.

Дар бинои дуюми Муассисаи таҳсилоти миёнаи умумии рақами 8 12 синфхона ва 9 ҳуҷраи методӣ-фаннӣ, инчунин ду толори омӯзиши мусиқӣ, як толори омӯзиши рассомию кандакорӣ ва як синфи фанни информатика, ҳуҷраҳои бойгонӣ ва ҳамшираи шафқат сохта шудааст.

Дар маҷмуъ, ду бинои ин муассисаи таълимии муосир дорои 32 синфхона ва 13 ҳуҷраи гуногун барои омӯзиши ҳунарҳо ва компютер  мебошад. Дар ин муассисаи таълимӣ 55 компютер мавҷуд мебошад, ки барои омӯзиши ҳамаҷонибаи хонандагон басанда аст.

Дар муассисаи муосири таълимӣ 29 омӯзгор ба таълиму тарбияи 345 хонанда машғул мебошанд.

Бояд зикр намуд, ки бинои кӯҳнаи мактаб дар шаҳри Хоруғ соли 1958 бунёд шудааст. Бо гузашти солҳо иншоот фарсудаву таъмирталаб гардида, шароиту имкониятҳои илмомӯзӣ ба талаботи замони муосир  ҷавобгӯ  набуд.  Вобаста ба ин, бо дастури бевоситаи Пешвои миллат дар заминаи мактаби пешина бунёди муассисаи таълимии нав ба нақша гирифта шуд. Дар давоми чор соли охир дар ҷойи бинои кӯҳна барои омӯзгорону толибилмон беҳтарин ва муосиртарин шароити кор ва илмомӯзӣ фароҳам оварда шуд.

Дар фасли зимистон биноҳои муассиса бо гармӣ таъмин мебошанд.

Фармоишгари иншоот Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон буда, корҳои  сохтмониро Ҷамъияти дорои масъулияти маҳдуди “Шариф Ш.С.” ба анҷом расониданд. Дар рафти корҳои сохтмонӣ зиеда аз 200 нафар сокини маҳаллӣ бо кор ва маоши хуб таъмин карда шуданд.

Намои берунии муассисаи таълимӣ бисёр зебо мебошад. Он бо тарҳи меъмории тоҷикона ва аврупоӣ сохта шуда, дар ороиши намои берунии он сангҳои маҳаллӣ истифода гардидааст.

Сарвари  давлат муҳтарам Эмомалӣ Раҳмон ба сифати корҳои сохтмонӣ баҳои баланд дода, ба коргарону сохтмончиён барои анҷоми муваффақонаи кор дар муҳлати муайяншуда изҳори сипос намуданд.

Зимни шиносоӣ бо шароити Муассисаи таҳсилоти миёнаи умумии рақами 8 Пешвои муаззами миллат толибилмонро ба истифодаи босамари имкониятҳои фароҳамовардашуда ва омӯзиши амиқи илму донишҳои замонавӣ ҳидоят карданд.

Ҳайати омӯзгорону хонандагон барои фароҳам овардани чунин шароити созгори таълимӣ ба Пешвои муаззами миллат муҳтарам Эмомалӣ Раҳмон изҳори сипос намуданд.

Мавриди зикр аст, ки хонандагони ин муассиса аз фанҳои дақиқ дар озмунҳои ҷумҳуриявию байналмиллалӣ иштирок намуда, сазовори ҷойҳои ифтихорӣ гардидаанд. Толибилмону омӯзгорон ҳамаи комёбиҳои худро аз ғамхориҳои доимии Пешвои муаззами миллат медонанд.

Баъди ифтитоҳи бинои нави мактаб дар ҳамин ҷо Сарвари давлат муҳтарам Эмомалӣ Раҳмон бо тарҳи бунёди ду муассисаи таълимии дигар ва Беморхонаи марказии шаҳр шинос гардиданд.

Зимни муаррифӣ иттилоъ дода шуд, ки Муассисаи таҳсилоти миёнаи умумии рақами 4 барои 240 хонанда пешбинӣ гардидааст. Ин муассиса дар заминаи бинои мактаби кӯҳна, ки соли 1938 ба тариқи ҳашар сохта шуда буд, бунёд мегардад. Мактаби имрӯза, воқеъ дар Маҳаллаи Ниводаки шаҳри Хоруғ аз 8 синфхона ва ду ҳуҷраи иловагӣ иборат мебошад. Бунёди муассисаи нави таълимӣ имконият фароҳам меорад, ки кӯдакону наврасони Маҳаллаи Баракат ва деҳоти ба шаҳри Хоруғ наздики ноҳияи Шуғнон дар он ба таълиму тарбия фаро гирифта шаванд.

Муассисаи таҳсилоти миёнаи умумии рақами 6 бошад, барои 430 хонанда пешбинӣ гардидааст. Ин муассисаи таълимӣ низ дар заминаи мактаби кӯҳнаи Маҳаллаи Носири Хусрави шаҳри Хоруғ, ки соли 1928 ба тариқи ҳашар бунёд ёфтааст, сохта мешавад.

Дар ҳамин ҷо Пешвои миллат ҳамчунин бо лоиҳаи бунёди Беморхонаи марказии Вилояти Мухтори Кӯҳистони Бадахшон дар шаҳри Хоруғ шинос шуданд.

Тибқи лоиҳа, беморхона аз 6 ошёна иборат буда, он бо дарназардошти  талаботи муосири соҳавӣ бунёд хоҳад ёфт. Дар баробари сохтмони бинои асосӣ, ҳамчунин бунёди иншооти ёрирасон, аз ҷумла, дегхона, анбори сӯзишворӣ ва зеристгоҳи барқӣ дар назар дошта шудааст.

Беморхонаи мазкур барои 200 кат пешбинӣ гардида, дар он барои муоинаву муолиҷаи беморон тамоми шароити зарурӣ фароҳам оварда мешавад.

Сарвари давлат ба масъулони Вазорати тандурустӣ ва ҳифзи иҷтимоии аҳолӣ, ҳамчунин ба ташкилоту идораҳои сохтмонӣ дастур доданд, ки иншоот дар муҳлати муайяншуда ва бо сифати баланд сохта, мавриди истифодаи мардум қарор дода шавад.

Иштирокчиёни озмуни чумҳуриявии «Тоҷикистон-Ватани азизи ман».

Зоиршо Ҳайдаров.